Fibromyalgia Syndrome : शरीराच्या कोणत्याही भागात अधूनमधून हलकेसे दुखणे हे चिंतेचे कारण नाही. मात्र, हे दुखणं जर वारंवार होत असेल तर मात्र त्याकडे लक्ष देणे गरजेचे आहे. जर तुम्ही नेहमी या वेदना अनुभवत असाल तर तुम्हाला फायब्रोमायल्जियाची (Fibromyalgia) समस्या असू शकते. डॉक्टरांच्या मते ही स्थिती संधिवात आणि तीव्र थकवा सिंड्रोमपेक्षा अधिक गंभीर आहे, झोपेच्या पद्धतींमध्ये बदल, मेमरी लॉस आणि मूड स्विंग होणे या गोष्टी यामध्ये जाणवतात. डॉक्टरांच्या मते, “सर्वसाधारण लोकसंख्येपैकी किमान 3 टक्के लोकांना फायब्रोमायल्जिया नावाच्या वेदनादायक स्थितीचा सामना करावा लागतो.
फायब्रोमायल्जिया सिंड्रोम म्हणजे काय?
फायब्रोमायल्जिया ही अशी स्थिती आहे ज्यामुळे संपूर्ण शरीरात वेदना होतात. फायब्रोमायल्जिया असणा-या लोकांना अनेकदा इतर लक्षणांचा अनुभव येतो. जसे की अत्यंत थकवा किंवा झोप, मूड किंवा स्मरणशक्तीची समस्या जाणवणे. फायब्रोमायल्जिया पुरुषांपेक्षा जास्त स्त्रियांना होतो. यामुळे होणाऱ्या वेदनांमुळे अत्यंत थकवा येऊ शकतो आणि झोपेची कमतरता दैनंदिन कामे करण्याच्या क्षमतेवर परिणाम करू शकते. फायब्रोमायल्जिया असलेले लोक अनेकदा बराच वेळ झोपल्यानंतरही थकून उठतात. फायब्रोमायल्जिया मेंदूतील मज्जातंतूतील समस्येमुळे होऊ शकतो. फायब्रोमायल्जियाची तुलना संधिवाताशी केली गेली आहे. फायब्रोमायल्जिया, संधिवाताप्रमाणे, वेदना आणि थकवा आणतो. परंतु संधिवाताप्रमाणे, फायब्रोमायल्जियामुळे लालसरपणा आणि सूज किंवा सांध्याचे नुकसान होत नाही. या आजारामुळे झोपेची कमतरता देखील होऊ शकते.
फायब्रोमायल्जियाची लक्षणे
- अधिक शरीर वेदना होणे
- थकवा जाणवणे
- अशक्तपणा जाणवणे
- शांत राहावेसे वाटणे
- स्नायूंना सूज येणे
फायब्रोमायल्जिया वेदना दूर ठेवण्यासाठी काय करावे?
या अवस्थेत योग्य उपचार आवश्यक आहेत, जीवनशैलीत काही बदल केल्याने लक्षणे दूर होण्यास मदत होते. आहारात काही बदल करणे आवश्यक आहे. हंगामी फळे, भाज्या, बाजरी आणि कडधान्ये यांसारख्या अँटिऑक्सिडंटयुक्त पदार्थांचे सेवन केल्याने सूज आणि वेदना कमी होऊ शकतात. शिजवलेल्या भाज्यांचा आहारात समावेश करा. या समस्येमध्ये दुग्धजन्य पदार्थ टाळावे.
जीवनशैलीत हे बदल करा
- रक्त परिसंचरण सुधारण्यासाठी आणि चालताना वेदना कमी करण्यासाठी सकाळी लवकर कोमट पाण्याने अंघोळ करा.
- दररोज भरपूर प्रमाणात पाणी प्या. तसेच, ज्यूसचे सेवन करा.
- जळजळ कमी करण्यासाठी, कच्ची कोबी, गाजर, पालक, लसूण आणि कांदे यांसारखे अँटिऑक्सिडंटयुक्त पदार्थ खा.
- कॅफिन आणि धूम्रपानापासून लांब राहा.
टीप : वरील सर्व बाबी एबीपी माझा केवळ माहिती म्हणून वाचक-प्रेक्षकांपर्यंत पोहोचवत आहे. यातून एबीपी माझा कोणताही दावा करत नाही. त्यामुळे कोणतेही उपचार, डाएट आणि औषधं तज्ज्ञांच्या सल्ल्यानं घ्यावीत.
महत्त्वाच्या बातम्या :