Jalgaon News : छेड काढणाऱ्या तरुणाला शाळकरी मुलींकडून चोप

जळगावात शाळेत जात असताना छेड काढणाऱ्या तरुणास मुलींनी चांगलाच चोप दिला. मुलींचा रुद्रावतार पाहिल्यानंतर आजूबाजूला असलेल्या लोकांनीही तरुणाला फटके देत त्याला पोलिसांकडे सोपवलं.

Jalgaon Molestation

जळगाव :  अल्पवयीन मुली, तरुणी, महिला यांच्यावरील अत्याचारांच्या घटनांचा आलेख वाढताच आहे. पुण्यात शाळकरी मुलीवर एकतर्फी प्रेमावर प्राणघातक हल्ला केल्याची घटना ताजी असतानाच जळगावात एक तरुण शाळेत जाणाऱ्या मुलींची छेड काढत असल्याचं समोर आलं. परंतु या मुलींनी शांत न राहता त्याला चोप देऊन अद्दल घडवली.

शाळेत जात असताना छेड काढणाऱ्या तरुणास मुलींनी चांगलाच चोप दिला. जळगाव जिल्ह्यातील बोडवड तालुक्यात येवती गावाजवळ हा प्रकार घडला. मुलींचा रुद्रावतार पाहिल्यानंतर आजूबाजूला असलेल्या लोकांनीही तरुणाला फटके देत त्याला पोलिसांकडे सोपवलं.

एसटी बस बंद असल्याने येवती गावातील शाळकरी मुली बोदवड शहरात शाळेत पायी चालत जातात. याच दरम्यान एक तरुण काही मुलींशी जवळीक साधण्याचा प्रयत्न करत त्यांची छेड काढत असे. आजही असाच प्रकार या तरुणाने केल्यावर संतप्त झालेल्या या मुलींनी आपला रुद्रावतार दाखवत त्याला चपलेने चांगलाच चोप दिला.

मुलींचा रुद्रावतार पाहून स्थानिक नागरिकांनीही या तरुणालास चोप देत पोलिसांच्या स्वाधीन केले. संबंधित तरुणाच्या विरोधात गुन्हा नोंद करण्याचे काम बोडवड पोलीस ठाण्यात सुरु आहे.

पुण्यात शाळकरी मुलीवर वर्गात घुसून वार 
पुण्यातील वडगाव शेरी परिसरातील शाळेत दहावीच्या वर्गात शिकणार्‍या एका मुलीवर एकतर्फी प्रेमातून प्राणघातक हल्ला करण्यात आला. या हल्ल्यात ही मुलगी गंभीररित्या जखमी झाली असून तिच्यावर पुण्यातील रुबी हॉस्पिटलमध्ये उपचार सुरु आहेत. शाळेत दहावीचा निरोप समारंभ सुरु असताना आरोपी तीक्ष्ण शस्त्रासह वर्गात घुसला आणि मुलीवर सर्वांच्या समोर सपासप वार केले.

राज्य महिला आयोगाच्या अध्यक्षा रुपाली चाकणकर यांनी आज पीडितेची हॉस्पिटलमध्ये जाऊन भेट घेतली. तिची प्रकृती ठीक असल्याची माहिती चाकणकर त्यांनी दिली. "मुलीवर हल्ला करणाऱ्या तरुणाने विष पिऊन आत्महत्येचा प्रयत्न केला. त्याच्यावर देखील उपचार सुरु आहेत. हॉस्पिटलमधून डिस्चार्ज मिळाल्यानंतर त्याच्यावर कायदेशीर कारवाई केली जाईल," अशी माहितीही रुपाली चाकणकर यांनी दिली.