अन्नदात्यासाठी अन्नत्याग... किसानपुत्रांचे आज एकदिवसीय उपोषण

राजधुळ साहित्य संमेलनाचे अध्यक्ष आणि ख्यातनाम साहित्यिक किशोर सानप यांनी संमेलनात भाषणाच्या सुरुवातीला साहेबराव करपे यांना श्रद्धांजली अर्पण करुन, किसानपुत्र आंदोलनाला पाठिंबा दिला. 19 मार्च रोजी सर्वांनी उपोषण करावे असे आवाहनही केले.

मुंबई : शेतकऱ्यांप्रती सहवेदना व्यक्त करण्यासाठी राज्यभरातील किसानपुत्र आणि पुत्री एकदिवसीय ‘अन्नदात्यासाठी अन्नत्याग’ आंदोलनात सहभागी झाले आहेत. पहिल्या शेतकरी आत्महत्येच्या 32 व्या स्मृतिदिनानिमित्त हे आंदोलन करण्यात येत असून, किसानपुत्र आंदोलनाचे प्रणेते अमर हबीब यांनी या आंदोलनाची घोषणा केली आहे. उपोषणाची तारीख 19 मार्च का? साहेबराव शेषराव करपे हे यवतमाळ जिल्ह्यातील चील-गव्हाण या गावचे शेतकरी. त्यांचे वडील संगीताचे जाणकार होते. साहेबरावांनीही वडिलांकडून संगीताचे धडे घेतले होते. उदरनिर्वाहाचे साधन शेती. शेती परवडत नाही. दरवर्षी तोटाच होतो. घेतलेली कर्जे फेडता येत नाही, लाईटचे बिल भरता येत नाही, हात उसने घेतलेल्या पैशांची परतफेड करता येत नाही.  म्हणून अस्वस्थ होते. एके दिवशी पत्नी मालती व चार अपत्यांना घेऊन ते पवनार आश्रमात गेले. सविस्तर पत्र लिहिले. रात्री जेवणात विषारी औषध कालवून संपूर्ण कुटुंबाने आत्महत्या केली. सकाळी त्या एका खोलीतून सहा शव काढावे लागले. साहेबरावांनी लिहून ठेवलेल्या पत्रात त्यांनी शेतकरी म्हणून जगणे कठीण झाले आहे असे नमूद केले होते. ते पत्र समस्त शेतकरी समाजाची दु:खद कैफियत सांगणारे होते. साहेबराव यांच्या आत्महत्येने सारा महाराष्ट्र हादरून गेला होता. शेतकरी संघटनेचे नेते शरद जोशी यांनी या आत्महत्येची गंभीर दखल घ्या व धोरणे बदला अन्यथा अशा आत्महत्त्या रोज होतील असा इशारा दिला होता. ही पहिली जाहीर झालेली शेतकऱ्याची आत्महत्या. ती साहेबराव करपे यांनी 19 मार्च 1986 रोजी केली होती. या 19 मार्चला त्यास 32 वर्ष होतात. म्हणून उपवासासाठी 19 मार्च ही तारीख निवडण्यात आली असल्याची माहिती अमर हबीब यांनी दिली. अमर हबीब यवतमाळमध्ये उपोषणाला बसणार किसानपुत्र आंदोलनाचे प्रणेते अमर हबीब यांनी उपोषणाची हाक दिली असून, ते स्वत:ही या उपोषणात सक्रिय सहभाग घेणार आहेत. अमर हबीब हे यवतमाळ जिल्ह्यातील महागावमध्ये उपोषणाला बसणार आहेत. ज्यांना महागावला जाणं शक्य आहे, त्यांनी तिथेही सहभागी होऊन पाठिंबा दर्शवण्याचं आवाहन अमर हबीब यांनी केलं आहे. साहित्यिक किशोर सानप यांचाही पाठिंबा राजधुळ साहित्य संमेलनाचे अध्यक्ष आणि ख्यातनाम साहित्यिक किशोर सानप यांनी संमेलनात भाषणाच्या सुरुवातीला साहेबराव करपे यांना श्रद्धांजली अर्पण करुन, किसानपुत्र आंदोलनाला पाठिंबा दिला. 19 मार्च रोजी सर्वांनी उपोषण करावे असे आवाहनही केले. विशेष म्हणजे, राज्यासह देशभरातून या अन्नत्याग आंदोलनात अनेकजण सहभागी होणार आहेत. किंबहुना, परदेशातूनही अनेकजणांनी आपण सहभागी होणार असल्याचे अमर हबीब यांना कळवले आहे.