शेतात ज्वारी कापणीचे काम करताना वीज कोसळून पाच जणांचा मृत्यू

आज दुपारी जळगावातील धरणगाव तालुक्यातील भवरखेडा येथे ही घडली. या घटनेत ठार झालेल्यांच्या नातेवाईकांना प्रत्येकी चार लाखांची मदत शासनाकडून केली जाईल अशी घोषणा सहकार राज्यमंत्री गुलाबराव पाटील यांनी केली आहे.

जळगाव: शेतात ज्वारी कापणीचे काम करत असताना अंगावर वीज पडून पाच जण ठार झाल्याची दुर्दैवी घटना आज दुपारी जळगावातील धरणगाव तालुक्यातील भवरखेडा येथे घडली. या घटनेत ठार झालेल्यांच्या नातेवाईकांना प्रत्येकी चार लाखांची मदत शासनाकडून केली जाईल अशी घोषणा सहकार राज्यमंत्री गुलाबराव पाटील यांनी केली आहे.

रघुनाथ दशरथ पाटील (वय 50), त्यांची पत्नी अलका रघुनाथ पाटील (वय 45), मोठी सून शोभा भागवत पाटील (वय 33), लहान सून लता उदय पाटील (वय 30) आणि कल्पना भैय्या पाटील (वय 35) सर्व रा. भवरखेडा, ता. धरणगाव) अशी या दुर्घटनेत ठार झालेल्यांची नावं आहेत.

रघुनाथ पाटील यांच्या शेतात ज्वारी कापणीचे काम सुरु होते. सर्वजण काम करत असताना दुपारी अचानक ढगांच्या गडगडाटासह पावसाला सुरुवात झाली. त्यावेळी सर्वजण एका झाडाच्या खाली उभे होते. त्यांच्या अंगावर अचानक वीज कोसळली. या घटनेत सर्वांचा जागीच मृत्यू झाला. या घटनेमुळे भवरखेडा गावावर एक शोककळा पसरली आहे. या घटनेची माहिती मिळताच धरणगाव पोलीस तसेच महसूल यंत्रणेने घटनास्थळी धाव घेतली.

या दुर्घटनेसोबतच जोरदार पावसालाही सुरुवात झाली, त्यामुळे भवरखेडा शेतशिवारातील नाल्यांना मोठ्या प्रमाणावर पूर आला. पुरामुळे घटनास्थळी पोहचणे देखील कठीण झाले होते. सायंकाळी साडेचार वाजताच्या सुमारास पावसाचा जोर ओसरला. त्यानंतर मृतदेह शवविच्छेदनासाठी धरणगाव ग्रामीण रुग्णालयात नेण्यात आले.