सचिनच्या हस्ते प्रदान केलेली BMW दीपा कर्माकर परत करणार

मुंबई : रिओ ऑलिम्पिकमध्ये चमकदार कामगिरी करणारी भारतीय जिम्नॅस्ट दीपा कर्माकरवर अनेक बक्षिसांचा वर्षाव झाला. याच बक्षिसांपैकी मास्टर ब्लास्टर सचिन तेंडुलकरच्या हस्ते प्रदान करण्यात आलेली बीएमडब्ल्यू कार दीपाने परत करण्याचा निर्णय घेतला आहे. ऑलिम्पिक पदक विजेत्या पी. व्ही. सिंधू आणि साक्षी मलिक यांच्या जोडीने दीपाला बीएमडब्ल्यू कार प्रदान करण्यात आली होती. मात्र कारच्या मेन्टेन्सच्या त्रासामुळे दीपाने हा निर्णय घेतला आहे. त्या बीएमडब्ल्यू कारचे मूळ मालक हैदराबाद बॅडमिंटन असोसिएशनचे अध्यक्ष व्ही चामुंडेश्वरनाथ यांना ही गाडी परत केली जाईल. दीपा तिच्या कुटुंबीयांसह त्रिपुरा राज्यातील आगरतळामध्ये राहते. मात्र या शहरातील रस्ते निमुळते असल्याने आणि रस्त्यांची दुर्दशा झाल्यामुळे वारंवार दुरुस्तीचा खर्च परवडेनासा होणार आहे. त्यामुळे मेन्टेनन्सवर खर्च करण्यापेक्षा महिन्यावर आलेल्या चॅलेंजर्स कपसाठी तयारी करण्याचा सल्लाही तिला देण्यात आला आहे. द्रोणाचार्य पुरस्काराने सन्मानित करण्यात आलेले दीपाचे कोच बिश्वर नंदी यांनी आपण आणि दीपाच्या कुटुंबीयांनी एकत्रितपणे हा निर्णय घेतल्याचं सांगितलं आहे. आगरतळामध्ये बीएमडब्ल्यू सर्व्हिस सेंटरही नाही आणि इतकी पॉश कार चालवण्यासारखी रस्त्यांची स्थितीही नाही, असं नंदी म्हणतात. हैदराबाद बॅडमिंटन असोसिएशनला ही माहिती कळवल्यानंतर त्यांनीही गिफ्ट परत घेण्यास संमती दर्शवली आहे. त्याऐवजी बीएमडब्ल्यूच्या किमतीइतकी रक्कम दीपाच्या खात्यात जमा करण्याची मागणीही केली आहे, मात्र ते शक्य नसल्यास जितकी रक्कम मिळेल, त्याबाबत आपण समाधानी असू, असंही दीपातर्फे सांगण्यात आल्याचं 'टाइम्स ऑफ इंडिया'ने म्हटलं आहे.