UPSC/MPSC | यूपीएससीच्या परीक्षांचं नवं वेळापत्रक जाहीर; एमपीएससीही धडा घेणार?

केंद्रीय लोकसेवा आयोगाकडून घेण्यात येणाऱ्या विविध परीक्षा आणि मुलाखतीच्या तारखा ठरवण्यासंदर्भात आज बैठक झाली. या बैठकीत पूर्व आणि मुख्य परीक्षेची तारीख निश्चित करण्यात आली.

नवी दिल्ली : कोरोना संसर्गामुळे केंद्रीय लोकसेवा आयोगाकडून यूपीएससी प्रिलिम्स (पूर्व परीक्षा) आणि मेन (मुख्य) परीक्षा पुढे ढकलण्याचा निर्णय घेण्यात आला होता. अखेर आयोगानं परीक्षेची तारीख जाहीर केली आहे. आयोगाकडून घेण्यात येणाऱ्या विविध परीक्षा आणि मुलाखतीच्या तारखा ठरवण्यासंदर्भात आज बैठक झाली. या बैठकीत पूर्व आणि मुख्य परीक्षेची तारीख निश्चित करण्यात आली.

कोरोना संकटामुळे स्थगित झालेल्या यूपीएससीच्या विविध परीक्षांसाठीचं नवं वेळापत्रक आयोगानं जाहीर केलं आहे. 2020 वर्षात होणाऱ्या परीक्षांसाठी हे नवं वेळापत्रक यूपीएससीच्या वेबसाईटवर जाहीर करण्यात आलंय. सिव्हिल सर्व्हिसेस पूर्व परीक्षा जी आधी 31 मे रोजी नियोजित होती, ती लॉकडाऊनमुळे स्थगित करण्यात आली होती. नव्या वेळापत्रकानुसार सिव्हिल सर्व्हिसेस पूर्व परीक्षा 4 ऑक्टोबर रोजी तर मुख्य परीक्षा 8 जानेवारी 2021 रोजी होणार आहे. शिवाय 2019 च्या परीक्षेमध्ये मुलाखतीचा टप्पा कोरोनामुळे अपूर्ण राहिला होता. ज्या उमेदवारांच्या मुलाखती पूर्ण होऊ शकल्या नव्हत्या, त्या 20 जुलैपासून सुरु होणार आहेत. त्याबाबत उमेदवारांना वैयक्तिक पत्राद्वारे तारीख कळवली जाईल. एनडीएची परीक्षा 10 जून रोजी होणार आहे.

असं असणार आहे यूपीएससीच्या परीचं वेळापत्रक

यूपीएससीच्या वर्षभराच्या परीक्षांचं वेळापत्रक आधीच जाहीर होत असतं. यावेळी कोरोनाच्या अभूतपूर्व संकटामुळे परीक्षांचं वेळापत्रक विस्कळीत झालं होतं. पण आज आयोगानं हे नवं वेळापत्रक जाहीर केलेलं आहे. अर्थात परिस्थिती अगदीच हाताबाहेर गेली तर या परीक्षांच्या तारखेत थोडाफार बदल होऊ शकतो असंही आयोगानं म्हटलं आहे. महाराष्ट्रात एमपीएससीच्या काही परीक्षांच्या निकालाबद्दल, तारखेबद्दल अजून संभ्रम आहे. त्यामुळे आता यूपीएससीनं विद्यार्थ्यांचा गोंधळ कमी केल्यानंतर एमपीएसीकडूनही वेळीच निकाल आणि नव्या तारखा जाहीर करण्याची अपेक्षा व्यक्त केली जातेय.

MPSC Exam Update | एमपीएससीची परीक्षा तात्पुरती स्थगित, परीक्षेसाठी वयोमर्यादा वाढण्याबाबत चर्चा होणार