क्लीनचीट देणं मुख्यमंत्र्यांचं काम नाही, खासदार पोस्टमार्टम रिपोर्ट बदलायला लावत असेल तर तो खूनच, त्यात खासदाराचा सहभाग असू शकतो; जितेंद्र आव्हाडांचा गंभीर आरोप
जितेंद्र आव्हाड म्हणाले की, सरकारने याकडे गांभीर्याने लक्ष घालायला हवं. पण उलट मुख्यमंत्री क्लीनचीट देत आहेत, हे धक्कादायक आहे. क्लीनचीट देणं हे मुख्यमंत्र्यांचं काम नाही.
Jitendra Awhad on Phaltan Doctor Case: फलटणमधील डॉक्टर युवतीच्या आत्महत्येच्या प्रकरणावरून राष्ट्रवादी काँग्रेसचे आमदार जितेंद्र आव्हाड यांनी आज माजी भाजप खासदार रणजितसिंह निंबाळकर आणि राज्य सरकारवर घणाघाती हल्ला चढवला.त्यांनी या घटनेला “इंस्टिट्यूशनल मर्डर” म्हणजेच संस्थात्मक खून म्हटलं असून, सरकारी यंत्रणेचाच यात हात असल्याचा गंभीर आरोप केला. सातारा जिल्ह्यातील फलटण उपजिल्हा रुग्णालयातील महिला डॉक्टरच्या आत्महत्येने राज्यभर खळबळ उडाली आहे. डॉक्टरच्या सुसाईड नोटमध्ये पोलीस उपनिरीक्षक गोपाल बदने याने चार वेळा लैंगिक अत्याचार केल्याचा आणि प्रशांत बनकर याने मानसिक छळ केल्याचा उल्लेख आहे.
“सरकारी यंत्रणेच्या छळामुळेच युवतीचा जीव गेला”
आव्हाड म्हणाले, “एका मागासवर्गीय उसतोड कामगाराच्या मुलीचा जीव गेला आहे. हा केवळ आत्महत्येचा प्रकार नाही. हा सरकारी यंत्रणेच्या छळवादाचा परिणाम आहे. हा इंस्टिट्यूशनल मर्डर आहे.” त्यांनी सांगितले की, “त्या तरुणीच्या सुसाईड नोटमध्ये स्पष्ट शब्दांत लिहिलं आहे की, तिला अन्याय आणि दबावाला सामोरं जावं लागलं. सरकारने याकडे गांभीर्याने लक्ष घालायला हवं. पण उलट मुख्यमंत्री क्लीनचीट देत आहेत, हे धक्कादायक आहे. क्लीनचीट देणं हे मुख्यमंत्र्यांचं काम नाही.”
“पोस्टमार्टम रिपोर्ट बदलायला खासदार लावत असतील तर तो खूनच आहे”
आव्हाड यांनी थेट रणजितसिंह निंबाळकरांचं नाव घेत गंभीर आरोप केला. ते म्हणाले, “जर एखादा खासदार डॉक्टरला पोस्टमार्टम रिपोर्ट बदलायला सांगत असेल, तर तो आत्महत्येचा नाही, थेट खुनाचा प्रकार आहे. आणि तो खून झाला असेल, तर त्या खासदारांचा सहभाग यात असू शकतो. याची चौकशी झालीच पाहिजे.”
“फडणवीस पंतप्रधानपदाचे उमेदवार, मग गुंड प्रवृत्तीचे लोक सोबत का?”
या प्रकरणाचा संदर्भ घेत आव्हाड यांनी सीएम देवेंद्र फडणवीस यांनाही लक्ष्य केलं. ते म्हणाले, “देवेंद्र फडणवीस हे पंतप्रधान पदाचे उमेदवार मानले जात आहेत. मग अशा गुंड प्रवृत्तीच्या लोकांना सोबत ठेवणं योग्य आहे का? याचा विचार त्यांनी करावा. कारण अशा घटनांनी सरकारचा आणि राज्याच्या प्रतिमेचा अपमान होतो.”
सुषमा अंधारे यांचाही निंबाळकरांवर गंभीर आरोप
दुसरीकडे, ठाकरेंच्या शिवसेनेच्या उपनेत्या सुषमा अंधारे यांनीही या प्रकरणात निंबाळकरांवर गंभीर आरोप केला आहे. यात एका खासदार आणि त्यांच्या पीएचाही उल्लेख असून, या प्रकरणात भाजप खासदार रणजितसिंह नाईक निंबाळकर यांच्यावर थेट आरोप केले. त्या म्हणाल्या, “ही आत्महत्या नाही, हत्या आहे.” अंधारे यांनी एका व्हिडिओचा उल्लेख करत निंबाळकर यांच्यावर गंभीर आरोप केले. दरम्यान, मुख्यमंत्री देवेंद्र फडणवीस यांनी फलटणमधील कार्यक्रमात निंबाळकरांना पाठिंबा देत “चिंता करू नका, आम्ही तुमच्या पाठीशी आहोत,” असे म्हटले. त्यावर अंधारे यांनी फडणवीसांवर टीका करत “ही बीडच्या मुलीची संस्थात्मक हत्या आहे,” असा आरोप केला.
इतर महत्वाच्या बातम्या
महत्त्वाच्या बातम्या
