Kolhapur Crime : एक नव्हे, तर अनेक दहावीतील वर्गमैत्रिणींशी अश्लील संभाषण करून मानसिक त्रास देणाऱ्या कोल्हापुरातील वकिलाविरुद्ध विनयभंगाचा गुन्हा दाखल करण्यात आला आहे. करवीर पोलिस ठाण्यात हा गुन्हा दाखल झाला असून अॅड. प्रशांत जीवन पाटील (रा. करण हेरिटेज, देवकरण पाणंद, कोल्हापूर) असे त्याचे नाव आहे. 


तक्रारदार पीडित महिला डाॅक्टर आहे. त्यांच्या दहावीच्या वर्गमित्रांचे गेट टुगेदर 8 मे 2022 रोजी कळंब्यातील फार्म हाऊसवर झाले होते. या गेट टुगेदर दरम्यान, वकील प्रशांत पाटीलने त्या पीडित डाॅक्टर महिलेच्या जवळ जाऊन माझ्याशी शरीरसंबंध ठेव, नाहीतर तुझी बदनामी करीन अशी धमकी दिली. त्यामुळे भेदरलेल्या त्या महिलेनं कार्यक्रम संपून  घरी गेल्यानंतर भीतीपोटी ही घटना पतीला सांगितली नाही. 


मात्र, महिनाभरानंतर पीडित  महिला डाॅक्टरच्या एका मित्राने संबंधित वकील आणि आणखी एक मैत्रीण तिच्याबद्दल घाणेरडे बोलत असल्याचे सांगत क्लीपच दिली. त्यामुळे प्रचंड मानसिक तणावाखाली गेल्याने महिलेच्या प्रकृतीत बिघाड झाला. त्यामुळे चिंताग्रस्त पतीने डाॅक्टर पत्नीला याबाबत विचारले असता तिने झाला प्रकार कथन केला. त्यामुळे कुटुबीयांनी थेट कोल्हापूर पोलिस अधीक्षक शैलेश बलकवडे यांची मंगळवारी भेट घेतली.   


पीडित महिलेच्या कुटुंबीयांनी त्या वकिलाविरोधात अनेक महिलांशी अश्लील संभाषण केल्याचे पुरावेच गोळा केले आहेत. त्यानंतर पोलिस ठाण्यात वकीलाविरोधात गुन्हा दाखल करण्यात आला आहे. 


महाविद्यालयीन तरुणीसोबत अश्लील चाळे, कोल्हापूर पोलीस दलातील कर्मचाऱ्याला अटक


दरम्यान, दोन दिवसांपूर्वीच सातारा ते कराड असा प्रवास करणाऱ्या महाविद्यालयीन तरुणीची बसमध्ये छेड काढच्या आरोपाखाली कोल्हापूर पोलिस दलातील कर्मचाऱ्यावर पॉक्सो कायद्यांतर्गत गुन्हा दाखल करण्यात आला आहे. महेश मगदूमअसं गुन्हा दाखल केलेल्या पोलिस कर्मचाऱ्याचं नाव आहे. 


सातारा ते कराड असा एसटीने प्रवास करणाऱ्या महाविद्यालयीन युवतीच्या शेजारी बसलेल्या महेश मगदूम या पोलीस कर्मचाऱ्याने तिच्यासोबत अश्लील चाळे केले. दरम्यान याबाबत संबंधित युवतीने याबाबतची माहिती फोनवरुन तिच्या आई-वडिलांना आणि तिच्या मित्र मैत्रिणींना दिली. कराड एसटी स्टॅण्डवर बस पोहोचेपर्यंत तिचे मित्र पोलिसांना सोबत घेऊनच तिथे हजर झाले आणि छेड काढणाऱ्याला ताब्यात घेतले. 


संबंधित कर्मचारी हा कोल्हापूर पोलिस दलात कार्यरत आहे. कोल्हापूर पोलिस खात्यात तो खेळाडू आहे.


इतर महत्वाच्या बातम्या