Taj Mahal asked to Pay Property Tax : जगातील आश्चर्यांपैकी एक असलेला ताज महाल (Taj Mahal) पुन्हा एकदा चर्चेत आला आहे. पण यावेळी कारण आहे ते कर थकबाकीचं. ताज महालाला कर थकबाकीची नोटीस मिळाली आहे. जागतिक वारसा म्हणून ओळखल्या जाणाऱ्या या वास्तूला पाणी (Water tax Taj Mahal) आणि मालमत्ता कराच्या (Property Tax of Taj Mahal) नोटिसा पाठवण्यात आल्या आहेत. एएसआयचे अधीक्षक पुरातत्वशास्त्रज्ञ (आग्रा सर्कल) राज कुमार पटेल यांनी ही माहिती दिली आहे. वृत्तसंस्था एएनआयच्या बातमीनुसार, पाण्याशी संबंधित कर (Water tax Taj Mahal News) सुमारे 1 कोटी रुपये आहे आणि मालमत्तेशी संबंधित कर (Property Tax of Taj Mahal) 1.40 लाख रुपये आहे. ही थकबाकी 2021-22 आणि 2022-23 या आर्थिक वर्षाची आहे.
15 दिवसांची नोटीस, अन्यथा ताज महाल जप्त होणार
मीडिया रिपोर्टनुसार, आग्रा महानगरपालिकेनं (Agra Municipal Corporation) ताज महालसाठी (Taj Mahal) पाठवलेल्या थकबाकीच्या नोटीसमध्ये म्हटलं आहे की, जर 15 दिवसांत थकीत कर जमा केला नाही तर ताज महाल जप्त केला जाईल. भारतीय पुरातत्व सर्वेक्षणाचे एएसआय राज कुमार पटेल (ASI) म्हणतात की, स्मारकांवर मालमत्ता कर (Property Tax) लागू होत नाही. ताज महालाचा कोणताही व्यावसायिक वापर नसल्यामुळे पाण्यावर कर भरण्यास आम्ही जबाबदार नाही. हिरवळ टिकवून ठेवण्याच्या उद्देशानं येथे पाण्याचा वापर केला जातो.
दरम्यान, ताज महालासाठी पहिल्यांदाच अशी नोटीस (Taj Mahal Tax Arrears) आली आहे. ASI अधिकाऱ्यांनी सांगितलं की, ताज महालाला 1920 मध्ये संरक्षित स्मारक घोषित करण्यात आलं होतं आणि ब्रिटिश राजवटीतही या स्मारकावर कोणताही कर किंवा पाणी कर लावला गेला नव्हता.
संगमरवरी ताज महालाचा इतिहास
जगातील सात आश्चर्यापैकी ताज महाल एक समजला जातो. पांढऱ्या शुभ्र संगमरवरानं बांधलेली यमुनेच्या किनाऱ्यावर वसलेली ही वास्तू पाहताच क्षणी मनात घर करते. देश-विदेशातून अनेक पर्यटक ताज महालाचं सौंदर्य पाहण्यासाठी येत असतात. ताज महालाला प्रेमाचं प्रतिक मानलं जातं. मुघल बादशाह शाहजहान यांचं आपली पत्नी मुमताजवर प्रेम होतं. तिच्या निधनानंतर तिची आठवण म्हणून शाहजहान यांनी ताज महाल बांधला. ही संगमरवरी इमारत उभारण्यास तब्बल 21 वर्षांचा अवधी लागला होता.