Navratri 2023 Live Updates : आजपासून शारदीय नवरात्रोत्सवाला सुरुवात, साडेतीन शक्तीपीठ मंदिरांसह घरोघरी घटस्थापना

Navratri 2023 Live Updates : शारदीय नवरात्रीच्या पहिल्या दिवशी महाराष्ट्रातील शक्तीपीठ असलेल्या देवीच्या मंदिरात तसेच घरोघरी घटस्थापना केली जाते. या नऊ दिवसांत भाविकांची मंदिरात गर्दी दिसून येते.

पार्श्वभूमी

Shardiya Navratri 2023 Live Updates : आजपासून शारदीय नवरात्रीला (Navratri 2023) सुरूवात झाली आहे. दरवर्षी अश्विन महिन्याच्या शुक्ल पक्षातील प्रतिपदा तिथीपासून नवमी तिथीपर्यंत साजरी केली जाते. शारदीय नवरात्रीच्या पहिल्या दिवशी महाराष्ट्रातील शक्तीपीठ असलेल्या देवीच्या मंदिरात तसेच घरोघरी घटस्थापना केली जाते आणि या नऊ दिवसांमध्ये भाविकांची या मंदिरात गर्दी दिसून येते. आपल्या देशात देवींना सर्वोच्च स्थान आहे. महाराष्ट्रातील साडेतीन शक्तीपीठ असलेल्या देवींच्या मंदिरांसोबतच इतर महत्त्वाच्या मंदिरात उत्सव कशाप्रकारे साजरा होत आहे, जाणून घ्या, 

15/10/2023 11:45:07

Navratri 2023 : तुळजाभवानी मंदीर संस्थानकडून व्हीआयपी दर्शनाचा गोंधळ, व्हीआयपी दर्शन बंद

धाराशिव - तुळजाभवानी मंदीर संस्थानकडून व्हीआयपी दर्शनाचा गोंधळ. व्हीआयपी दर्शन बंद

मंदीर कार्यालयात घोषणाबाजी करीत सुरु केले आंदोलन

गेल्या 3 तासापासून 500 रुपये सशुल्क दर्शन रांगेत भाविकांची गर्दी

स्थानिक पुजारी व काही खासगी लोकांनी पास रांग सोडून घेऊन जात असल्यामुळे गोंधळ उडाला 

तुळजाभवानी मंदीर संस्थानने बंद केले व्हीआयपी दर्शन पास

15/10/2023 11:02:59

Navratri 2023 : माहूरला रेणुकामातेच्या दर्शनासाठी भाविकांची गर्दी, वाहनचालकांचा जीव मुठीत धरून प्रवास

Navratri 2023 : शारदीय नवरात्र उत्सवाला आज पासून सुरूवात झाली साडे तीन शक्तीपीठा पैकी मूळ पीठ असलेल्या माहूरच्या रेणुका मातेला भाविकांची गर्दी असल्याचे चित्र पाहायला मिळत आहे. सकाळी 11.30 वाजता देवीची घटस्थापना होणार आहे तसेच नवरात्र निमित्याने माहूरचे मंदिर हे रात्री 10 वाजेपर्यंत सुरु राहणार आहेनवरात्र निमित्त माहूरला रेणुकामातेचा दर्शनासाठी भाविकांची गर्दी मोठ्या प्रमाणात होते. माहूरला जाताना पैनगंगा नदी वरील पुलाचे दोन्ही बाजूचे कठडे नसल्याने अपघात होऊ शकते. तसेच या पुलावरून वाहन चालकांना जीव मुठीत धरून प्रवास करावा लागत आहे. 

15/10/2023 09:50:42

Navratri 2023 : वणी सप्तशृंगी देवी मंदिर संस्थानच्या कार्यालयात आभूषणांच्या महापूजेला सुरुवात

Navratri 2023 : साडेतीन शक्तिपीठांपैकी आद्य शक्तीपिठ असलेल्या नाशिकच्या वणी येथील सप्तशृंगी गडावर नवरात्रोत्सव मोठ्या उत्साहाने साजरा केला जात असतो. आज सकाळी 7 वाजता मंदिर संस्थानच्या कार्यालयात देवीच्या आभूषणांच्या महापूजेला सुरुवात झाली आहे, संस्थानचे अध्यक्ष बी व्ही वाघ यांच्या हस्ते सपत्निक ही पूजा पार पडते आहे. महापुजेनंतर थोड्याच वेळात संस्थानच्या कार्यालयापासून ते मंदिरापर्यंत या आभूषणांची ढोल ताशांच्या गजरात वाजत गाजत मिरवणूक काढली जाणार आहे. त्यानंतर मंदिरात घट स्थापना केली जाऊन महाआरती पार पडेल. आज रविवार देखिल असल्याने पहिल्याच दिवशी भाविक मोठ्या संख्येने हजेरी लावतील असा अंदाज असून संस्थान तसेच जिल्हा प्रशासनाच्या वतीने सर्व तयारी पूर्ण झाली आहे.

15/10/2023 09:49:38

Navratri 2023 : श्री महालक्ष्मी मंदिरात दर्शनासाठी भाविकांची मोठ्या संख्येने हजेरी, मोठ्या रांगा

Navratri 2023 : आज नवरात्रोत्सवाचा पहिला दिवस असून मोठ्या संख्येने भाविकांनी श्री महालक्ष्मी मंदिरात दर्शनासाठी हजेरी लावली आहे. भाविकांच्या प्रचंड संख्येमुळे दर्शनासाठी मोठी रांग आपल्याला पाहायला मिळत आहे. ठाणे, नवी मुंबईसह मुंबई आणि शहराच्या विविध भागातून लोक दर्शनासाठी आले आहेत. सकाळपासूनच भाविक रांगेत उभे असून नऊ दिवस याच रांगा पाहायला मिळणार आहेत. नऊ दिवस चालणाऱ्या या उत्सवात कायदा व सुव्यवस्थेची परिस्थिती निर्माण होऊ नये म्हणून मुंबई पोलिसांनी मोठा पोलिस बंदोबस्त ठेवला आहे.

