Agnipath scheme: अग्निपथ योजनेला विरोध होत असताना केंद्र सरकारने शनिवारी आणखी एक मोठी घोषणा केली आहे. अग्निवीरांसाठी एक मोठी घोषणा करताना संरक्षण मंत्रालयाकडून अग्निवीरांना संरक्षण मंत्रालयातील नोकऱ्यांसाठी 10% आरक्षण मिळेल असे सांगण्यात आले आहे. संरक्षण मंत्री राजनाथ सिंह यांनी त्याला मंजुरी दिली आहे. भारतीय तटरक्षक आणि संरक्षण नागरी पदे आणि सर्व 16 संरक्षण सार्वजनिक क्षेत्रातील उपक्रमांमध्ये 10% आरक्षण लागू केले जाईल, असे संरक्षण मंत्रालयाकडून सांगण्यात आले. हे आरक्षण माजी सैनिकांसाठीच्या सध्याच्या आरक्षणाव्यतिरिक्त असेल.


या तरतुदी लागू करण्यासाठी संबंधित भरती नियमांमध्ये आवश्यक सुधारणा केल्या जातील. संरक्षण सार्वजनिक क्षेत्रातील उपक्रमांना त्यांच्या संबंधित भरती नियमांमध्ये समान सुधारणा करण्याचा सल्ला दिला जाईल. आवश्यक वयोमर्यादा शिथिल करण्याची तरतूदही केली जाईल. संरक्षण मंत्रालयातील नोकऱ्यांच्या 10% जागा अग्निवीरांसाठी राखीव असतील, जे आवश्यक पात्रता निकष पूर्ण करतात. अशी माहिती संरक्षण मंत्रालयाकडून देण्यात आली आहे. 


विरोधादरम्यान संरक्षणमंत्र्यांनी बैठक घेतली


देशभरात अग्निपथ योजनेला विरोध होत असताना संरक्षण मंत्री राजनाथ सिंह यांनी एक महत्त्वाची बैठक घेतली. ज्यामध्ये संरक्षणमंत्र्यांनी अग्निपथ योजनेबाबत लष्करप्रमुखांशी चर्चा केली. या बैठकीत अग्निवीरांना संरक्षण मंत्रालयाच्या नागरी नोकऱ्यांमध्ये 10 टक्के आरक्षण देण्याचा निर्णय घेण्यात आला. कोस्ट गार्ड आणि डिफेन्स पीएसयूमध्येही 10 टक्के कोटा दिला जाईल. संरक्षण मंत्री राजनाथ सिंह यांनी आवश्यक पात्रता निकष पूर्ण करणाऱ्या अग्निवीरांसाठी संरक्षण मंत्रालयातील नोकऱ्यांच्या 10% जागा राखीव ठेवण्याच्या प्रस्तावाला मंजुरी दिली आहे.


गृहमंत्रालयानेही केली घोषणा 


तत्पूर्वी CAPF आणि आसाम रायफल्समध्ये अग्निवीरांना 10% नोकरी आरक्षण देण्याचा निर्णय गृह मंत्रालयाने घेतला होता. केंद्रीय गृह मंत्रालयाच्या ट्विटमध्ये असे म्हटले आहे की, CAPF आणि आसाम रायफल्समधील भरतीमध्ये अग्निपथ योजनेंतर्गत 4 वर्षे पूर्ण केलेल्या अग्निवीरांसाठी 10% रिक्त पदे राखून ठेवण्याचा महत्त्वपूर्ण निर्णय गृह मंत्रालयाने घेतला आहे. याशिवाय गृह मंत्रालयाने CAPF आणि आसाम रायफल्समध्ये भरतीसाठी अग्निवीरांना प्रवेश वयोमर्यादेत 3 वर्षांची सूट देण्याचा निर्णय घेतला आहे. अग्निपथ योजनेच्या पहिल्या बॅचसाठी ही सूट 5 वर्षांपर्यंत जाहीर केली आहे.


इतर महत्वाच्या बातम्या: 


Agneepath Scheme वरुन मोदी सरकार पॅनिक मोडमध्ये? तीन दिवसांत तीन मोठ्या घोषणा करुन असंतोषाची आग विझवण्याचा प्रयत्न
Agneepath Scheme : अमेरिका, चीन आणि इतर देशात अग्निवीरांची निवड कशी होते?