Ghar Banduk Briyani Movie : 'फँड्री', 'सैराट' आणि 'नाळ'च्या अभूतपूर्व यशानंतर दिग्दर्शक नागराज मंजुळे आणि झी स्टुडिओज 'घर बंदूक बिरयानी' सिनेमाची निर्मिती करणार आहेत. नुकताच या चित्रपटाचा टीझर प्रदर्शित करण्यात आला आहे. नागराज मंजुळेंचा अभिनयदेखील प्रेक्षकांना पाहायला मिळणार आहे. सैराट फेम आकाश ठोसरदेखील चित्रपटात मुख्य भूमिकेत आहे. आकाश ठोसर आणि नागराजच्या जोडीवर प्रेक्षकांनी प्रेम केले होते. त्यामुळे आता पुन्हा एकदा नागराज आणि आकाशची जोडी धुमाकूळ घालणार आहे. त्यांना साथ देताना सयाजी शिंदेदेखील चित्रपटात दिसून येणार आहेत. नागराज मंजुळे, आकाश ठोसर, सयाजी शिंदे 'घर बंदूक बिर्याणी' सिनेमात मुख्य भूमिकेत असणार आहेत.
झी स्टुडिओजने लाइट्स, कॅमेरा, अॅक्शन म्हणण्याची वेळ आली आहे, असं म्हणत 'घर बंदूक बिरयानी' सिनेमाचा टीझर ट्विट केला आहे. तर आकाश ठोसरने त्याच्या इन्स्टाग्राम अकाउंटवर 'घर बंदूक बिरयानी चांगभलं' म्हणत टीझर शेअर केला आहे. या सिनेमाचे संवाद आणि पटकथा नागराज मंजुळे आणि हेमंत अवताडे यांनी लिहिले आहेत. तर हेमंत अवताडे यांनीच या चित्रपटाचे कृत आहेत. या चित्रपटाला संगीत ए. व्ही. प्रफुल्लचंद्र यांनी दिले आहे. झी स्टुडिओजने या चित्रपटाची निर्मिती केली आहे. नागराज मंजुळे आणि भूषण मंजुळे हे या चित्रपटाचे निर्माते आहेत. तर हा सिनेमा 2022 सालात प्रदर्शित करण्यात येणार आहे.
सलग तीन हीट चित्रपट देण्याचा नागराजचा विक्रम
नागराज मंजुळेंचे फँड्री, सैराट आणि नाळ असे तीन सिनेमे सुपरहिट झाले होते. तिन्ही सिनेमाचे कथानक, बांधणी वेगळ्या पद्धतीची होती. त्यामुळे येणारा 'घर बंदूक बिरयानी' सिनेमाची प्रेक्षकांना उत्सुकता आहे. 'घर बंदूक बिरयानी' सिनेमाचा टीझर दसऱ्याच्या शुभमुहुर्तावर प्रदर्शित करण्यात आला होता. नागराज आणि आकाशची जोडी काय धुमाकूळ घालणार याची प्रेक्षक प्रतिक्षा करत आहेत. सिनेमाच्या टीझरवर सोशल मीडियावर चाहत्यांचा उत्तम प्रतिसाद मिळतो आहे. नागराजचे चाहते त्याच्या सिनेमासाठी उत्सुक आहेत.
आगामी मराठी सिनेमे
जयंती, झिम्मा, गोदावरी, डार्लिंग, फ्री हिट दणका, दे धक्का 2 हे आगामी मराठी सिनेमे लवकरच प्रदर्शित होणार आहेत. जयंती सिनेमा 26 नोव्हेंरला सिनेमागृहात प्रदर्शित होणार आहे. येत्या 19 नोव्हेंबरला 'झिम्मा' सिनेमा प्रेक्षकांना चित्रपटगृहात जाऊन पाहता येणार आहे. गोदावरी सिनेमा येत्या 3 डिसेंबरला प्रदर्शित होणार आहे. 'डार्लिंग' सिनेमा 10 डिसेंबरला सिनेमागृहात प्रदर्शित होणार आहे. फ्री हिट दणका चित्रपट येत्या 17 डिसेंबरला प्रदर्शित होणार आहे. 'दे धक्का 2' चित्रपट 1 जानेवारीला प्रेक्षकांच्या भेटीला येणार आहे.
गोदावरी सिनेमाच्या माध्यमातून अभिनेता जितेंद्र जोशी करणार निर्मिती क्षेत्रात पदार्पण
गोदावरी सिनेमा येत्या 3 डिसेंबरला प्रदर्शित होणार आहे. जितेंद्र जोशी, नीणा कुलकर्णी, संजय मोने, गौरी नलावडे, विक्रम गोखले, प्रियदर्शन जाधव, सखी गोकले या कलाकारांच्या यात मुख्य भूमिका आहेत. गोदावरी चित्रपटगृहाचे आंतरराष्ट्रीय समीक्षणदेखील करण्यात आले आहे. गोदावरी सिनेमाच्या माध्यमातून अभिनेता जितेंद्र जोशी निर्मिती क्षेत्रात पदार्पण करणार आहे.