Nagaland Meghalaya Government Formation: आज नागालँड आणि मेघालयला नवे मुख्यमंत्री मिळणार; दोन्ही राज्यांच्या मुख्यमंत्र्यांचा शपथविधी सोहळा

Nagaland, Meghalaya Government Formation: आज नागालँड आणि मेघालयला नवे मुख्यमंत्री मिळणार; दोन्ही राज्यांच्या मुख्यमंत्र्यांचा शपथविधी सोहळा 

Nagaland, Meghalaya Government Formation

Nagaland, Meghalaya Government Formation: भाजप (BJP) ईशान्येतील तिनही राज्यांमध्ये (Nagaland, Meghalaya,Tripura) युतीचं सरकार स्थापन करणार आहे. या राज्यांचे निकाल 2 मार्च रोजी जाहीर झालेत. त्रिपुरा आणि नागालँडमध्ये भाजप आघाडीला बहुमत मिळालं आहे. तर मेघालयात भाजप कोनराड संगमा (Conrad Sangma) यांना पाठिंबा देत आहे.  

मेघालय आणि नागालँडमध्ये मंगळवारी (7 मार्च) शपथविधी होणार आहे. 8 मार्च रोजी त्रिपुरामध्ये नवं सरकार शपथ घेणार आहे. पंतप्रधान नरेंद्र मोदी मंगळवारपासून ईशान्येच्या दोन दिवसांच्या दौऱ्यावर असतील, त्यादरम्यान ते प्रदेशातील तीन राज्यांतील नव्या मुख्यमंत्र्यांच्या शपथविधी सोहळ्याला उपस्थित राहणार आहेत. 

मेघालयमध्ये कोनराड संगमा घेणार मुख्यमंत्री पदाची शपथ 

मेघालयमध्ये कोनराड संगमा पुन्हा एकदा मुख्यमंत्री होणार आहेत. नुकत्याच पार पडलेल्या विधानसभा निवडणुकीत कोनराड संगमा यांच्या एनपीपीनं 26 जागा जिंकल्या. मेघालयमध्ये भारतीय जनता पक्षाला केवळ दोन जागा जिंकता आल्या. भाजपसोबत, मेघालयातील दोन प्रमुख प्रादेशिक पक्ष- युनायटेड डेमोक्रॅटिक पार्टी (UDP) आणि पीपल्स डेमोक्रॅटिक फ्रंट (PDF) यांनी एनपीपीच्या नेतृत्वाखालील युतीला आपला पाठिंबा दिला आहे. त्यामुळे कोनराड संगमा यांच्या नेतृत्वाखालील आघाडी समर्थक आमदारांची संख्या 45 झाली आहे. संगमा म्हणाले की, एनपीपी मित्रपक्ष यूडीपीला आठ आणि 11 आमदारांसह पाठिंबा देईल, तर भाजपला प्रत्येकी दोन आमदार आणि एचएसपीडीपीला प्रत्येकी एक मंत्रीपद मिळेल. आदल्या दिवशी प्रोटेम स्पीकर टिमोथी डी. शिरा यांनी 58 आमदारांना पद आणि गोपनीयतेची शपथ दिली.

नागालँडमध्ये निफियू रिओ घेणार मुख्यमंत्री पदाची शपथ

नागालँडमध्ये भाजप-एनडीपीपीचं सरकार स्थापन होणार आहे. निफियू रिओ पुन्हा एकदा राज्याचे मुख्यमंत्री होणार आहेत. नॅशनलिस्ट डेमोक्रॅटिक प्रोग्रेसिव्ह पार्टी (NDPP) आणि भाजपनं 60-सदस्यीय राज्य विधानसभेसाठी 40-20 जागा वाटपाच्या फॉर्म्युल्यासह निवडणूक लढवली आणि सलग दुसऱ्यांदा सत्तेत परतले. एनडीपीपीनं 25 तर भाजपनं 12 जागा जिंकल्या आहेत. नागालँडमधील नवं सरकार विरोधी विरहित सरकारकडे वाटचाल करत आहे कारण जवळपास सर्वच पक्षांनी NDPP-BJP युतीला बिनशर्त पाठिंबा देऊ केला आहे. राष्ट्रवादी काँग्रेसनं सात, एनपीपीनं पाच आणि नगा पीपल्स फ्रंट, लोजप (रामविलास) आणि आरपीआय (आठवले) प्रत्येकी दोन जागा जिंकल्या आहे. त्याचबरोबर जेडीयूनं एक जागा जिंकली आहे, तर चार अपक्षांनीही विजय मिळवला आहे.

महत्त्वाच्या इतर बातम्या :