Vikram-1 Launched: भारताची अंतराळ क्षेत्रात ऐतिहासिक झेप, पहिल्या खासगी रॉकेट 'विक्रम-1' चे श्रीहरिकोटावरून यशस्वी उड्डाण

Vikram-1 Launched: हैदराबादमधील स्काईरूट एयरोस्पेस या खासगी स्पेस स्टार्टअप कंपनीचे 'विक्रम-1' हे रॉकेट आपल्या पहिल्या ऑर्बिटल मिशनसाठी यशस्वीरित्या झेपावले आहे.

Vikram-1 Launched

Source : ABP Majha

Vikram-1 Launched: भारताने अंतराळ मोहिमेच्या (Space Mission) क्षेत्रात एक सुवर्ण अक्षरांनी लिहून ठेवावा असा नवा इतिहास रचला आहे. हैदराबादमधील (Hyderabad) स्काईरूट एयरोस्पेस (Skyroot Aerospace) या खासगी स्पेस स्टार्टअप कंपनीचे 'विक्रम-1' (Vikram-1) हे रॉकेट आपल्या पहिल्या ऑर्बिटल मिशनसाठी (Orbital Mission) यशस्वीरित्या झेपावले आहे. हे मिशन केवळ स्काईरूट कंपनीसाठीच नाही, तर संपूर्ण भारताच्या अंतराळ इतिहासासाठी अत्यंत मैलाचा दगड ठरणार आहे. या ऐतिहासिक उड्डाणादरम्यान काही तांत्रिक अडचणींमुळे सुरुवातीला थोडा उशीर झाला होता, मात्र त्यावर मात करत रॉकेटने यशस्वी झेप घेतली.

Vikram-1 Launched: भारत बनला जगातील तिसरा देश

या ऐतिहासिक आणि अभिमानास्पद कामगिरीमुळे भारत आता जगातील अशा निवडक देशांच्या यादीत सामील झाला आहे, जिथे खाजगी कंपन्यांनी आपल्या बळावर रॉकेट लाँच केले आहे. या क्षेत्रात स्वतःच्या बळावर खाजगी रॉकेट लाँच करणारा भारत हा अमेरिका आणि चीननंतर जगातील तिसरा देश ठरला आहे. आतापर्यंत ही गौरवशाली कामगिरी केवळ अमेरिका आणि चीनच्या खाजगी कंपन्यांनाच साध्य करता आली होती.

Vikram-1 Launched: डॉ. विक्रम साराभाई यांच्या सन्मानार्थ 'विक्रम-1' नाव

भारताच्या अंतराळ कार्यक्रमाचे जनक डॉ. विक्रम साराभाई यांच्या सन्मानार्थ या पहिल्या खाजगी रॉकेटचे नाव 'विक्रम-1' असे ठेवण्यात आले आहे. आंध्र प्रदेशातील श्रीहरिकोटा येथील भारतीय अंतरिक्ष संशोधन संस्थेच्या (ISRO) लाँच सेंटरवरून या रॉकेटचे प्रक्षेपण करण्यात आले. सुमारे 7 मजली उंचीचे हे रॉकेट पृथ्वीपासून साधारण 450 किलोमीटर उंचीवर असलेल्या लो अर्थ ऑर्बिटमध्ये जाणार आहे. या संपूर्ण मोहिमेचा मुख्य उद्देश उपग्रहांना त्यांच्या ठरवून दिलेल्या कक्षेत यशस्वीपणे प्रस्थापित करणे हा आहे.

Vikram-1 Launched: अंतराळ क्षेत्रातील 'कॅब सर्व्हिस'

स्काईरूट एयरोस्पेस कंपनीने आपल्या अधिकृत निवेदनात म्हटले आहे की, अंतराळ सेवा सर्वसामान्यांसाठी सोप्या आणि सुलभ बनवणे हे आमचे मुख्य उद्दिष्ट आहे. भविष्यासाठी कंपनी स्वतःला अंतराळ क्षेत्रातील 'कॅब सर्व्हिस' म्हणून विकसित करत आहे. याचा अर्थ असा की, येत्या काळात वेगवेगळ्या व्यावसायिक कंपन्या त्यांच्या गरजेनुसार स्काईरूटच्या रॉकेट सेवेचा वापर करून आपले सॅटेलाइट अंतराळात किंवा ठराविक कक्षेत पाठवू शकतील. यामुळे अंतराळ क्षेत्रातील व्यावसायिक संधींना आणि तांत्रिक विकासाला मोठी गती मिळणार आहे.

यापूर्वी नोव्हेंबर 2022 मध्ये स्काईरूट कंपनीने 'विक्रम-एस' (Vikram-S) या सबऑर्बिटल मोहिमेचे यशस्वी आयोजन केले होते, ज्याला 'ऑपरेशन प्रारंभ' (Operation Prarambh) असे नाव देण्यात आले होते. त्या पहिल्या यशानंतर आता 'विक्रम-1' च्या ऐतिहासिक उड्डाणाने भारताच्या खासगी अंतराळ क्षेत्राची ताकद संपूर्ण जगाला दाखवून दिली आहे.

आणखी वाचा