कर्नाटकात येडियुरप्पा सरकारची आज बहुमत चाचणी, भाजपच्या विजयाचा मार्ग सोपा
विधानसभा अध्यक्षांकडून 17 आमदारांना अपात्र घोषित केल्यानंतर भाजपचा सत्ता स्थापनेचा मार्ग आणखी सोपा झाला आहे. अपात्र घोषित केलेल्या 17 आमदारांमध्ये 13 काँग्रेस, जेडीएसचे 3 आणि एका अपक्ष आमदाराचा समावेश आहे.
बंगळुरु : कर्नाटकातील नागरिकांना आज नवीन सरकार मिळणार आहे. विधानसभा अध्यक्षांकडून 17 आमदारांना अपात्र घोषित केल्यानंतर भाजपचा सत्ता स्थापनेचा मार्ग आणखी सोपा झाला आहे. नव्याने मुख्यमंत्री पदाची शपथ घेतलेल्या बी एस येडियुरप्पा यांना आज बहुमत सिद्ध करावं लागणार आहे. मात्र विधानसभा अध्यक्षांच्या कारवाईनंतर बहुमत सिद्ध करण्यासाठीची संख्य़ा 104 झाली आहे.
"आज विधानसभेत विश्वासदर्शक ठराव मांडणार करणार आहे. त्यानंतर लगेच वित्त विधेयक मांडून ते मंजूर करुन घेणं हे पहिलं काम असणार आहे. अन्यथा सरकारला कर्मचाऱ्यांचे पगार देण्यासाठी पैसेही मिळणार नाहीत. आधीच्या सरकारने तयार केलेल्या वित्त विधेयकात मी काहीच बदल करणार नाही", असं येडियुरप्पा यांनी सांगितलं.
कुमारस्वामी सरकारला बहुमत सिद्ध करता न आल्याने सरकार पडलं होतं. त्यानंतर बी एस येडियुरप्पा यांनी मुख्यमंत्री पदाची शपथ घेतली. काल विधानसभा अध्यक्षांनी 17 आमदारांवर कारवाई केली. अपात्र घोषित केलेल्या 17 आमदारांमध्ये 13 काँग्रेस, जेडीएसचे 3 आणि एका अपक्ष आमदाराचा समावेश आहे.
कर्नाटक विधानसभेचं संख्याबळ 224 आहे. 17 आमदारांना अपात्र घोषित केल्यानंतर आता विधानसभेत आमदारांची संख्या 207 वर आली आहे. त्यामुळे येडियुरप्पा यांना बहुमत सिद्ध करण्यासाठी 104 आमदारांची आवश्यकता आहे. कुमारस्वामी सरकारला बहुमत चाचणीत केवळ 99 मतं मिळाली होती. तर भाजपला 105 मतं मिळाली होती. या आधारावर भाजपला उद्या बहुमत सिद्ध करण्यात अडचण येणार नाही.
विधानसभा अध्यक्षांविरोधात अविश्वास ठराव आणणार
कर्नाटकात सत्ता आल्यानंतर भाजप विधानसभा अध्यक्ष के आर रमेश कुमार यांच्या विरोधात अविश्वास ठराव आणण्याबाबत विचार करत आहे. विधानसभा अध्यक्षांनी स्वत: राजीनामा न दिल्यास भाजप हे पाऊल उचलू शकतं. विधानसभा अध्यक्षांना पद सोडण्याबाबत सांगितलं असल्याची माहिती सूत्रांकडून मिळत आहे.
संबंधित बातम्या
महत्त्वाच्या बातम्या
