बेळगावात स्मशानात पार पडला आंतरजातीय विवाह!

डॉ. बाबासाहेब आंबेडकर यांच्या महापरिनिर्वाण दिनाचे औचित्य साधून अंधश्रद्धा निर्मूलनाच्या उपक्रमाअंतर्गत स्मशानात आंतरजातीय विवाह पार पडला.

बेळगाव : अंत्यसंस्काराला स्मशानात लोक जमले होते, मृतदेह चितेवर ठेवून त्याला अग्नी देण्यात आला तर दुसरीकडे विवाहाची मंगलाष्टके सुरु होती. कोणत्या चित्रपटातील अथवा कोणत्या वाहिनीवरील मालिकेतील हा प्रसंग नव्हे तर बेळगावच्या सदाशिवनगर येथील स्मशानभूमीत एका ठिकाणी अंत्यसंस्कार सुरु होता  तर दुसरीकडे विवाह सोहळा संपन्न होत होता. डॉ. बाबासाहेब आंबेडकर यांच्या महापरिनिर्वाण दिनाचे औचित्य साधून अंधश्रद्धा निर्मूलनाच्या उपक्रमाअंतर्गत स्मशानात आंतरजातीय विवाह पार पडला. मानव बंधुत्व संघटनेच्या माध्यमातून अंधश्रद्धा दूर करण्यासाठी म्हणून आमदार सतीश जारकिहोळी यांच्या आणि मानव बंधुत्व संघटना यांच्या पुढाकाराने चक्क स्मशानात एक आंतरजातीय विवाह पार पडला. विवाहाला स्वामीजींनी देखील उपस्थिती दर्शवली होती. सोपान बाळकृष्ण जांबोटी,रा.तीर्थकुंडये या अनुसूचित जातीमधील युवकाचा हिरेबागेवाडी येथील रेखा चंद्रप्पा गुरवण्णवर या लिंगायत तरुणीशी आंतरजातीय विवाह स्मशानात पार पडला. आमदार सतीश जारकिहोळी यांनी नवदाम्पत्याला पन्नास हजार रुपये रोख आहेर दिला आणि त्यांचे अभिनंदन केले. आंतरजातीय विवाह करणाऱ्यांना सरकारने तीन लाख रुपये मदत द्यावी अशी मागणी आपण मुख्यमंत्र्यांकडे करणार असल्याचे आमदार सतीश जारकिहोळी यांनी सांगितले. विवाहाला उपस्थित मंडळींनी अक्षता टाकून वधूवरांना शुभेच्छा दिल्या. यापूर्वी देखील आमदार सतीश जारकिहोळी यांनी बाबासाहेब आंबेडकर यांच्या महापरिनिर्वाण दिनानिमित्त स्मशानात वास्तव्य करुन उपाहार आणि भोजनही केले होते. आज झालेला स्मशानभूमीतील आंतरजातीय विवाह मात्र चर्चेचा विषय झाला आहे. माणसाचा अखेरचा प्रवास जेथे संपतो तेथेच नवजीवनाचा प्रारंभ करण्याचे धाडस दाखवणाऱ्या वधूवरांचे देखील कौतुक करावे तेवढे थोडेच आहे.