Ghaziabad: दिल्ली-मेरठ एक्स्प्रेस वेवर स्कूल बस आणि कारचा भीषण अपघात; सहा जणांचा जागीच मृत्यू
Uttar Pradesh: नोएडामध्ये एका खासगी शाळेची बस आणि कारचा अपघात झाला. या अपघातात एकाच कुटुंबातील सहा जणांचा जागीच मृत्यू झाला आहे.
Uttar Pradesh: उत्तर प्रदेशाच्या गाझियाबादमधील दिल्ली-मेरठ एक्स्प्रेस वेवर भीषण अपघात झाला. मंगळवारी (11 जुलै) सकाळी नोएडामध्ये एका खासगी शाळेची बस आणि कारची धडक झाली. या अपघातात एकाच कुटुंबातील सहा जणांचा मृत्यू झाला आहे, तर दोन जणांची प्रकृती गंभीर आहे. सकाळी 7 च्या सुमारास नोएडाजवळ हा अपघात (UP Road Accident) घडला.
दिल्ली (Delhi) आणि उत्तर प्रदेशच्या (Uttar Pradesh) सीमेवर हा अपघात झाला. या अपघातामध्ये कारचं मोठं नुकसान झालं आहे. या अपघाताचा पुढील तपास उत्तर प्रदेश पोलिसांकडून (Uttar Pradesh Police) सुरू आहे. बस चालकाच्या चुकीमुळे हा अपघात घडल्याचं पोलिसांनी सांगितलं. दिल्लीजवळीत गाझीपूर येथील सीएनजी पंपावरुन बस चालकाने गॅस भरला आणि नंतर उलट्या दिशेने (Wrong Direction) त्याने बस काढली. चुकीच्या दिशेने धावणाऱ्या स्कूल बसने SUV कारला जोरदार धडक दिली. या कारमधून आठ जण प्रवास करत होते, त्यातील सहा जणांचा जागीच मृत्यू झाला, दोन जणांची प्रकृती गंभीर असल्याने त्यांना जवळच्या रग्णालयात उपचारासाठी दाखल करण्यात आलं आहे.
सुदैवाने स्कूल बसमध्ये एकही विद्यार्थी नव्हता, बसमध्ये फक्त चालकच होता. नोएडाच्या बालभारती शाळेची ही बस होती. पोलिसांनी दिलेल्या माहितीनुसार, सुमारे 8 किलोमीटरपर्यंत बस चुकीच्या बाजूने धावली. प्रेमपाल असं बस चालकाचं नाव असून तो नशेत असल्याची माहितीही समोर येत आहे. पोलिसांनी बस चालकाला ताब्यात घेतलं असून त्याची चौकशी सध्या सुरू आहे.
CCTV footage of the SUV-bus accident on Delhi-Meerut Expressway in Ghaziabad. pic.twitter.com/ZeIilkh3cQ
— Press Trust of India (@PTI_News) July 11, 2023
अपघातात मृत पावलेले कुटुंब हे मूळचे मेरठचे होते, ते खाटू श्यामच्या दर्शनासाठी निघाले असता कुटुंबातील सहा जणांचा मृत्यू झाला. या अपघाताचे सीसीटीव्हीही आता समोर आले आहेत. याआधी सोमवारी (10 जुलै) रात्री उत्तर प्रदेशच्या प्रतापगडमध्येही अपघात झाला होता. यात टेम्पो आणि टँकर यांच्यात भीषण अपघात झाला होता. या अपघातात 12 जणांचा दुर्दैवी मृत्यू झाला होता, 5 जण गंभीर जखमी झाले आहेत.
उत्तर प्रदेशचे मुख्यमंत्री योगी आदित्यनाथ (Yogi Adityanath) यांनी या अपघातात झालेल्या जीवितहानीबद्दल दु:ख व्यक्त केलं आहे. मृतांच्या आत्म्याला शांती लाभो, असं ट्वीट करत त्यांनी मृतांच्या कुटुंबीयांप्रती संवेदना व्यक्त केल्या आहेत. मुख्यमंत्री योगी आदित्यनाथ यांनी जखमींना योग्य उपचारासाठी रुग्णालयात नेण्याच्या सूचना दिल्या, तसेच ते लवकरात लवकर बरे व्हावे, यासाठी त्यांनी प्रार्थना देखील केली.
पोलिसांनी दिलेल्या माहितीनुसार, नरेंद्र यादव (45), त्यांची पत्नी अनिता (42), पहिला मुलगा कार्तिक (15), दुसरा मुलगा हिमांशू (12) हे अपघातात ठार झाले. नरेंद्र यादव यांचा भाऊ धर्मेंद्रची पत्नी बबिता (38) आणि मुलगी वंशिका (7) यांचाही अपघातात मृत्यू झाला. तर धर्मेंद्र (48) आणि त्यांचा मुलगा आर्यन (8) हे गंभीर जखमी झाले आहेत. धर्मेंद्र हे गावी शेती करायचे, तर नरेंद्र हे इलेक्ट्रॉनिकचं दुकान चालवायचे.
हेही वाचा:
Health Tips: रात्री झोपताना अस्वस्थ वाटतं? शांत झोप लागण्यासाठी करा 'या' गोष्टी
महत्त्वाच्या बातम्या
ट्रेंडिंग न्यूज
