PM Modi In Office : 2014 पासून गेल्या 9 वर्षात पंतप्रधान मोदी यांनी किती दिवस सुट्टी घेतली? RTI मध्ये धक्कादायक माहिती उघड
PM Modi Leave : आरटीआय कार्यकर्त्याने पंतप्रधान कार्यालयाकडे विचारणा केली होती की, 2014 मध्ये पंतप्रधान मोदी यांनी पदभार सांभाळल्यानंतर आतापर्यंत किती दिवस सुट्टी घेतली आहे.
नवी दिल्ली : पंतप्रधान नरेंद्र मोदी (PM Narendra Modi) यांनी नऊ वर्षांचा कार्यकाळ पूर्ण केला आहे. पंतप्रधान मोदी यांना त्यांच्या काम करण्याच्या पद्धतीमुळे ओळखलं जातं. अशा वेळी सर्वसामान्यांना पडणारा प्रश्न म्हणजे पंतप्रधान किती दिवस काम करतात आणि त्यांना किती दिवस सुट्टी मिळते. दरम्यान, आता माहिती अधिकारामुळे पंतप्रधानांनाबाबतची महत्त्वाची माहिती समोर आली आहे. गेल्या नऊ वर्षात पंतप्रधान नरेंद्र मोदी यांनी किती दिवस सुट्टी घेतली याबाबत धक्कादायक माहिती समोर आली आहे.
9 वर्षात पंतप्रधान मोदी यांनी किती दिवस सुट्टी घेतली?
आरटीआय कार्यकर्त्याने पंतप्रधान कार्यालयाकडे विचारणा केली होती की, 2014 मध्ये पंतप्रधान मोदी यांनी पदभार सांभाळल्यानंतर आतापर्यंत किती दिवस सुट्टी घेतली आहे. यानंतर समोर आलेली धक्कादायक बाब म्हणजे 2014 मध्ये पंतप्रधानपदी विराजमान झाल्यापासून नरेंद्र मोदी यांनी एकही सुट्टी घेतलेली नाही. इतकंच नाही तर गेल्या 9 वर्षात त्यांनी देश-विदेशातील 3000 हून अधिक कार्यक्रमांमध्ये सहभाग घेतला आहे. पुण्यातील आयटीआय कार्यकर्ते प्रफुल्ल शारदा यांना आरटीआयद्वारे ही माहिती मिळाली.
पंतप्रधानांनी एकही दिवस सुट्टी घेतलेली नाही
आयटीआय कार्यकर्ते प्रफुल्ल शारदा यांनी पंतप्रधान कार्यालयाकडून (PMO) आरटीआयद्वारे माहिती मागवली होती की, 2014 मध्ये पंतप्रधान नरेंद्र मोदी यांनी पदभार स्वीकारल्यापासून किती दिवस कार्यालयात हजेरी लावली. यावर पीएमओकडून दिलेल्या माहितीनुसार, पंतप्रधान नरेंद्र मोदी सतत कामावर असतात. पदभार स्वीकारल्यापासून पंतप्रधान नरेंद्र मोदी यांनी एकही दिवस सुट्टी घेतलेली नाही. पीएमओने 31 जुलै 2023 रोजी हे उत्तर दिलं आहे.
यापूर्वीच्या आरटीआयमध्ये समोर आलेली माहिती
यापूर्वी 2015 मध्येही पंतप्रधान कार्यालयाकडून पंतप्रधान मोदी यांच्या उपस्थितीबाबत आरटीआयद्वारे उत्तर मागवण्यात आलं होतं. तेव्हाही पंतप्रधान मोदी यांनी सुट्टी घेतली नसल्याची माहिती देण्यात आली होती. मात्र, हा फक्त पहिल्या वर्षीचा आकडा होता. नुकत्याच समोर आलेल्या आरटीआयमध्ये पंतप्रधान मोदी यांच्या 9 वर्षांच्या कार्यकाळाची माहिती समोर आली आहे.
अनुराग ठाकूर यांनी 20 वर्षे रजा न घेतल्याचं सांगितलं होतं
केंद्रीय माहिती आणि प्रसारण मंत्री अनुराग ठाकूर यांनी 2021 मध्ये पंतप्रधान नरेंद्र मोदी यांच्या सत्तेत 20 वर्षे पूर्ण केल्याबद्दल म्हणजेच गुजरातचे मुख्यमंत्री आणि पंतप्रधान म्हणून कार्यकाळ पूर्ण केल्याबद्दल अभिनंदन करताना, मोदींनी 20 वर्षांत एकही रजा घेतली नसल्याचं सांगितलं होतं. पंतप्रधान मोदी 24 तास देशासाठी काम करतात, असंही त्यांनी सांगितलं होतं.
महत्त्वाच्या बातम्या
