वरुण धवनला मुंबई मेट्रोत स्टंट करणं भोवलं, VIDEO शेअर करत MMMOCLने लगेच सुनावलं, कारवाईचा इशारा

मुंबई मेट्रोच्या संचालनाची जबाबदारी असलेल्या MMMOCL (महामुंबई मेट्रो ऑपरेशन्स कॉर्पोरेशन लिमिटेड) ने याची गंभीर दखल घेत अभिनेता वरूण धवनला कारवाईचा इशारा दिलाय.

Varun Dhawan

Source : ABPLIVE AI

Varun Dhavan Mumbai Metro: सध्या सर्वत्र ‘बॉर्डर 2’ या चित्रपटाची जोरदार चर्चा सुरू आहे. चित्रपटगृहांमध्ये बॉर्डर2 सिनेमासाठी लोक गर्दी करताना दिसत आहेत. अनेक ठिकाणी हाउसफुल बोर्ड लागले आहेत. दरम्यान, या सिनेमातील अभिनेता वरुण धवन (Varun Dhawan)एका वेगळ्याच कारणामुळे चर्चेत आला आहे. मुंबई मेट्रोमध्ये केलेल्या एका कृतीमुळे वरुण वादाच्या भोवऱ्यात सापडला असून, हा प्रकार त्याला चांगलाच महागात पडण्याची शक्यता आहे. 

नेमकं घडलं काय?

मुंबई मेट्रोच्या कोचमध्ये वरुण धवन हँडलला लटकून व्यायाम करताना दिसणारा एक व्हिडीओ सोशल मीडियावर मोठ्या प्रमाणात व्हायरल झाला. इतकंच  नाही तर त्याच्या बाजूला असलेल्या एका तरुणालाही तो हॅन्डलवर लटकायला लावतो. काही चाहत्यांनी त्याच्या साधेपणाचं आणि फिटनेसप्रेमाचं कौतुक केलं, तर अनेकांनी सार्वजनिक ठिकाणी अशा वर्तनावर टीकाही केली. हा व्हिडीओ समोर आल्यानंतर मुंबई मेट्रोच्या संचालनाची जबाबदारी असलेल्या MMMOCL (महामुंबई मेट्रो ऑपरेशन्स कॉर्पोरेशन लिमिटेड) ने याची गंभीर दखल घेत अभिनेता वरूण धवनला कारवाईचा इशारा दिलाय.

मिळालेल्या माहितीनुसार, गर्दी टाळण्यासाठी वरुणने आपली कार न वापरता मेट्रोने प्रवास करण्याचा निर्णय घेतला होता. या प्रवासादरम्यान त्याने मेट्रोमधील एक व्हिडीओ इंस्टाग्रामवर शेअर केला होता. या व्हिडीओमध्ये तो चाहत्यांशी संवाद साधताना दिसतो. मात्र, याच दरम्यान त्याचा मेट्रोमध्ये हँडलला लटकून पुल-अप करतानाचा व्हिडीओ व्हायरल झाला आणि वादाला तोंड फुटलं. प्रकरण वाढू लागल्यानंतर MMMOCL ने त्यांच्या अधिकृत इंस्टाग्राम अकाउंटवरून वरुण धवनचा व्हिडीओ शेअर करत त्याला स्पष्ट शब्दांत समज दिली. संस्थेने सांगितलं की, अशा प्रकारचे स्टंट प्रवाशांच्या सुरक्षिततेस धोका ठरू शकतात. मेट्रोमधील ग्रॅब हँडल हे प्रवाशांनी तोल सांभाळण्यासाठी असतात, व्यायाम किंवा करमणुकीसाठी नाहीत, असा स्पष्ट इशाराही देण्यात आला.

 

This video should have come with a disclaimer like the ones in your action movies, @Varun_dvn -
Do Not Try This On Maha Mumbai Metro

We get it, it is cool to hang out with friends inside our metros but those grab handles are not for hanging.

Acts like these are punishable… pic.twitter.com/XiCP8OF8wT

— Maha Mumbai Metro Operation Corporation Ltd (@MMMOCL_Official) January 26, 2026

काय म्हटलं MMMOCL ने?

MMMOCL ने आपल्या पोस्टमध्ये लिहिलंय की, “अ‍ॅक्शन चित्रपटांप्रमाणे या व्हिडीओसाठीही डिस्क्लेमर आवश्यक होता. कृपया असे प्रयोग महामुंबई मेट्रोमध्ये करू नका.” तसेच मेट्रो रेल्वे (ऑपरेशन्स अँड मेंटेनन्स) कायदा, 2002 अंतर्गत अशा प्रकारचं वर्तन दंडनीय गुन्हा ठरू शकतं, असंही नमूद करण्यात आलं आहे. परिस्थितीच्या गंभीरतेनुसार दंड किंवा कारावासाची शिक्षा होऊ शकते, असा इशाराही देण्यात आला. दरम्यान, प्रवाशांनी मेट्रो प्रवासाचा आनंद घ्यावा, मात्र नियमांचे पालन करत जबाबदारीने प्रवास करावा, असं आवाहनही महामुंबई मेट्रोकडून करण्यात आलं आहे.