'विरोधी पक्षनेता रबर स्टॅम्प नाही, तुम्हाला तुमचा उमेदवार निवडायचा आहे..' CBI संचालक निवडीवर राहुल गांधींची असहमती; मोदींच्या निवासस्थानी दीड तास बैठक अन् महाराष्ट्र कनेक्शन

बैठकीतून बाहेर पडल्यानंतर, राहुल यांनी सोशल मीडियावर एक पत्र शेअर करून आपल्या असंतोषाची कारणे स्पष्ट केली. सध्याचे सीबीआय संचालक प्रवीण सूद यांचा कार्यकाळ 24 मे रोजी संपणार आहे.

Rahul Gandhi on CBI Director

Source : ABP Majha

Rahul Gandhi: पीएम मोदी यांच्या निवासस्थानी झालेल्या बैठकीत राहुल गांधी यांनी नवीन सीबीआय संचालकांच्या निवडीवर आपली असहमती दर्शवली. निवडीसाठी सादर केलेल्या 69 उमेदवारांचा तपशील देण्यात आला नाही, असा आरोप त्यांनी केला. राहुल गांधी म्हणाले, "सीबीआय संचालक निवड प्रक्रियेला केवळ एक औपचारिकता बनवण्यात आले आहे. या पक्षपाती कार्यात सहभागी होऊन मी माझे घटनात्मक कर्तव्य टाळू शकत नाही. तथापि, मी माझा तीव्र असंतोष व्यक्त करतो."

भारताचे सरन्यायाधीश (CJI) सूर्यकांत आणि राहुल गांधी पंतप्रधानांच्या निवासस्थान, 7, लोक कल्याण मार्ग येथे झालेल्या बैठकीला उपस्थित होते. ही बैठक सुमारे एक तास चालली. बैठकीतून बाहेर पडल्यानंतर, राहुल यांनी सोशल मीडियावर एक पत्र शेअर करून आपल्या असंतोषाची कारणे स्पष्ट केली. सध्याचे सीबीआय संचालक प्रवीण सूद यांचा कार्यकाळ 24 मे रोजी संपणार आहे.

तुम्हाला तुमचा उमेदवार निवडायचा आहे 

तुमच्या सरकारने सीबीआयचा वारंवार गैरवापर केला आहे. ही भारताची प्रमुख तपास यंत्रणा आहे, पण तुम्ही तिचा वापर राजकीय विरोधक, पत्रकार आणि टीकाकारांना लक्ष्य करण्यासाठी केला. संस्थांवर होणारा असा ताबा रोखण्यासाठीच विरोधी पक्षनेत्याचा निवड समितीत समावेश असतो. खेदाची गोष्ट म्हणजे, तुम्ही मला या प्रक्रियेत अशी कोणतीही भूमिका दिलेली नाही, ज्यामुळे निष्पक्ष निवड प्रक्रिया सुनिश्चित होईल. शॉर्टलिस्ट केलेल्या उमेदवारांचे स्व-मूल्यांकन अहवाल किंवा 360-डिग्री अहवाल उपलब्ध करून दिलेले नाहीत. मला हे अहवाल पाहण्यास स्पष्टपणे नकार देण्यात आला.

कोणत्याही कायदेशीर आधाराशिवाय जाणीवपूर्वक माहिती देण्यास नकार देणे ही निवड प्रक्रियेची थट्टा आहे. यावरून हे स्पष्टपणे दिसून येते की केवळ तुमचा पूर्वनिश्चित उमेदवारच निवडला गेला पाहिजे. मागील दोन बैठकांमध्ये (5 मे, 2025 आणि 21 ऑक्टोबर, 2025), मी पंतप्रधानांना निष्पक्ष आणि पारदर्शक प्रक्रियेसाठी उपाययोजना सुचवणारे पत्र लिहिले होते. आजपर्यंत, मला त्या पत्राला कोणताही प्रतिसाद मिळालेला नाही.

सीबीआय संचालकाची निवड प्रक्रिया काय आहे?

सीबीआय संचालकाची निवड प्रक्रिया पंतप्रधान, सर्वोच्च न्यायालयाचे सरन्यायाधीश आणि लोकसभेतील विरोधी पक्षनेते यांच्या बैठकीत अंतिम केली जाते. यानंतर, कार्मिक आणि प्रशिक्षण विभाग (DOPT) गृह मंत्रालयाकडून सूचना मिळाल्यानंतर आदेश जारी करतो.

कार्यकाळ दोन वर्षांपर्यंत मर्यादित का असतो?

2019 मधील सर्वोच्च न्यायालयाच्या निर्देशानुसार, ज्या वरिष्ठ अधिकाऱ्यांच्या सेवानिवृत्तीला सहा महिन्यांपेक्षा कमी कालावधी शिल्लक आहे, त्यांचा सीबीआय संचालक पदासाठी विचार केला जाऊ शकत नाही. न्यायालयाने असेही म्हटले आहे की संचालकाचा कार्यकाळ दोन वर्षांपेक्षा कमी असू शकत नाही आणि त्यांची बदली केवळ नियुक्ती समितीच्या संमतीनेच केली जाऊ शकते. केंद्रीय दक्षता आयोग अधिनियम, 2003 नुसार सीबीआय संचालकाचा कार्यकाळ दोन वर्षांचा निश्चित करण्यात आला आहे. तथापि, परिस्थितीनुसार, हा कार्यकाळ एका वेळी एका वर्षाने, जास्तीत जास्त पाच वर्षांपर्यंत वाढवला जाऊ शकतो.

सध्याचे सीबीआय संचालक प्रवीण सूद यांनी 25 मे 2023 रोजी सीबीआय प्रमुखपदाचा कार्यभार स्वीकारला. ते गेल्या वर्षी सेवानिवृत्त होणार होते, परंतु त्यांचा कार्यकाळ एका वर्षासाठी वाढवण्यात आला. सूद हे कर्नाटक केडरचे 1986 बॅचचे आयपीएस अधिकारी आहेत.

सदानंद दाते यांच्या नावाची विशेष चर्चा

दरम्यान, महाराष्ट्राचे पोलीस महासंचालक सदानंद दाते यांच्या नावाची विशेष चर्चा असल्याची माहिती आहे. सदानंद दाते हे हे 26/11 मुंबई दहशतवादी हल्ल्यादरम्यान दाखवलेल्या धाडसासाठी विशेष ओळखले जातात. त्यांनी NIA प्रमुख म्हणूनही काम केले असून सध्या ते पोलीस महासंचालक आहेत. त्यांच्या नावाची चर्चेत विशेष दखल घेतली जात आहे. दाते यांच्यासह पराग जैन, शत्रूजित सिंह कपूर यांच्याही नावाची चर्चा आहे. 

इतर महत्वाच्या बातम्या