जालन्यात वितळलेले लोखंड अंगावर पडून 4 कामगारांचा मृत्यू, 8 गंभीर

सायंकाळी पाच वाजेच्या सुमारास सळ्या करण्यासाठी वितळवण्यात आलेलं लोखंड भट्टीमधून बकेटमध्ये ओतल्यानंतर ते उतू गेले. त्यामुळे वितळलेले लोखंड जवळ काम करत असलेल्या कामगारांच्या अंगावर पडले.

जालना : जालना शहराजवळील एमआयडीसी परिसरात एका स्टील कंपनीत वितळलेले लोखंड अंगावर पडल्याने 4 कामगारांचा होरपळून मृत्यू झाला आहे. या घटनेत 8 कामगार जखमी झाले असल्याची माहिती आहे. घटनेतील जखमींपैकी तिघांची प्रकृती गंभीर आहे. त्यांना औरंगबादच्या खाजगी दवाखाण्यात उपचारासाठी हलवण्यात आलं आहे. माहितीनुसार, औद्योगिक वसाहतीतील ओम साई राम स्टील कंपनीत बांधकामासाठी लागणाऱ्या लोखंडी सळ्या तयार केल्या जातात. सायंकाळी पाच वाजेच्या सुमारास सळ्या करण्यासाठी वितळवण्यात आलेलं लोखंड भट्टीमधून बकेटमध्ये ओतल्यानंतर ते उतू गेले. त्यामुळे भट्टीतले तप्त लोखंड वितळले. हे वितळलेले लोखंड जवळ काम करत असलेल्या कामगारांच्या अंगावर पडले. यात 4 कामगारांचा जागीच होरपळून मृत्यू झाला तर या घटनेत इतर 8 कामगार जखमी झाले. जखमींपैकी 3 गंभीर कामगारांवर औरंगाबाद तर उर्वरित 5 कामगारांवर जालना येथील खाजगी हॉस्पिटलमध्ये उपचार सुरू आहेत. दरम्यान, घटनेतील मृतांची संख्या वाढण्याचा अंदाज असून या घटनेमुळे पुन्हा कामगारांच्या सुरक्षिततेचा प्रश्न ऐरणीवर आला आहे.