Lockdown | लॉकडाऊनच्या फावल्या वेळेत पती-पत्नीने विहीर खोदली, वाशिममधल्या दाम्पत्याचा पराक्रम

लॉकडाऊनच्या काळात काही जण नवनव्या गोष्टी शिकत आहेत. वाशिममधल्या एका दाम्पत्याने या रिकाम्या वेळेत आपल्या घराच्या अंगणात विहीर खोदून पाणी प्रश्न सोडवला आहे.

वाशिम : कोरोना व्हायरसचा संसर्ग वाढू नये यासाठी देशात लॉकडाऊन जाहीर करण्यात आला आहे. यामुळे नागरिकांना घरात कोंडून राहण्याची वेळ आली आहे. मात्र लॉकडाऊनच्या फावल्या वेळेत वाशिम जिल्ह्यातील कारखेडा गावातील एका दाम्पत्याने संधीचं सोनं केलं आहे. पाकमोडे दाम्पत्याने आपल्या घराच्या अंगणात चक्क 25 फूट विहीर खोदली आहे.

वाशिमच्या मानोरा तालुक्यातील कारखेड गावात गजानन पाकमोडे आणि पुष्पा पाकमोडे राहतात. कोरोना व्हायरसच्या पार्श्वभूमीवर लागू झालेल्या लॉकडाऊनमुळे मोकळा वेळ खूप होता. या रिकाम्या 21 दिवसात त्यांनी आपल्या घरासमोरील अंगणात चक्क 25 फूट विहीर खोदण्याची किमया साधली.

गजानन पाकमोडे हे गवंडी काम करुन आपला प्रपंच चालवतात. मात्र लॉकडाऊनमुळे हाताचं काम गेलं. मग रिकाम्या वेळात आपल्या कुटुंबाला नेहमीच भेडसावणारा पाणी प्रश्न निकाली काढण्याचा निर्णय या दाम्पत्याने घेतला आणि त्यांच्या कार्याला यश देखील आलं.

गावात नळ योजना आहे, मात्र रस्त्याचे काम मोठ्या प्रमाणात सुरु असल्याने नळ योजनेची पाईपलाईन फुटल्याने पाण्याचा प्रश्न उद्भवत होता. तो निकाली काढण्यासाठी पाकमोडे दाम्पत्याने कुणाचीही मदत न घेता विहीर खोदून काढली. आपल्या मेहनतीने त्यांनी जणू गंगाच आपल्या दारी आणली. या दाम्पत्याने केलेल्या कार्याचं आता गावात कौतुक होत असून त्यांची विहीर पाहण्यासाठी नागरिक येत आहे.

लॉकडाऊनच्या काळात नागरिक रस्त्यावर येऊन गर्दी करताना आपण पाहतोय. तर कोणी मॉर्निंग वॉकच्या नावाखाली बाहेर पडत आहे. या कृत्यामुळे त्यांना पोलिसांचा प्रसादही खावा लागला. मात्र पाकमोडे कुटुंबाने फावल्या वेळात केलेल्या या कार्याची जिल्ह्याभर चर्चा होत आहे.