Aurangabad News: औरंगाबाद येथून ताब्यात घेण्यात आलेल्या पीएफआयच्या कार्यकर्त्यांकडून पोलीस तपासात धक्कादायक माहिती समोर आली असून, औरंगाबादला धर्मांधतेचे हब आणि भारताला इस्लामिक राष्ट्र करण्याचा कट पीएफआयकडून रचण्यात आला होता. यासाठी पीएफआयच्या सदस्यांचे विद्रोही पुस्तकाच्या माध्यमातून ब्रेन वॉश करण्यात येत होते. तर एटीएसने ताब्यात घेतलेल्या पीएफ कार्यकर्त्यांकडे 'बाबरी मशीद नही भुलेंगे' लिहलेले साहित्य सापडले आहे. दरम्यान अटक असलेल्या पीएफ कार्यकर्त्यांना न्यायालयाने दोन दिवसांची पोलीस कोठडीची मुदत वाढवली आहे.
औरंगाबाद येथून ताब्यात घेण्यात आलेल्या पीएफ कार्यकर्त्यांमध्ये इरफान मल्ली हा संघटनेच्या राज्य कमिटीचा सदस्य म्हणून काम करत होता. एटीएसने त्याला ताब्यात घेतल्यानंतर त्याच्या घरात एक तलवार सापडली आहे. तर त्याने असे शस्त्र अनेकांना वाटप केल्याचा संशय एटीएसला आहे. सोबतच त्याच्याकडे पीएफआयचे पब्लिकेशन सापडले असून, ज्यात 'बाबरी मशीद नही भुलेंगे' लिहलेले साहित्य सापडले आहे. विशेष म्हणजे इरफान एक खाजगी मदरसा चालवत होता आणि तिथेच तो जिहादी शिक्षण देत असल्याचा एटीएसला संशय आहे. त्यामुळे त्याच्याकडे कुणी शिक्षण घेतले त्यांची पार्श्वभूमी सुद्धा एटीएसकडून तपासले जाणार असल्याची शक्यता आहे.
औरंगाबादला बनवायचे होते धर्मांधतेचे हब...
एटीएसने न्यायालयात माहिती देतांना सांगितले की, ताब्यात घेण्यात आलेल्या पीएफआयच्या सदस्यांना औरंगाबादला धर्मांधतेचे हब बनवायचे होते. सोबतच भारताला इस्लामिक राष्ट्र करण्याचा कट पीएफआयकडून रचण्यात आला होता. विशेष म्हणजे एटीएसकडून करण्यात आलेल्या कारवाईत औरंगाबाद जिल्ह्यातून पाच जणांना अटक करण्यात आली होती. तर इतर 12 ते 13 जणांना ताब्यात घेऊन नोटीस देऊन सोडून देण्यात आले होते. त्यामुळे औरंगाबाद शहर पीएफआयचा केंद्रबिंदू असल्याचे यातून स्पष्ट झाले आहे. त्यातच औरंगाबादला पीएफआयच्या सदस्यांना धर्मांधतेचे हब बनवायचे होते हे एटीएस तपासातून स्पष्ट झाल्याने मोठी खळबळ उडाली आहे.
पाचही आरोपींविरोधात देशविघातक कृत्यांचे पुरावे...
औरंगाबाद येथून ताब्यात घेण्यात आलेल्या शेख इरफान मल्ली, सय्यद फैजल,परवेज खान, अब्दुल हबीब, नासेर शेख यांच्या विरोधात देशविघातक कृत्यांच्या नियोजनाच्या दृष्टीने सबळ पुरावे असल्याची माहिती एटीएसने न्यायालयात दिली आहे. यातील नासेर शेखच्या बँक खात्यावर पैश्यांची मोठी उलाढाल झाल्याचे तपासात समोर आले आहे. तर परवेज खान आणि सय्यद फैजलकडे शरीरिक प्रशिक्षणाची जबाबदारी देण्यात आली होती. अब्दुल हबीब याच्याकडे विद्रोही विचार पसरवण्याची जबाबदारी देण्यात आली होती. तर नासेरच्या इशाऱ्यावर मराठवाड्यातील काम चालत होते.
महत्वाच्या बातम्या...
PFI : PFI चा मोठा कट उघडकीस, महाराष्ट्र एटीएसच्या हाती महत्त्वाचे धागेदोरे
पीएफआयनंतर आता SDPI पक्षावर बंदी येणार? निवडणूक आयोग निर्णय घेण्याची शक्यता