सुप्रीम कोर्टात आता ऑनलाईन याचिका, पंतप्रधानांच्या हस्ते सुविधेचं लोकार्पण

नवी दिल्ली : सुप्रीम कोर्टात आता ऑनलाईन याचिका दाखल करता येणार आहे. सुप्रीम कोर्टात इंटरनेटच्या माध्यमातून ऑनलाईन याचिका आणि कागदपत्र दाखल करण्याच्या सुविधेचं आज पंतप्रधान मोदींच्या हस्ते लोकार्पण करण्यात आलं आहे. या कार्यक्रमावेळी सरन्यायाधीश जेएस खेहर यांच्यासोबतच सुप्रीम कोर्टातील अनेक न्यायाधीश उपस्थित होते. आता देश बदलू लागला आहे, सुट्टी असूनही आपण काम करत आहोत. सुप्रीम कोर्टानं या सुविधेच्या माध्यमातून आधुनिकतेच्या दिशेनं एक पाऊल टाकलं आहे. सरन्यायाधीश आणि सर्व न्यायाधीशांना मी याप्रसंगी शुभेच्छा देतो, असं पंतप्रधान मोदींनी लोकार्पण सोहळ्यवेळी म्हटलं आहे. सॉफ्टवेअरमध्ये आव्हान नाही आहे, हार्डवेअरमध्येही नाही, मात्र यासाठी आपल्याला समाजाची मानसिकता बनवावी लागेल. एखादी चेन थांबली तर संपूर्ण प्रक्रिया थांबते, असं म्हणत मोदींनी सर्वांना एकत्र येऊन काम करण्याचं आवाहन केलं आहे. तसंच सीजेआयसोबतच्या भेटीत त्यांनी प्रलंबित खटल्यांबद्दल चिंता व्यक्त केल्याचंही पंतप्रधान मोदींनी सांगितलं आहे. एक A4 साईझचा कागद तयार करण्यासाठी 10 लीटर पाणी खर्च होतं. मात्र ऑनलाईन सुविधेमुळे पेपरलेस कामकाज करण्यासाठी मदत होईल, सोबतच कामामध्ये गतीही येईल असं पंतप्रधान मोदी म्हणाले आहेत.