Zaira Wasim Social Media Post: बॉलिवूड सोडल्यानंतर अभिनेत्री झायरा वसीमची सोशल मीडियावर पहिली पोस्ट
अभिनेत्री झायरा वसीमने अभिनय क्षेत्रात काम न करण्याचा निर्णय घेतला. तिच्या 'द स्काय इज पिंक' या चित्रपटातील अभिनयाला प्रेक्षकांची पसंती मिळाली होती.
मुंबई: बॉलिवूड अभिनेता आमिर खानसोबत दंगल आणि सिक्रेट सुपरस्टार या चित्रपटांमध्ये काम करून लोकप्रियता मिळवणारी अभिनेत्री झायरा वसीमने अभिनय क्षेत्रात काम न करण्याचा निर्णय घेतला होता. तिच्या 'द स्काय इज पिंक' या चित्रपटातील अभिनयाला प्रेक्षकांची पसंती मिळाली होती. गेले कित्येक दिवस झायरा सोशल मीडियावर अॅक्टिव्ह नव्हती. नुकताच झायराने तिचा एक खास फोटो शेअर केला. तिच्या या फोटोला नेटकऱ्यांची पसंती मिळत आहे.
झायराने सोशल मीडियावर तिचा फोटो शेअर केला असून त्या फोटोमध्ये तिचा चेहरा दिसत नाही. झायराच्या या फोटोला 73 हजारांपेक्षा जास्त लाइक्स मिळाले असून अनेकांनी कमेंट्स देखील केल्या आहेत. या फोटोला झायराने कॅप्शन दिले, 'द वॉर्म ऑक्टोबर सन'.
चाहत्यांना केली होती सोशल मीडियावरील फोटो डिलीट करण्याची विनंती
गेल्या वर्षी झायराने तिच्या चाहत्यांना सोशल मीडियावर एक पोस्ट शेअर करून तिचे फोटो डिलीट करावेत, अशी विनंती केली होती. तिने पोस्टमध्ये लिहिले होते की, 'तुम्हा सर्वांनी मला दिलेल्या प्रेमाबद्दल मी तुमचे आभार मानते. मला सर्व माध्यमांमधून तुम्ही प्रेम दिले. पण मी सर्वांना विनंती करते की तुम्ही सर्वांनी तुमच्या पेज वरचे माझे फोटो डिलीट करावेत' झायरा सोशल मीडियावर पुन्हा अॅक्टिव्ह झाल्याने तिचे चाहते आश्चर्यचकित झाले. काही नेटकऱ्यांनी कमेंट करून तिला शुभेच्छा दिल्या.
View this post on Instagram
जून 2019 मध्ये झायराने सोशल मीडियावर पोस्ट करून बॉलिवूड सोडण्याच्या निर्णयाबद्दल चाहत्यांना सांगितले होते. तिने पोस्टमध्ये लिहिले होते की, 'मी जरी या क्षेत्रात काम करू शकत असले तरी मी हे काम आनंदाने करू शकत नाही.'
झायराने 2016 मध्ये प्रदर्शित झालेल्या दंगल या चित्रपटामधून बॉलिवूडमध्ये पदार्पण केले. तिने या चित्रपटामध्ये बबिता फोगाट यांची भूमिका साकारली होती. त्यानंतर 2017 मध्ये तिने सिक्रेट सुपरस्टार या चित्रपटामध्ये काम केले. आयशा चौधरी यांच्या जिवनावर आधारित चित्रपट 'द स्काय इज पिंक'मध्ये झायराने प्रमुख भूमिका साकारली.
महत्त्वाच्या बातम्या
