Bihar News : बिहारची (Bihar) राजधानी पटनाजवळ मणेर गावात एक बोटीला अपघात झाला आहे. 55 प्रवाशांना घेऊन जाणारी एक बोट शेरपूर घाटाजवळ गंगा नदीत बुडाल्यानं एकच हाहाकार माजला. या अपघातातील 45 प्रवाशांना सुखरूप बाहेर काढण्यात आलं आहे. तर 10 प्रवासी अजूनही बेपत्ता असल्याची भीती व्यक्त होत आहे. या बेपत्ता प्रवाशांचा एनडीआरएफकडून शोध सुरू आहे.
दानापूरचे एसडीएम घटनास्थळी उपस्थित आहेत. माध्यमांशी बोलताना त्यांनी सांगितलं की, 10 लोक बेपत्ता आहेत आणि बेपत्ता झालेल्यांचा शोध घेण्यासाठी शोध मोहीम सुरू करण्यात आली आहे. बोटीवरील लोक दाऊदपूर येथील रहिवासी आहेत.
प्रत्यक्षदर्शींनी दिलेल्या माहितीनुसार, गंगा नदिच्या एका काठावरुन तीन बोटींमधून काही लोक चारा कापून आपापल्या घरी परतत होते. दरम्यान, नदीच्या जोरदार प्रवाहामुळे दोन बोटींची धडक झाली. बोटीवरील बहुतांश लोक दानापूर शाहपूर भागातील रहिवासी असल्याचं सांगितलं जात आहे. घटनेची माहिती मिळताच आजूबाजूला मोठी गर्दी झाली. त्यानंतर शहापूर पोलिसांनी घटनास्थळ गाठून गर्दी बाजूला करुन शोध सुरू केला. संबंधित घटनेची यंत्रणांना माहिती देण्यात आली. त्यानंतर तात्काळ बचावकार्य सुरु करण्यात आलं.
कशी घडली घटना?
स्थानिक नागरिकांनी दिलेल्या माहितीनुसार, शाहपूर पोलीस स्थानकाच्या हद्दीत दाऊदपूरचे राहणारे काही नागरिक रविवारी गंगा नदी पार करुन गुरांसाठी चारा आणण्यासाठी गेले होते. दिवसभर चारा गोळा करुन हे सर्वजण घरी परतत होते. तीन बोटींतून या सर्व नागरिकांनी परतीचा प्रवास सुरु केला. तीन बोटींमध्ये जवळपास 55 प्रवासी उपस्थित होते. नदीतून काठावर येत असताना, अचानक नदीचा प्रवाह बदलला आणि दोन बोटींनी एकमेकांना धडकल्या. त्यातली एक बोट पलटली आणि त्या बोटीतील 55 प्रवासी नदीत बुडाले. स्थानिकांनी तात्काळ घटनेची माहिती यंत्रणा आणि पोलिसांपर्यंत पोहोचवली. माहिती मिळताच पोलीस आणि यंत्रणांनी तात्काळ घटनास्थळी धाव घेत बचावकार्य सुरु केलं. बोटीतील 45 प्रवाशांना सुखरुप वाचवण्यात यश आलं आहे. तर 10 प्रवाशी बेपत्ता असून त्यांचा शोध सुरु आहे.
महत्त्वाच्या इतर बातम्या :