Petrol-Diesel Price Today on 22 April 2022 : भारतीय तेल कंपन्यांनी आज शुक्रवारचे पेट्रोल-डिझेलचे दर (Petrol-Diesel Prices) जारी केले आहेत. आजही दिल्ली-मुंबईसह देशभरातील पेट्रोल-डिझेलच्या किमतींमध्ये कोणताही बदल झालेला नाही. गेल्या काही दिवसांपासून देशातील पेट्रोल-डिझेल दर स्थिर आहेत. जवळपास दोन आठवड्यांपासून पेट्रोल-डिझेलच्या किमतींमध्ये कोणताही बदल करण्यात आलेला नाही. अशातच देशात सध्या पेट्रोल-डिझेलच्या किमतींनी उच्चांक गाठला आहे.
भारतीय तेल कंपन्यांनी 6 एप्रिलपासून पेट्रोल आणि डिझेलच्या दरांत कोणतीही दरवाढ केलेली नाही. पेट्रोलियम मार्केटिंग कंपनी इंडियन ऑइल कॉर्पोरेशन (IOCL) ने जारी केलेल्या नव्या दरांनुसार, देशाच्या आर्थिक राजधानीचं शहर असणाऱ्या मुंबईत पेट्रोलचे दर सध्या 120.51 रुपये प्रति लिटरवर स्थिर आहेत. तर डिझेल 104.77 रुपये प्रति लिटरवर स्थिर आहेत. तर देशाच्या राजधानीचं शहर असणाऱ्या दिल्लीमध्ये पेट्रोल 105.41 रुपये प्रति लिटरनं विकलं जात आहे. तर डिझेल 96.67 रुपये प्रति लिटरनं विकलं जातं आहे.
आंतरराष्ट्रीय बाजारात क्रूड ऑईलच्या दरांत वाढ
देशातील मोठ्या तेल कंपन्यांनी पंधरवड्यापूर्वी 6 एप्रिल 2022 ला शेवटच्या वेळी पेट्रोल आणि डिझेलच्या दरात 80 पैशांनी वाढ केली होती. त्यानंतर देशातील पेट्रोल-डिझेलचे दर स्थिर आहेत. यापूर्वी 22 मार्च ते 6 एप्रिलपर्यंत पेट्रोल-डिझेलच्या दरांत जवळपास 10 रुपये प्रति लिटरची वाढ झाली होती. एकीकडे आंतरराष्ट्रीय बाजारात क्रूड ऑईलच्या किमतींमध्ये मोठी वाढ झाल्याचं पाहायला मिळत आहे. तर दुसरीकडे मात्र देशातील पेट्रोल-डिझेलचे दर स्थिर आहेत.
आंतरराष्ट्रीय बाजारात ब्रेंट क्रूडचे दर पुन्हा एकदा 110 डॉलर प्रति बॅरल पार पोहोचलं आहे. त्यामुळे कंपन्यांवर पुन्हा पेट्रोल आणि डिझेलच्या दरात वाढ करण्याचा दबाव आहे. मात्र, जवळपास दोन आठवड्यांपासून कंपन्यांनी तेलाच्या दरात कोणताही बदल केलेला नाही.
इंडियन ऑईलनं जारी केलेल्या किमतींनुसार, पोर्टब्लेयरमध्ये पेट्रोलची किंमत 91.45 रुपये प्रति लिटर आहे. तर महाराष्ट्रातील परभणीमध्ये पेट्रोल 123.47 रुपये प्रति लिटरनं विकलं जात आहे. देशाच्या राजधानीचं शहर असणाऱ्या दिल्लीमध्ये पेट्रोलची किंमत 105.41 रुपये आहे. तेल कंपन्यांनी 22 मार्च नंतर सलग 14 वेळा दरवाढ केली होती. गेल्या काही दिवसांपासून देशात पेट्रोल-डिझेलच्या दरवाढीला ब्रेक लागला आहे. त्यामुळे पेट्रोल आणि डिझेल 10.20 रुपयांनी महाग झालं होतं. सध्या आंतरराष्ट्रीय बाजारात कच्च्या तेलाच्या किमतींमध्ये पुन्हा एकदा वाढ झाल्याचं पाहायला मिळत आहे. त्यामुळे देशात पुन्हा एकदा पेट्रोल-डिझेलच्या दरवाढीचं सत्र सुरु होण्याची शक्यता वर्तवण्यात येत आहे.
देशातील महत्त्वाच्या शहरांचे दर काय?
| शहरं | पेट्रोलच्या किमती (प्रति लिटर) | डिझेलच्या किमती (प्रति लिटर) |
| मुंबई | 120.51 | 104.77 |
| दिल्ली | 105.41 | 96.67 |
| चेन्नई | 110.85 | 100.94 |
| कोलकाता | 115.12 | 99.83 |
| हैद्राबाद | 119.49 | 105.49 |
| कोलकाता | 115.12 | 96.83 |
| बंगळुरू | 111.09 | 94.79 |
महाराष्ट्रातील महत्त्वाच्या जिल्ह्यांतील पेट्रोल-डिझेलचे दर
| शहरं | पेट्रोलचे दर (प्रति लिटर) | डिझेलचे दर (प्रति लिटर) |
| मुंबई | 120.51 रुपये | 104.77 रुपये |
| पुणे | 120.60 रुपये | 103.28 रुपये |
| नाशिक | 120.02 रुपये | 102.73 रुपये |
| परभणी | 123.51 रुपये | 106.08 रुपये |
| औरंगाबाद | 120.63 रुपये | 103.32 रुपये |
| कोल्हापूर | 120.64 रुपये | 103.35 रुपये |
| नागपूर | 121.03 रुपये | 103.73 रुपये |
दररोज बदलतात पेट्रोल-डिझेलच्या किमती
आंतरराष्ट्रीय बाजारातील कच्च्या तेलाच्या किमतीच्या आधारे पेट्रोल आणि डिझेलची किंमत दररोज बदलली जाते. तेल विपणन कंपन्या दररोज पेट्रोल आणि डिझेलच्या किमतींचा आढावा घेऊन दर निश्चित करतात. इंडियन ऑइल, भारत पेट्रोलियम आणि हिंदुस्थान पेट्रोलियम तेल कंपन्या दररोज सकाळी वेगवेगळ्या शहरांच्या पेट्रोल आणि डिझेलच्या किमतींची माहिती अपडेट करतात.
पेट्रोल आणि डिझेलचे दर (Petrol Diesel Price ) कुठे आणि कसे पाहाल?
इंडियन ऑईलचं IndianOil ONE Mobile App तुमच्या मोबाईलवर डाऊनलोड करुन तुम्ही तुमच्या जवळच्या इंडियन ऑईल पेट्रोल पंपावरील इंधनाचे दर जाणून घेऊ शकता.
इंडियन ऑईलच्या वेबसाईटवर https://iocl.com/Products/PetrolDieselPrices.aspx पेट्रोल डिझेलचे दर (Petrol Diesel Price) सोप्या पद्धतीने पाहता येतील.
पेट्रोल आणि डिझेलच्या किंमती ( Petrol Diesel Price ) एसएमएसद्वारे देखील कळू शकतात. इंडियन ऑईलच्या वेबसाईटने दिलेल्या माहितीनुसार, RSP आणि स्पेस देऊन आपल्या शहराचा कोड टाकून 92249992249 या क्रमांकावर एसएमएस करायचा आहे. हा कोड इंडियन ऑईलच्या वेबसाईटवर मिळेल. (शहरांचे कोड इंडियन ऑईलच्या वेबसाईटवर देण्यात आले आहेत).