Health : बर्गर.. पिझ्झा.. हॉटेलचं खाणं चवीला किती Yummy लागतं... हो की नाही? कारण याची चव आपल्या स्वयंपाकघरातील अन्नापेक्षा वेगळी असते. कामानिमित्त बाहेर जाणे, विकेंडला पार्टी किंवा त्यात आता सुट्ट्यांची भर आल्यामुळे बाहेरचे खाणे आलेच. परंतु सतत बाहेरील जंकफूड खात असाल तर तुमच्या आरोग्यावर मोठा परिणाम होऊ शकतो. हे वाचून कदाचित तुमच्या पोटात गोळा येऊ शकतो.. जसे कि आता उन्हाळा आहे तर कोल्ड्रींक पिणे, आईस्क्रीम, बर्फाचा गोळा खाणे हे आलेच. यामुळे तुमचे पोट बिघडतेच, त्याचसोबत लहानांना मात्र मोठ्या प्रमाणात लवकर संसर्ग होऊन पोटदुखी, जुलाब किंवा जळजळ सुरु होते, त्यामुळे सतत बाहेरील खात असाल, आणि तुमच्या मुलांनाही देत असाल तर एकदा आरोग्यतज्ज्ञ काय सांगतात.. हे एकदा काळजीपूर्वक वाचा...
आतड्यांसंबंधी आरोग्याबाबत आरोग्यतज्ज्ञ काय सांगतात?
पुणे येथील डीपीयू सुपर स्पेशालिटी हॉस्पिटल, गॅस्ट्रोएन्टेरोलॉजिस्ट आणि हिपॅटोलॉजिस्ट सल्लागार डॉ. अमोल डहाळे यांनी या संबंधित माहिती दिलीय. ते म्हणतात, सध्या आतड्यांसंबंधी रुग्णांची संख्या वाढत आहे, या स्थितीला ही वाढ मोठ्या प्रमाणात होताना दिसत आहे. कारण बहुतांशी लोक घराबाहेरील अन्न अधिक प्रमाणात खाताना दिसून येतात, हे अन्न शरीरासाठी अत्यंत अपायकारक आणि घातक सुद्धा ठरत आहे. त्यामुळे आतड्याचे आरोग्य वेगाने धोक्यात येत असल्याचे दिसून येते. त्याचसोबत मद्यपान आणि धुम्रपान यामुळेही अशाच समस्या निर्माण होत आहेत.
गेल्या 15 दिवसांत आतड्यांसंबंधी आरोग्याची किती प्रकरणं समोर आली?
मागील काही दिवसांमध्ये आतड्यांसंबंधीच्या आरोग्याशी संबंधित जवळजवळ 20 रुग्ण दृष्टीस आले आहेत. यापैकी बहुतेक रुग्णांना ब्लोटिंग/डायरिया बद्धकोष्ठता, ऍसिडिटी अशा वेगवेगळ्या तक्रारी असल्याचे समोर आले.
आतड्यांसंबंधीच्या आरोग्य समस्यांमध्ये योगदान देणारी कारणं कोणती?
सर्वात स्पष्ट कारण म्हणजे जीवनशैलीतील बदल ज्यात धूम्रपान, दारू पिणे, झोपेच्या वेळेत बदल, योग्य अन्न न खाणे आणि सतत बाहेरील अन्न खाणे यांचा समावेश आहे.
उपचार आणि उपाय कोणते आहेत?
तज्ज्ञांनी शिफारस केलेले उपचार आणि त्यामध्ये अँटिबायोटिक्स आणि प्रोबायोटिक्स सारखी वेगवेगळी औषधे. यामध्ये लक्षणांवर आधारित उपचार केले जातात त्यामुळे जर एखाद्याला ॲसिडिटीचा त्रास होत असेल तर आम्ही रुग्णाला टीपीआय देतो जो ॲन्टी ॲसिडिटी आहे. ब्लोटिंगसाठी विशिष्ट प्रकारची औषधे आहेत. कधीकधी आम्ही एंजाइम तयार करण्याचा सल्ला देतो किंवा त्यांचा आहार बदलण्याची शिफारस करतो.
आतड्यांचे आरोग्य बिघडल्यावर 'ही' लक्षणे दिसू शकतात?
कधीकधी रुग्णांना त्यांच्या पोटाच्या वरच्या भागात किंवा छातीत जळजळ जाणवू शकते. काही रुग्णांना मळमळ होऊ शकते. काही रुग्णांना सतत पोट फुगल्यासारखे वाटते. जास्त वायू जमा होणे - ढेकर येणे किंवा पोट फुगणे.
आतड्याचे/पोटाचे चांगले आरोग्य किती महत्त्वाचे आहे?
चांगल्या आतड्यांचे आरोग्य तुम्हाला नेहमीच्या संसर्गापासून नेहमीच प्रतिबंधित करते. तुमच्या आतड्या आरोग्य खराब असल्यास तुम्हाला दूषित अन्न किंवा पाण्यामुळे संसर्ग होण्याची शक्यता जास्त असते. त्यासाठी तुम्ही वेळेवर खाणे आवश्यक आहे आणि तुमच्या आहारात भरपूर प्रोबायोटिक्स असणे आवश्यक आहे. जेवणात शक्यतो सॉस टाळावे कारण ते योग्यरित्या शिजवलेले नसते. लठ्ठपणा, धूम्रपान आणि अल्कोहोल ही सर्वात महत्वाची गोष्ट आहे, जी तुमच्या आतड्यांच्या आरोग्यामध्ये बदल घडवून आणते. या सवयी सोडणे केव्हाही चांगले..!
हेही वाचा>>>
Health : भर उन्हातून घरी आल्यावर तुम्हीही फ्रीजमधील थंड पाणी पिता? तर सावधान! आरोग्याला होणारे नुकसान जाणून घ्या
(टीप : वरील सर्व गोष्टी माहिती म्हणून वाचकांपर्यंत पोहोचवत आहोत. एबीपी माझा यातून कोणताही दावा करत नाही. )