730 दिवसांची पगारी रजा द्या, रेल्वे अधिकाऱ्याचा अर्ज व्हायरल

सोशल मीडियावर विशेत: ट्विटरवर हनीफ गुल यांच्या सुट्टीचा अर्ज चर्चेचा विषय बनला आहे.

(प्रातिनिधिक फोटो)

इस्लामाबाद : मंत्री आणि अधिकाऱ्यांमध्ये कामकाजापासून विचारांपर्यंतचे वाद काही नवे नाहीत. हे फक्त भारतातच नाही तर जगातील इतर देशांमध्येही दिसतं. शेजारी राष्ट्र पाकिस्तानमधील असाच एक प्रकार समोर आला आहे. तिथल्या एका रेल्वे अधिकाऱ्याने मंत्रालयाच्या सचिवाला पत्र लिहून सुट्टीसाठी अर्ज केला आहे. मजेशीर बाब म्हणजे अधिकाऱ्याने एक-दोन आठवडे नाही तर तब्बल 730 दिवसांची रजा मागितली आहे. सर्वात रंजक गोष्ट म्हणजे सुट्टीचं कारण, जे सोशल मीडियावर चर्चेचा विषय बनलं आहे. मोहम्मद हनीफ गुल नावाच्या या अधिकाऱ्याने 730 दिवसांच्या रजेसाठी अर्ज केला आहे. नवे रेल्वे मंत्री शेख राशिद अहमद यांच्यासोबत काम करणं अशक्य आहे, कारण त्याचं वर्तन योग्य नाही, असं त्यांनी अर्जात म्हटलं आहे.

Senior Pakistan Railways official applies for 730 days leave - says cannot work with new railways minister saying he is "extremely non-professional and ill-mannered" pic.twitter.com/YqziNFmkir

— omar r quraishi (@omar_quraishi) August 26, 2018

हनीफ गुल हे पाकिस्तान रेल्वेमध्ये ग्रेड-20 चे अधिकारी आहेत. हनीफ रेल्वेमध्ये मुख्य व्यावसायिक व्यवस्थापक पदावर कार्यरत आहेत. अर्जात त्यांनी लिहिलं आहे की, "नव्या मंत्र्यांची वृत्ती अव्यावसायिक असून, त्याचं वर्तन योग्य नाही. पाकिस्तानच्या नागरी सेवेतील एक सन्मानित सदस्य म्हणून मला त्यांच्या हाताखाली काम करणं शक्य नाही. त्यामुळे कृपया मला 730 दिवसांची रजा द्या." दरम्यान, निवडणुकांनंतर राशिद अहमद यांनी 20 ऑगस्ट 2018 रोजी रेल्वेमंत्रीपदाची जबाबदारी स्वीकारली होती. सोशल मीडियावर विशेत: ट्विटरवर हनीफ गुल यांच्या सुट्टीचा अर्ज चर्चेचा विषय बनला आहे. पाकिस्तानात अनेकांनी त्यांचा हा अर्ज शेअर केला आहे. तर एवढ्या दिवसांच्या सुट्टीसाठी काहींनी हनीफ यांच्यावर टीकाही केली आहे.