नवी दिल्ली : भर लोकसभा निवडणुकीत (Loksabha Election 2024) इंडिया आघाडीमधील विरोधी नेत्यांच्या घरी केंद्रीय तपास यंत्रणा कमालीच्या सक्रिय झाल्या आहेत. दिल्लीचे मुख्यमंत्री अरविंद केजरीवाल (Arvind Kejriwal) यांच्या अटक करण्यात आल्यानंतर आता केंद्रीय यंत्रणांनी विरोधी पक्षांचे नेते आणि त्यांच्या कुटुंबीयांच्या घरांवर छापेमारी सुरु केली आहे. आयटी टीम (Income Tax) आम आदमी पार्टीचे मतियाला आमदार गुलाब सिंह यादव यांच्या घरी पोहोचली. ईडीची टीम बीआरएस नेत्या तेलंगणाचे माजी मुख्यमंत्री कविता यांच्या नातेवाईकांच्या घरी पोहोचली. दुसरीकडे, सीबीआयचे पथक आज शनिवारी सकाळी तृणमूल काँग्रेस पक्षाचे माजी खासदार महुआ मोईत्रा यांच्या घरी छापे टाकण्यासाठी पोहोचले.
हैदराबादमध्ये के. कविता यांच्या नातेवाईकांच्या घरावर छापेमारी
सूत्रांनी दिलेल्या माहितीनुसार, ईडीच्या टीमने आज(23 मार्च) हैदराबादमध्ये के. कविता यांच्या नातेवाईकांच्या घरावर छापे टाकण्यात आले. दिल्लीतील दारू घोटाळ्याशी संबंधित प्रकरणाच्या संदर्भात हा छापा टाकण्यात आल्याचे सांगण्यात येत आहे. ईडीच्या पथकाने कविता यांच्या भावाच्या पत्नीच्या घरावरही छापे टाकले आहेत. कवित यांची ईडी कोठडी आज संपत असून त्यांना पुन्हा न्यायालयात हजर केलं जाईल.
महुआ मोईत्राच्या अनेक ठिकाणी सीबीआयचे छापे
दुसरीकडे, सीबीआयचे पथक आज सकाळपासून टीएमसीच्या माजी खासदार महुआ मोईत्रा यांच्या अनेक ठिकाणी छापे टाकत आहे. गुरुवारी (21 मार्च) सीबीआयने तृणमूल काँग्रेसचे माजी खासदार महुआ मोइत्रा यांच्याविरुद्ध लोकसभेत पैशाच्या बदल्यात प्रश्न विचारल्याप्रकरणी एफआयआर नोंदवला होता. आता दोन दिवसांनी छापे टाकले जात आहेत. बंगालसह महुआ मोईत्राच्या आणखी 7 ठिकाणांवर सीबीआयचे छापे सुरू आहेत.
'आप'चे गुलाब सिंह यांच्या घरावर आयटीचा छापा
दिल्लीचे मुख्यमंत्री आणि आम आदमी पार्टीचे (आप) संयोजक अरविंद केजरीवाल यांच्या अटकेनंतर आयकर विभागाच्या पथकाने शनिवारी (23 मार्च) आमदार गुलाब सिंह यांच्या घरावर छापा टाकला. मतियाला विधानसभा मतदारसंघाचे आमदार गुलाब सिंह हे पक्षाच्या गुजरात युनिटचे प्रभारी आहेत. पक्षाचे म्हणणे आहे की, आयटी टीम शनिवारी पहाटे तीन वाजता गुलाब सिंह यांच्या घरी पोहोचली होती. मात्र, कोणत्या प्रकरणात छापा टाकला जात आहे, याची माहिती नसल्याचे पक्षाचे म्हणणे आहे.
इतर महत्वाच्या बातम्या