Aurangabad Crime News Update: पतीला मनसोक्त दारू पाजून त्यानंतर त्याच्यावर पोटात चाकूने वार करीत पत्नीने त्याचा काटा काढल्याची घटना शनिवारी समोर आली होती. मात्र पोलीस तपासात यात आणखी नवीन खुलासा झाला असून, फेसबुकवरून ओळख झालेल्या प्रियकरानेच प्रियेसीच्या पतीच्या खुनाचा कट रचला असल्याचे समोर आले आहे. विजय संजयकुमार पाटणी (35, रा. एन-६, सिडको) असे मृताचे नाव असून, पत्नी सारिका विजय पाटणी (30, रा. सलामपुरेनगर, वडगाव कोल्हाटी) आणि तिचा प्रियकर सागर मधुकर सावळे (25 रा. शिवाजीनगर) यांच्याविरुद्ध गुन्हा दाखल करण्यात आला आहे.
विजय आणि सारिका या दोघांमध्ये पटत नसल्याने त्यांनी चार महिन्यांपूर्वी त्यांनी राहण्याचा निर्णय घेतला होता. त्यामुळे विजय त्याच्या वृद्ध आईसह आणि सारिका तिच्या आई व भावासह राहू लागले होते. यादरम्यान, सारिकाची फेसबुकवरून सागरशी ओळख झाली आणि दोघांमध्ये प्रेमसंबंध जुळले. याचकाळात विजय सारिकासोबत पुन्हा एकत्र राहण्याचा हट्ट करायला लागला. त्यामुळे सागरने विजयचा काटा काढण्याचं ठरवलं.
असा रचला कट...
विजयकडून सुरु असलेल्या त्रासाबद्दल सारिकाने सागराला सांगितले. त्यामुळे दोघांनी मिळून विजयच्या हत्येचा कट रचला. ठरल्याप्रमाणे विजयला कांचनवाडी उड्डाणपुलाजवळ सारिकाने आणले. त्यानंतर विजयचा खून करण्यात आला. हत्या केल्यानंतर आरोपी सागर आणि सारिका यांनी विजयची दुचाकी त्याच रात्री थेट शिर्डी येथे नेऊन सोडली. जाताना त्यांनी रक्ताने माखलेले कपडे जाळले टाकले आणि हत्येसाठी वापरलेला चाकू फेकून दिला. दुकानातून नवीन ड्रेस घेतले. दुसऱ्या दिवशी ते बसने पंढरपूर चौकात उरतले. तेथून रिक्षाने पुन्हा खुनाच्या घटनास्थळी आले. तेथून सागरची दुचाकी घेऊन ते आपआपल्या घरी गेले.
तीन वेळ घटनास्थळी पाहणी केली...
विजयची हत्या केल्यावर सागर आणि सारिकाने त्याचा मृतदेह रस्त्याच्या कडेला असलेल्या झुडपात फेकून दिला. मात्र त्यानंतर जवळपास तीन वेळा घटनास्थळी जाऊन ते माहिती घेत राहिले. तोपर्यंत विजयच्या खुनाची घटना उघडकीस आली नव्हती. विशेष म्हणजे याच काळात सारिकाने एमआयडीसी वाळूज ठाण्यात विजयच्या बेपत्ताची नोंद केली होती. मात्र विजयाचा मृतदेह सापडला आणि पोलिसांनी तपासाची चक्रे फिरवून सागर व सारिका यांनी केलेला कारनामा समोर आणला.
Crime: फेसबुकवर भेटलेल्या प्रियकराच्या मदतीने पत्नीने पतीला कायमचं संपवलं, कारण होतं...