Aurangabad: पिण्याच्या पाण्यावरून चौघांना भोसकले; वाळूज भागातील घटना

औरंगाबाद शहरातील पाणी प्रश्न आता गंभीर होत चालला असून, यातून हाणामारीच्या घटना समोर येत आहे.

Aurangabad Crime News

Aurangabad Crime News: औरंगाबाद शहरातील आणि परिसरातील भागात पाणी प्रश्न गंभीर होत चालला आहे. पाणीपुरवठा सुरळीत करताना प्रशासन सुद्धा हतबल होतांना पाहायला मिळत आहे. अशात आता पिण्याच्या पाण्यावरून नागरिकांमध्ये हाणामारीच्या घटना समोर येत आहे. वाळूज महानगर भागात नळाचे पाणी भरण्यावरून दोन कुटुंबीयांत जोरदार हाणामारी होऊन चौघांना चाकूने भोसकल्याची घटना घडली आहे. त्यांनतर परस्परविरोधी तक्रारीवरून सात जणांविरुद्ध गुन्हा दाखल करण्यात आला आहे.

याबाबत अधिक माहिती अशी की, रांजणगाव शेणपुंजी येथील प्रभाकर चोरमले हे कुटुंबासह किरायाच्या घरात राहतात. बाजूलाच दुसऱ्या खोलीत भाऊसाहेव दळवी यांचे कुटुंब सुद्धा किरायाने राहतात. काही दिवसांपासून सामायिक नळाचे पाणी भरण्यावरून दळवी आणि चोरमले कुटुंबात वाद व्हायचे. दरम्यान शनिवारी सायंकाळी दोन्ही घरांतील महिलांचा पुन्हा पाण्यावरून वाद झाला. या वादानंतर रात्री दळवी कुटुंबातील तिघांनी चोरमलेंच्या घरी जाऊन त्यांना अश्लील शिवीगाळ केली.

आईला शिवीगाळ केली जात असल्याने संकेत चोरमले हा समजावण्यासाठी घराबाहेर आला. यावेळी योगेश दळवी याने संकेतवर चाकूने वार केले. संकेतने मदतीसाठी आरडाओरडा केला असता त्याचे आई-वडील आले. योगेशने प्रभाकर चोरमले यांच्यावर सुद्धा चाकूने दोन तर, चोरमले यांच्या पत्नीवर एक वार केला.

परस्परविरोधी गुन्हे दाखल... 

घटनेची महिती मिळताच पोलिसांनी घटनास्थळी धाव घेतली. त्यांनतर पोलिसांनी गंभीर जखमी चार जणांना शासकीय रुग्णालयात दाखल केले असून,त्यांच्यावर उपचार सुरु आहे. तर याप्रकरणी संकेत चोरमले यांनी भाऊसाहेब, योगेश, महेश व दळवीबाई यांच्याविरुद्ध तक्रार दिली आहे. तर भाऊसाहेब दळवी यांनीही प्रभाकर चोरमले, संकेत चोरमले व नितीन चोरमले यांनी आपल्याला व कुटुंबीयांना मारहाण केल्याची तक्रार दिली. यावरून दोन्ही कुटुंबांतील 7 जणांविरुद्ध एमआयडीसी वाळूज पोलीस ठाण्यात गुन्हा दाखल करण्यात आला.

पाणी प्रश्न गंभीर...

औरंगाबाद शहरातच नव्हे तर आता परिसरातील आणि ग्रामीण भागात सुद्धा पाणी टंचाई जाणवत आहे. त्यामुळे पाण्यासाठी नागरिकांना मोठ्या अडचणीचा सामना करावा लागत आहे. तर पिण्याच्या पाण्यावरून आता वाद होताना सुद्धा पाहायला मिळत आहे. त्यातच वाळूजच्या घटनेनंतर पिण्याच्या पाण्याची परिस्थिती किती गंभीर बनली आहे, याचा अंदाज येऊ शकतो.