India Coronavirus Updates : देशात कोरोनाच्या डेल्टा व्हेरियंटची धास्ती; 6 दिवसांनी 35 हजारांहून कमी दैनंदिन कोरोनाबाधित

India Coronavirus Updates : काल दिवसभरात जगभरात इराणनंतर सर्वाधिक कोरोनाबाधितांची नोंद भारतात करण्यात आली आहे. अमेरिकेत भारताहून कमी कोरोनाबाधितांची नोंद करण्यात आली.

CORONAVIRUS (File Photo)

India Coronavirus Updates : भारतात कोरोना प्रादुर्भावात काहीशी घट झाली आहे. पण अद्यापही धोका कायम आहे. सध्या कोरोनाच्या डेल्टा व्हेरियंटनं देशात सर्वांची धास्ती वाढवली आहे. अशातच तज्ज्ञांकडून देशात तिसऱ्या लाटेचा इशारा देण्यात आला आहे. सोमवारी सकाळी आरोग्य मंत्रालयानं जारी केलेल्या आकडेवारीनुसार, गेल्या 24 तासांत 32,937 दैनंदिन कोरोनाबाधितांची नोंद करण्यात आली आहे. तर 417 रुग्णांचा मृत्यू झाला आहे. यापूर्वी 9 ऑगस्ट रोजी 28,204 कोरोनाबाधितांची नोंद करण्यात आली होती. महत्त्वाची गोष्ट म्हणजे, देशात गेल्या 24 तासांत 35,909 रुग्ण उपचारानंतर कोरोनामुक्त झाले आहेत. 

कोरोनाची एकूण आकडेवारी 

कोरोना महामारीच्या सुरुवातीपासून आतापर्यंत एकूण तीन कोटी 22 लाख 25 हजार रुग्णांना कोरोनाची लागण झाली आहे. यापैकी 4 लाख 31 हजार 642 रुग्णांचा मृत्यू झाला आहे. विशेष बाब म्हणजे, आतापर्यंत 3 कोटी 14 लाख 11 हजार रुग्ण कोरोनामुक्त होऊन घरी परतले आहेत. देशात सध्या कोरोनाच्या अॅक्टिव्ह रुग्णांची संख्या चार लाखांहून कमी आहे. एकूण 3 लाख 81 हजार रुग्णांवर अद्यापही उपचार सुरु आहे. 

देशातील सध्याची कोरोनास्थिती : 

कोरोनाची एकूण आकडेवारी : तीन कोटी 22 लाख 25 हजार 513
एकूण कोरोनामुक्त रुग्ण : तीन कोटी 14 लाख 11 हजार 924
सक्रिय रुग्णांची एकूण आकडेवारी : तीन लाख 81 हजार 947
एकूण मृत्यू : चार लाख 31 हजार 642
लसीकरणाची एकूण आकडेवारी : 53 कोटी 57 लाख 57 हजार लसींचे डोस

राज्यात काल (रविवारी) 4797 नवीन कोरोनाबाधित रुग्णांची नोंद

राज्यात काल (रविवारी) 4 हजार 797 नवीन कोरोनाबाधित रुग्णांची नोंद करण्यात आली आहे. तर 3 हजार 710 रुग्ण कोरोनामुक्त झाले आहे. राज्यात आतापर्यंत 61 लाख 89 हजार 933 रुग्णांनी कोरोनावर मात केली आहे. त्यामुळे राज्यातील रुग्ण बरे होण्याचे प्रमाण 96.83 टक्के आहे. 

राज्यात काल (रविवारी) 130 रुग्णांच्या मृत्यूची नोंद झाली आहे. त्यामुळे राज्याचा मृत्यूदर 2.11 टक्के झाला आहे. एकूण 37 जिल्हे आणि महापालिका क्षेत्रात आज एकाही मृत्यूची नोंद नाही. धुळे, यवतमाळ, गोंदिया, चंद्रपूर, गडचिरोली या पाच जिह्यांमध्ये आज एक कोरोनाबाधित रुग्णाची नोंद झालेली नाही. आजपर्यंत तपासण्यात आलेल्या 5, 09,59,730 प्रयोगशाळा नमुन्यांपैकी 63,92,660 (12.54 टक्के) नमुने पॉझिटिव्ह आले आहेत. सध्या राज्यात 3,59,642 व्यक्ती होम क्वारंटाईनमध्ये आहेत तर 2,453 व्यक्ती संस्थात्मक क्वारंटाईनमध्ये आहेत. 

राज्यात सध्या 64 हजार 219 रुग्णावर उपचार सुरु आहेत. सर्वाधित 14 हजार 748 अॅक्टिव्ह रुग्ण पुणे जिल्ह्यात आहेत. एकूण 15 जिल्ह्यात अॅक्टिव्ह रुग्णसंख्या 100 च्या खाली आहे. तर नंदूरबार- 1, धुळे- 4, परभणी - 43, हिंगोली - 88, नांदेड- 49, अमरावती 53, अकोला- 33, वाशिम - 19, बुलडाणा - 30, यवतमाळ- 16, वर्धा- 7, भंडारा- 1, गोंदिया- 1, चंद्रपूर- 99, गडचिरोली- 30 या जिल्ह्यामध्ये अक्टिव्ह रुग्ण 100 च्या खाली आहेत. 

मुंबईत गेल्या 24 तासात 267 कोरोनाबाधित रुग्णांची नोंद

मुंबईत गेल्या 24 तासात 267 कोरोनाबाधित रुग्णांची नोंद झाली आहे. तर 308 रुग्णांनी कोरोनावर मात केली आहे. मुंबईत आतापर्यंत 7,18,083 रुग्ण कोरोनामुक्त झाले आहेत. मुंबईचा रिकव्हरी रेट 97 टक्के झाला आहे. तर मुंबईत गेल्या 24 तासात 4 रुग्णांचा मृत्यू झाला आहे. सध्या मुंबईत 2,834 सक्रिय रुग्ण आहेत. तर रुग्ण दुपटीचा दर 1921 दिवसांवर गेला आहे.