ईव्हीएम हॅक करुन दाखवा, निवडणूक आयोगाचं आव्हान

नवी दिल्ली : निवडणूक आयोगाने आता इलेक्ट्रॉनिक व्होटिंग मशिन म्हणजे ईव्हीएम हॅक करुन दाखवण्याचं आव्हान दिलं आहे. गेल्या काही दिवसांपासून ईव्हीएमबाबत तयार झालेलं संशयाचं वातावरण पाहता निवडणूक आयोगाने हा आक्रमक पवित्रा घेतला आहे. आरोपकर्ते, शास्त्रज्ञ आणि मतदान यंत्राच्या तंत्रज्ञानातील जाणकारांना निवडणूक आयोगाने मे महिन्यातील पहिल्या आठवड्यापासून 10 मेपर्यंतचा अवधी मशिन हॅक करण्यासाठी दिला आहे. काँग्रेसच्या नेतृत्वाखाली 13 विरोधी पक्षांनी राष्ट्रपती प्रणव मुखर्जी यांची भेट घेतली होती. त्यावेळी विरोधी पक्षांनी मतदान यंत्रात होत असलेल्या छेडछाडीचा मुद्दाही उपस्थित केला. दिल्लीचे मुख्यमंत्री अरविंद केजरीवाल यांच्याकडूनही ईव्हीएमवरुन निवडणूक आयोगाला लक्ष्य केलं जात आहे. शिवाय उत्तर प्रदेश निवडणुकीनंतर बसपा अध्यक्ष मायावती यांनीही ईव्हीएममध्ये घोळ झाल्याचा आरोप केला होता. सातत्याने होणाऱ्या आरोपांनंतर निवडणूक आयोगाने मतदान यंत्रात छेडछाड करून दाखवण्याचं आव्हान दिलं आहे. त्यानुसार मे महिन्यातील पहिल्या दहा दिवसांमध्ये तज्ज्ञ, शास्त्रज्ञ, मतदान यंत्राच्या तंत्रज्ञानाचे जाणकार आणि राजकारणी निवडणूक आयोगाकडे येऊन मतदान यंत्र हॅक करण्याचा प्रयत्न करू शकतील. याआधी 2009 मध्येही मतदान यंत्रांवर शंका घेण्यात आल्यानंतर निवडणूक आयोगाने अशाच प्रकारचं आव्हान दिलं होतं. पण त्यावेळी कुणीही मतदान यंत्रात छेडछाड करू शकलं नाही. मतदान यंत्रांमध्ये फेरफार होणे शक्य आहे. मतदान यंत्रे सार्वजनिक झाली तर त्यात होणारी फेरफार 72 तासांत सिद्ध करून दाखवू, असं आव्हान अरविंद केजरीवाल यांनी निवडणूक आयोगाला दिलं होतं. निवडणूक आयोगानेही त्यानंतर केजरीवाल यांना मतदान यंत्रात फेरफार करून दाखवण्याचं प्रति आव्हान दिलं होतं.