थिएटर्स खुली झाली असली तरीही नाट्यनिर्मात्यांचं सध्या वेट अँड वॉच

जागतिक रंगभूमीदिनीच राज्यात नाट्यगृह सुरु करण्यास परवानगी देण्यात आली आहे. थिएटर्स खुली झाली असली तरीही नाट्यनिर्मात्यांचं सध्या वेट एंड वॉच असणार आहे. शनिवार, रविवारी पुन्हा मुख्यमंत्र्यांबरोबर बैठक होणार आहे.

जागतिक रंगभूमीदिनी समस्त नाट्यकर्मींना एक चांगली बातमी मिळाली ती नाट्यगृहं सुरु होण्याबाबतची. गेल्या मार्चपासून बंद झालेली थिएटर्स अखेर आता सुरु होणार आहेत. असं असलं तरी नाट्यनिर्मात्यांनी मात्र सध्या वेट एंड वॉचची भूमिका घेतली आहे. कारण सर्वसाधारणपणे अनलॉक होताना काही अटी शर्ती राज्य सरकारतर्फे घातल्या जातात. सर्वांनी या अटींचं पालन करणं अपेक्षित असतं. नाट्यगृहं सुरु करत असतानाच अशा कोणत्याही अटी अद्याप सरकारने जाहीर केलेल्या नाहीत. अपवाद 50 टक्के प्रेक्षकसंख्येचा. या अटीशर्ती ज्याला एसओपी म्हणतात. त्या जोवर येत नाहीत तोवर थांबण्याचा निर्णय नाट्यवर्तुळाने घेतला आहे. अर्थात माननीय मुख्यमंत्र्यांनी आज गुरुवारी नाट्यनिर्मात्यांशी संवाद साधून त्यांची बाजू ऐकून घेतली आहे. यावेळी सांस्कृतिक मंत्री अमित देशमुखही उपस्थित होते.

रंगभूमी दिनाचं औचित्य साधून गुरुवारी दुपारी दीड वाजता मुख्यमंत्री उद्धव ठाकरे यांनी सांस्कृतिक मंत्री अमित देशमुख यांच्या उपस्थितीत निर्मात्यांशी संवाद साधला. या ऑनलाईन बैठकीला नाट्यपरिषदेचे अध्यक्ष आणि निर्माते प्रसाद कांबळी, ना्ट्यनिर्माता संघाचे अध्यक्ष संतोष काणेकर, रंगधर्मी नाट्यनिर्माता संघाचे अध्यक्ष अमेय खोपकर, अजित भुरे, शुभांगी दामले, प्रदीप वैद्य, सुबोध भावे, आदेश बांदेकर, प्रदीप कबरे आदी मान्यवर उपस्थित होते. मुख्यमंत्र्यांनी निर्मात्यांचं म्हणणं ऐकून घेतलं. अर्थात बैठकीच्या सुरुवातीलाच रंगभूमी दिनाच्या शुभेच्छाही दिल्या. त्यानंतर आता नाट्यगृहं अनलॉक करत असतानाच सर्व खबरदारी घेऊन नाटक व्यवसाय पुन्हा सुरू करण्याबद्दलही एकमत झालं. तो सुरू करताना नेमकी काय काळजी घ्यायला हवी याबद्दल उपस्थित सर्वांनी आपली मतं मुख्यमंत्री आणि सांस्कृतिक मंत्र्यांसमोर मांडली. या बैठकीची माहिती निर्माता संघाचे अध्यक्ष संतोष काणेकर यांनी दिली.

ते म्हणाले, नाट्यपरिषदेचे अध्यक्ष प्रसाद कांबळी यांनीही सरकारचा निर्णय स्वागतार्ह असल्याचं सांगितलं. त्याचवेळी प्रेक्षकांची जबाबदारी महत्वाची असल्याचं कांबळी म्हणाले. शिवाय, केवळ प्रेक्षक नव्हे, तर सादरकर्ते कलाकार रंगमंच कामगार, थिएटर आदी सर्वच बाबींची काळजी घेणं आवश्यक असल्याचं सर्वांनीच सांगितलं. या बैठकीला सविस्तर चर्चा झालेली नाही. पण येत्या शनिवार-रविवारी मुख्यमंत्री पुन्हा एकदा वेळ देणार आहेत. त्यावेळी या न्यू नॉर्मलमध्ये नाट्यव्यवसायात पाळल्या जाणाऱ्या अटीशर्तींवर शिक्कामोर्तब होईल अशी अपेक्षा वर्तवण्यात येते आहे. अर्थात या नव्या नियमांचा काय परिणाम होतोय ते पाहून पुढच्या महिन्यात काही आवश्यक नियम लावले जातली तर काही अनावश्यक नियम काढले जातील. तशी मुभा या निय्मांमध्ये असावी अशी विनंती सुबोध भावे, आदेश बांदेकर यांनी मुख्यमंत्र्यांना केली आहे.

माझं नाटक माझी जबाबदारी माझं कुटुंबं माझी जबाबदारी हा सरकारने नारा दिलेला आहे. त्याच धर्तीवर आता माझं नाटक माझी जबाबदारी ही निर्मात्यांनी घ्यावी अशी सूचना मुख्यमंत्र्यांनी केली. त्यानुसार ज्याचं नाटक त्याने आपला प्रेक्षक आणि थिएटर यांची जबाबदारी घ्यावी असा संकेत यात देण्यात आल्याचं कळतं. अर्थात, त्याचसाठी काय नियम सर्वत्र पाळले जावेत त्याबद्दल येत्या शनिवार रविवारी निर्णय अपेक्षित आहे.