Coronavirus : कोरोना मंदावतोय; देशात गेल्या 24 तासांत 10 हजार 264 रुग्ण कोरोनामुक्त

Coronavirus Cases Today : देशात गेल्या 24 तासांत 9 हजार 119 रुग्णांची नोंद करण्यात आली आहे. गेल्या 24 तासांत 396 रुग्णांचा मृत्यू झाला आहे.

CORONAVIRUS (File Photo)

Coronavirus Cases Today : भारतात कोरोनाचा प्रादुर्भाव (Coronavirus) घटल्याचं पाहायला मिळत आहे. अशातच दैनंदिन रुग्णसंख्येतही कमालीची घट पाहायला मिळत आहे. देशात कोरोनाचा प्रादुर्भाव घटला असला तरी, धोका मात्र अद्याप टळलेला नाही. देशात गेल्या 24 तासांत 9 हजार 119 रुग्णांची नोंद करण्यात आली आहे. गेल्या 24 तासांत 396 रुग्णांचा मृत्यू झाला आहे. सध्या देशात एक लाख 09 हजार 940 सक्रिय रुग्ण आहेत. जाणून घेऊया देशाची सध्याची कोरोनास्थिती... 

आतापर्यंत 4 लाख 66 हजार 980 रुग्ण कोरोनामुक्त 

केंद्रीय आरोग्य मंत्रालयानं जारी केलेल्या आकडेवारीनुसार, देशात काल दिवसभरात 10 हजार 264 रुग्ण कोरोनामुक्त झाले आहेत. अशातच या व्हायरसमुळे जीव गमावलेल्या रुग्णांची संख्या 4 लाख 66 हजार 980 वर पोहोचली आहे. आरोग्य मंत्रालयाच्या आकडेवारीनुसार, आतापर्यंत 3 कोटी 45 लाख 46 हजार रुग्ण कोरोनामुक्त झाले आहेत. 

राज्यात काल (बुधवारी) कोरोना मृतांच्या संख्येत वाढ

कोरोनाबाधितांच्या (coronavirus) दैनंदिन रुग्णसंख्येत चढ उतार पाहायला मिळत आहे. राज्यात काल (बुधवारी) 960 नवीन कोरोनाबाधित रुग्णांची नोंद झाली आहे. तर  1043रुग्ण कोरोनामुक्त झाले आहे. राज्यात आतापर्यंत 64 लाख 78 हजार 422 रुग्णांनी कोरोनावर मात केली आहे. त्यामुळे राज्यातील रुग्ण बरे होण्याचे प्रमाण 97.68 टक्के आहे.

राज्यात काल 41 रुग्णांच्या मृत्यूची नोंद झाली आहे.  राज्याचा मृत्यूदर 2.12 टक्के झाला आहे. राज्यात सध्या 9 हजार 366  रुग्णांवर उपचार सुरु आहेत. सध्या राज्यात 84 हजार 261  व्यक्ती होम क्वॉरंटाईनमध्ये आहेत तर 1084 व्यक्ती संस्थात्मक क्वारंटाईनमध्ये आहेत. आजपर्यंत तपासण्यात आलेल्या 6, 49 , 51, 994 प्रयोगशाळा  तपासण्या करण्यात आल्या आहे.

मुंबईत काल 258 रुग्णांची भर तर चार जणांचा मृत्यू

गेल्या 24 तासांत मुंबईत 258 नव्या रुग्णांची नोंद झाली आहे तर चार जणांना कोरोनामुळे आपला जीव गमवावा लागला आहे. गेल्या 24 तासात 287 रुग्ण कोरोनामुक्त होऊन घरी परतले आहेत. शहराचा रिकव्हरी रेट हा 97 टक्क्यांवर पोहोचला आहे. मुंबईत सध्या 2353 इतकी सक्रिय रुग्णसंख्या आहे. शहरात आतापर्यंत 7,40,547 रुग्ण कोरोनामुक्त झाले आहेत. मुंबईतील रुग्णसंख्या दुप्पट होण्याचा कालावधी 2353 दिवसांवर पोहोचला आहे. तसेच शहरातील कोरोना वाढीचा दर हा 0.03 टक्के इतका झाला आहे.