15/10/2023 09:29:42

Navratri 2023 : नवरात्रीनिमित्त सजले चंद्रपूरचे ऐतिहासिक देवी महाकाली मंदिर, घटस्थापना करून देवीच्या नवरात्राला प्रारंभ, हजारो भाविकांनी केली गर्दी

Navratri 2023 : चंद्रपूरचे आराध्य दैवत असलेल्या देवी महाकालीच्या अश्विन नवरात्र उत्सवाला आज घटस्थापनेने उत्साहात प्रारंभ झाला आहे. नवरात्राच्या पहिल्याच दिवशी चांदागडच्या आईचे दर्शन घेण्यासाठी हजारोंच्या संख्येत भाविक मंदिरात पहाटे पासून दाखल झाले आहेत. नवरात्री निमित्त लोकांचा उत्साह देखील ओसंडून वाहत असून हजारो भाविकांच्या उपस्थितीने मंदिर परिसर फुलुन गेला आहे. आज सकाळी देवीची विशेष पूजा करून घटस्थापना करण्यात आली. चौदाव्या शतकात गोंड राणी 'हिरातनी' आणि पंधराव्या शतकात राणी 'हिराई' ने बांधलेल्या या मंदिरात दर्शनासाठी महाराष्ट्र, मध्यप्रदेश, छत्तीसगड, तेलंगणा आणि आंध्रप्रदेश या पाच राज्यातील भाविक गर्दी करतात. पुढचे 9 दिवस देवीच्या दर्शनाला हजारो भक्त हजेरी लावणार आहे.

15/10/2023 09:24:35

Navratri 2023 : शारदीय नवरात्रीच्या तारखा, नऊ दिवस देवीची नऊ रुपं, जाणून घ्या

शारदीय नवरात्रीच्या तारखा, नऊ दिवस देवीची नऊ रुपं, जाणून घ्या
15 ऑक्टोबर 2023 - देवी शैलपुत्री (पहिला दिवस) प्रतिपदा तिथी
16 ऑक्टोबर 2023 - देवी ब्रह्मचारिणी (दुसरा दिवस) द्वितीया तिथी
17 ऑक्टोबर 2023 - देवी चंद्रघंटा (तिसरा दिवस) तृतीया तिथी
18 ऑक्टोबर 2023 - देवी कुष्मांडा (चतुर्थी दिवस) चतुर्थी तिथी
19 ऑक्टोबर 2023 - देवी स्कंदमाता (पाचवा दिवस) पंचमी तिथी
20 ऑक्टोबर 2023 - देवी कात्यायनी (सहावा दिवस) षष्ठी तिथी
21 ऑक्टोबर 2023 - देवी कालरात्री (सातवा दिवस) सप्तमी तिथी
22 ऑक्टोबर 2023 - देवी महागौरी (आठवा दिवस) दुर्गा अष्टमी
23 ऑक्टोबर 2023 - महानवमी, (नववा दिवस) शारदीय नवरात्रीचा उपवास.
24 ऑक्टोबर 2023 - देवी दुर्गा मूर्तीचे विसर्जन, दशमी तिथी (दसरा)

15/10/2023 09:22:29

Navratri 2023 : घटस्थापनेचा शुभ मुहूर्त जाणून घ्या

Navratri 2023 : पंचांगानुसार शारदीय नवरात्रीच्या प्रतिपदा तिथीला घटस्थापनेचा शुभ मुहूर्त म्हणजेच 15 ऑक्टोबर रोजी सकाळी 11.48 ते दुपारी 12.36 पर्यंत आहे. या वर्षी कलश स्थापनेचा शुभ मुहूर्त फक्त 48 मिनिटांचा राहणार आहे.

घटस्थापना तारीख: रविवार 15 ऑक्टोबर 2023
घटस्थापना मुहूर्त: सकाळी 06:30 ते 08:47
अभिजित मुहूर्त: सकाळी 11:48 ते दुपारी 12:36 पर्यंत

15/10/2023 09:20:47

Navratri 2023 : आजपासून शारदीय नवरात्रीला सुरुवात! पुढील 9 दिवस ठिकठिकाणी होणार देवीचा जागर

Navratri 2023 : दुर्गा देवीला समर्पित नऊ दिवस चालणारा नवरात्रोत्सव रविवार 15 ऑक्टोबर म्हणजेच आजपासून सुरू होत आहे. आज घटस्थापना देखील होत आहे. हा उत्सव 23 ऑक्टोबरपर्यंत चालणार आहे. हिंदू धर्मात शारदीय नवरात्रीचे विशेष महत्त्व आहे. अश्विन महिन्याच्या शुक्ल पक्षाच्या प्रतिपदा तिथीपासून शारदीय नवरात्रीला सुरुवात होते. रविवार 15 ऑक्टोबर 2023 पासून नवरात्रीला सुरुवात होणार आहे. 23 ऑक्टोबर 2023 रोजी नवरात्री संपणार आहे. 24 ऑक्टोबर रोजी विजयादशमी किंवा दसरा हा सण साजरा केला जाणार आहे. आश्विन महिन्याची प्रतिपदा तिथी 14 ऑक्टोबर 2023 रोजी रात्री 11:24 पासून सुरू होईल. जी15 ऑक्टोबर रोजी दुपारी 12:32 पर्यंत असेल. उदय तिथीनुसार 15 ऑक्टोबरपासून शारदीय नवरात्रीला सुरुवात होणार आहे.