विद्यार्थीनीच्या पाठीवरुन हात फिरवल्याचा आरोप, मुख्याध्यापकाची आत्महत्या

महिला कार्यकर्त्यांनी त्याचा जाब शाळेत जाऊन विचारला तसेच कावरे यांच्याबाबत वरिष्ठांकडे तक्रार देखील केली होती. त्याची चर्चा सर्वत्र होण्यास सुरुवात झाली. त्यानंतर कावरे यांनी आत्महत्या केली, अशी माहिती सूत्रांनी दिली आहे.

प्रातिनिधिक फोटो

पुणे : इयत्ता 9 वीच्या विद्यार्थीनीच्या पाठीवरून हात फिरवणार्‍या मुख्याध्यापकास गावातील काही सामाजिक कार्यकर्त्यांनी शाळेत  मारहाण केली. त्यानंतर मानसिक दबावाखाली या मुख्याध्यापकाने कॅनॉलमध्ये उडी मारून आत्महत्या केली. दरम्यान, मुख्याध्यापकास आत्महत्या प्रवृत्त केल्याप्रकरणी 3 महिलांसह पाच जणांविरूध्द सिंहगड रोड पोलीस ठाण्यात गुन्हा दाखल करण्यात आला आहे. अशोक कावरे असे आत्महत्या केलेल्या मुख्याध्यापकाचे नाव आहे. याप्रकरणी अशोक कावरे यांच्या पत्नी वर्षा अशोक कावरे यांनी फिर्याद दिली असून पोलिसांनी नवनाथ पारगे, पूजा पारगे, रोहिणी कुंभार, बाळासाहेब पारगे आणि सुवर्णा चव्हाण (सर्व रा. डोणजे) यांच्याविरूध्द गुन्हा दाखल केला आहे. अशोक कावरे हे एका शाळेत मुख्याध्यापक म्हणून कार्यरत होते. त्यांनी शाळेतील काही विद्यार्थ्यांना व विद्यार्थीनींना काही कारणावरून शिक्षा केली होती. त्यामुळे गुन्हा दाखल झालेल्या पाच जणांनी कावरे यांना मारहाण केली. घडलेल्या प्रकाराच्या मानसिक दबावाखाली येऊन 24 सप्टेंबर रोजी कावरे यांनी कॅनॉलच्या पाण्यामध्ये उडी मारून आत्महत्या केली. वर्षा कावरे यांच्या फिर्यादीवरून पोलीस ठाण्यात गुन्हा दाखल झाला आहे. मात्र, याबाबत अधिक माहिती घेतली असता अशोक कावरे हे शाळेतील इयत्‍ता 9 वी मधील विद्यार्थीनींना शिक्षा म्हणून कधी-कधी मारहाण करीत होते. त्यावेळी ते विद्यार्थीनींच्या पाठीवरून हात फिरवत होते. ते विद्यार्थीनींना अजिबात आवडत नव्हते. म्हणून काही विद्यार्थीनींनी ही बाब गावातील काही महिला सामाजिक कार्यकर्त्यांना सांगितली. त्यानंतर महिला कार्यकर्त्यांनी त्याचा जाब शाळेत जाऊन विचारला तसेच कावरे यांच्याबाबत वरिष्ठांकडे तक्रार देखील केली होती. त्याची चर्चा सर्वत्र होण्यास सुरुवात झाली. त्यानंतर कावरे यांनी आत्महत्या केली, अशी माहिती सूत्रांनी दिली आहे. सिंहगड रोड पोलीस ठाण्याचे वरिष्ठ पोलीस निरीक्षक सरदार पाटील यांच्या मार्गदर्शनाखाली सहाय्यक पोलीस निरीक्षक ज्योती गडकरी गुन्ह्याचा अधिक तपास करीत आहेत.