कर्नाटकात अवघ्या 48 तासांमध्येच भूकंप, सीएम डीकेंच्या निष्ठावंत शिलेदाराचाच मंत्रीपदाचा तडकाफडकी राजीनामा; 'संकटमोचक' डीके म्हणाले...
Karnataka Politics: मुख्यमंत्री डीके शिवकुमार म्हणाले की, रामलिंगा रेड्डी हे एक वरिष्ठ नेते आणि त्यांचे जवळचे मित्र आहेत आणि ते लवकरच हा प्रश्न सोडवतील.
Karnataka Politics: कर्नाटकचे मंत्री रामलिंगा रेड्डी यांनी डीके शिवकुमार यांच्या मंत्रिमंडळातून मंत्रीपदाची शपथ घेतल्यानंतर अवघ्या दोन दिवसांतच राजीनामा दिल्याने एकच खळबळ उडाली आहे. रेड्डी यांना 'बंगळुरू विकास' (Bengaluru Development) खात्याची अपेक्षा होती, परंतु त्यांना 'पाटबंधारे' (Irrigation) खाते देण्यात आले, जे त्यांना अमान्य होते.मुख्यमंत्री डीके शिवकुमार यांनी त्यांना दोनदा बंगळुरू विकास खाते देण्याचे आश्वासन दिले होते, असा दावा रेड्डी यांनी केला आहे. ते काल (5 जून) गुरुवारी खातेवाटपाच्या बैठकीतूनही बाहेर पडले आणि त्यांनी मुख्यमंत्र्यांना 2023 मध्ये दिलेल्या आश्वासनाची आठवण करून दिली.
रामलिंगा रेड्डी यांची ताठर भूमिका
दरम्यान, आवडीचे (बंगळुरू विकास) खाते दिले तरी ते मंत्रीपद स्वीकारणार नाही, अशी ताठर भूमिका रामलिंगा रेड्डी यांनी घेतली आहे. ते केवळ एक आमदार म्हणून काम करतील आणि काँग्रेस पक्षासोबतच राहतील असे त्यांनी जाहीर केले आहे. दुसरीकडे, या राजीनाम्यावर प्रतिक्रिया देताना मुख्यमंत्री डीके शिवकुमार म्हणाले की, रामलिंगा रेड्डी हे एक वरिष्ठ नेते आणि त्यांचे जवळचे मित्र आहेत आणि ते लवकरच हा प्रश्न सोडवतील.
सरकारमध्ये मतभेद आणि गटबाजी
दरम्यान, भाजप नेते आणि केंद्रीय मंत्री प्रल्हाद जोशी यांनी यावरून काँग्रेसवर टीका केली असून, काँग्रेस सरकारमध्ये मतभेद आणि गटबाजी असल्याचे म्हटले आहे. दुसरीकडे, काँग्रेसचे मंत्री प्रियांक खर्गे यांनी हा वाद कमी करण्याचा प्रयत्न करत, रेड्डी हे पक्ष आणि राज्यासाठी खूप महत्त्वाचे नेते असल्याचे म्हटले आहे.
कोण आहेत रामलिंगा रेड्डी?
73 वर्षीय रामलिंगा रेड्डी हे बंगळुरूमधील काँग्रेसचे एक प्रमुख नेते आहेत. ते बीटीएम लेआउट (BTM Layout) मतदारसंघातून आठ वेळा निवडून आलेले आमदार आहेत. यापूर्वी त्यांनी कर्नाटक सरकारमध्ये परिवहन, मुजराई आणि गृहमंत्री म्हणून काम पाहिले आहे.
इतर महत्वाच्या बातम्या
महत्त्वाच्या बातम्या
