NDA II परीक्षेचा अर्ज भरण्याच्या शेवटच्या दिवशी UPSC चे सर्व्हर डाऊन, हेल्पलाईन डेस्कही बंद; विद्यार्थ्यांची तक्रार, मुदतवाढीची मागणी
UPSC NDA II Exam Date : एनडीए परीक्षेचा अर्ज भरताना येणाऱ्या अडचणी सोडवण्यासाठी यूपीएससीने हेल्पलाईन नंबर दिला आहे. परंतु तो बंद असल्याची तक्रार विद्यार्थ्यांनी केली.
UPSC NDA 2 Exam 2026 : केंद्रीय लोकसेवा आयोगाद्वारे (UPSC) घेण्यात येणाऱ्या 'राष्ट्रीय संरक्षण प्रबोधिनी' (NDA) आणि 'नेवल अकॅडमी' (NA) परीक्षा (II) 2026 साठी ऑनलाईन अर्ज भरण्याचा 9 जून रोजी शेवटचा दिवस आहे. मात्र, गेल्या चार ते पाच दिवसांपासून यूपीएससीचे अधिकृत सर्व्हर वारंवार डाऊन होत असल्याची तक्रार विद्यार्थ्यांनी केली. त्यामुळे हजारो विद्यार्थ्यांना अर्ज भरताना प्रचंड अडचणींचा सामना करावा लागला आहे.
एनडीएच्या परीक्षेसाठी 9 जून रोजी संध्याकाळी 6.00 वाजेपर्यंत अर्ज करण्याची अंतिम मुदत होती. मात्र, शेवटच्या टप्प्यात तांत्रिक बिघाड झाल्यामुळे ग्रामीण भागातील तसेच देशभरातील अनेक इच्छुक उमेदवार अर्ज भरण्यापासून वंचित राहिल्याचा गंभीर आरोप केला जात आहे. त्रस्त विद्यार्थ्यांनी यूपीएससीने अर्ज भरण्यासाठी किमान दोन ते तीन दिवसांची मुदतवाढ (Date Extension) द्यावी, अशी आक्रमक मागणी केली आहे.
Students Complaints On NDA Exam : हेल्पलाईनही बंद, विद्यार्थ्यांचा आरोप
उमेदवारांनी सोशल मीडिया आणि विविध माध्यमांतून यूपीएससीच्या कारभारावर तीव्र संताप व्यक्त केला आहे. गेल्या चार ते पाच दिवसांपासून यूपीएससीची वेबसाईट अत्यंत संथ गतीने चालत असून वेळोवेळी सर्व्हर डाऊन होत असल्याची तक्रार विद्यार्थ्यांनी केली. सर्व्हर योग्य रीतीने काम करत नसल्यामुळे एका विद्यार्थ्याला संपूर्ण अर्ज प्रक्रिया पूर्ण करण्यासाठी तब्बल 1 तास किंवा त्याहून अधिक वेळ लागत असल्याची माहिती विद्यार्थ्यांनी दिली.
अर्ज करताना अडचण आल्यास संपर्क साधण्यासाठी यूपीएससीने दिलेला 'हेल्पलाईन डेस्क नंबर' देखील लागत नसल्याची तक्रार विद्यार्थ्यांनी केली आहे. यामुळे ग्रामीण भागातील सायबर कॅफेमध्ये तासंतास बसूनही शेकडो विद्यार्थ्यांचे अर्ज भरणे अपूर्ण राहिले आहे.
UPSC NDA Exam Details : परीक्षेचे महत्त्व आणि पात्रता
संरक्षण दलात करिअर करू इच्छिणाऱ्या तरुण-तरुणींसाठी एनडीए ही देशातील अत्यंत मानाची परीक्षा मानली जाते.
पात्रता आणि वयाची अट : ही परीक्षा सध्या 12 वीत शिकत असलेले (Appearing) किंवा 12 वी पास झालेले विद्यार्थी देऊ शकतात. यासाठी उमेदवाराचे वय 16.5 ते 19.5 वर्षांच्या दरम्यान असणे अनिवार्य आहे.
दोन टप्प्यांत परीक्षा : या परीक्षेत एकूण दोन मुख्य टप्पे असतात. पहिला टप्पा 900 गुणांची लेखी परीक्षा (Written Exam) आणि दुसरा टप्पा 900 गुणांची अत्यंत खडतर एसएसबी मुलाखत (SSB Interview) असा असतो.
अधिकारी पदावर निवड : या 1800 गुणांच्या प्रक्रियेतून उत्तीर्ण होणाऱ्या विद्यार्थ्यांची भारतीय संरक्षण दलामध्ये थेट वर्ग-1 चे अधिकारी (Officer Cadre) म्हणून निवड होते. यामध्ये आर्मी (Lieutenant), नेव्ही (Sub-Lieutenant) आणि एअरफोर्स (Flying Officer) या पदांचा समावेश आहे.
National Defence Academy Exam Date : 13 सप्टेंबर रोजी होणार परीक्षा, मुदतवाढीकडे लक्ष
केंद्रीय लोकसेवा आयोगाच्या अधिकृत कॅलेंडरनुसार, ही परीक्षा वर्षभरातून दोन वेळा (एप्रिल आणि सप्टेंबर) घेतली जाते. भारतातून साधारण 5 ते 6 लाख विद्यार्थी प्रत्येक परीक्षेला अर्ज करतात. या वेळची राष्ट्रीय पातळीवरील लेखी परीक्षा 13 सप्टेंबर 2026 रोजी देशभरातील विविध केंद्रांवर एकाच दिवशी घेतली जाणार आहे. '
कंबाइंड डिफेन्स सर्व्हिसेस' (CDS 2) ची देखील अंतिम तारीख आहे. आता विद्यार्थ्यांचे नुकसान टाळण्यासाठी यूपीएससी मुदतवाढ देणार का, याकडे सर्वांचे लक्ष लागले आहे.
Before You Go
Zero Hour : नसरापुरातील प्रकरणात आरोपीला फाशीची शिक्षा, निकालानं गुन्हेगारांवर वचक बसेल असं वाटतं का?
महत्त्वाच्या बातम्या
