निर्भयाच्या दोषींच्या फाशीवर सुप्रीम कोर्टाची मोहोर; सुधारित याचिका फेटाळली

निर्भयाच्या दोषींच्या फाशीवर सुप्रीम कोर्टाने मोहोर लावली असून प्रकरणातील दोन दोषींची सुधारित याचिका फेटाळून लावली आहे.

नवी दिल्ली : निर्भया बलात्कार प्रकरणी आरोपींच्या फाशीवर अखेर मोहोर लावण्यात आली. सुप्रीम कोर्टाने आरोपी विनय आणि मुकेश यांच्याकडून दाखल करण्यात आलेल्या सुधारित याचेका फेटाळली आहे. त्यामुळे निर्भयाच्या सर्व दोषींच्या फाशीचा मार्ग मोकळा झाला आहे. सर्व आरोपींना 22 जानेवारीला सकाळी 7 वाजता तिहार जेलमध्ये फाशी देण्यात येणार आहे. चार दोषींपैकी दोन दोषीनं सुप्रीम कोर्टात सुधारित (क्युरेटिव्ह) याचिका दाखल केली होती. सुधारित याचिकेच्या माध्यमातून दोषींनी फाशीच्या शिक्षेला स्थगिती देण्याची मागणी केली होती. याआधी 7 जानेवारीला दिल्लीतल्या पटियाला हाऊस न्यायालयानं निर्भया प्रकरणातील सर्व आरोपींच्या फाशीची तारिख निश्चित केली असून निर्भयाच्या चारही दोषींच्या डेथ वॉरंटला मंजूरी दिली होती.

कोणत्या आधारावर दाखल केली होती सुधारित (क्युरेटिव्ह) याचिका?

दोषींमार्फत दाखल करण्यात आलेल्या याचिकेमध्ये सांगण्यात आलं होतं की, याचिकाकर्त्यांची सामाजिक-आर्थिक परिस्थिती, त्यांच्या आजारी आई-वडिलांसोबत जेलमधील त्यांची चांगली वागणूक आणि त्यांच्या सुधारणेच्या संभावनेतील आधारांवर पर्याप्त विचार करण्यात आला आहे. ज्या कारणामुळे त्यांच्यासोबत न्याय झालेला नाही. त्याला आणि इतरांना शिक्षा देण्याबाबत न्यायालयाने आपला निर्णय देताना सांगितलं की, या प्रकरणात 'समाजाचं सामूहिक अंतःकरण' आणि 'जनतेचं मत' आधार बनलं आहे.

16 डिसेंबत 2012 रोजी दिल्लीमध्ये निर्भयासोबत बलात्कार करून तिची हत्या करण्यात आली होती. सदर प्रकरणी चारही दोषींच्या फाशीच्या शिक्षेची तारिख दिल्लीतील पटियाला हाऊस कोर्टाने निश्चित केली होती.

काय आहे निर्भया गँगरेप प्रकरण?

- सात वर्षांपूर्वी म्हणजेच 16 डिसेंबर 2012 रोजी दिल्लीत 23 वर्षीय पॅरामेडिकल विद्यार्थिनीवर सामूहिक बलात्कार झाला होता.
- सिनेमा पाहून आल्यानंतर मित्रासोबत खासगी बसमधून मुनिरकाहून द्वारकाला जात होती. बसमध्ये त्या दोघांशिवाय सहा जण होते.
- त्यांनी निर्भयासोबत छेडछाड करायला सुरुवात केली. विरोध केल्याने आरोपींनी तिच्या मित्राला एवढी मारहाण केली की तो बेशुद्ध झाला.
- यानंतर एकटीच असलेल्या निर्भयावर सहा नराधमांनी धावत्या बसमध्ये सामूहिक बलात्कार केला. एवढंच नाही तर अनन्वित अत्याचार केले.
- तरुणीला गंभीर जखमी केल्यानंतर नराधमांनी दोघांना दक्षिण दिल्लीच्या महिपालपूरजवळच्या वसंत विहार परिसरात धावत्या बसमधूनच रस्त्यावर फेकलं.
- दिल्लीतील सफदरजंग रुग्णालयात तिच्यावर उपचार सुरु होते. मात्र प्रकृतीत सुधारणा न झाल्याने तिला सिंगापूरच्या माऊंट एलिझाबेथ रुग्णालयात दाखल करण्यात आलं.
- मात्र 29 डिसेंबर रोजी उपचारांदरम्यान माऊंट एलिझाबेथ रुग्णालयातच तिने अखेरचा श्वास घेतला.

दरम्यान, पवन गुप्ता, मुकेश सिंह, अक्षय ठाकूर आणि विनय शर्मा अशी या चार दोषींची नावं आहेत. तर या प्रकरणातील राम सिंह नावाच्या आरोपीने तिहार तुरुंगातच आत्महत्या केली होत. याशिवाय एक आरोपी अल्पवयीन असल्याने, ज्युवेनाईल कोर्टाने त्याला तीन वर्षांची शिक्षा ठोठावत त्याची रवानगी बालसुधारगृहात केली होती. 2015 रोजी त्याची सुटका झाली. त्यानंतर चारही दोषींनी सुप्रीम कोर्टात पुनर्विचार याचिका दाखल केली होती. परंतु, सुप्रीम कोर्टाने यांच्या पुनर्विचार याचिका फेटाळल्या होत्या.

संबंधित बातम्या :