The Kerala Story 2: 'द केरला स्टोरी'च्या सिक्वेलमध्ये अदा शर्मा गायब; कारण विचारताच म्हणाली, ' यावर बोलणं म्हणजे...'

'द केरला स्टोरी टू गोज बियॉन्ड' या चित्रपटात जुन्या स्टारकास्ट ऐवजी नवे चेहरे पाहायला मिळत आहेत. अभिनेत्री अदा शर्मा केरला स्टोरीच्या दुसऱ्या पार्टमध्ये नसल्यामुळे तिचे चाहते निराश झालेले.

The Kerala Story 2

Source : ABPLIVE AI

The Kerala story 2 Adah Sharma : गेल्या अनेक दिवसांपासून 'द केरला स्टोरी 2' या चित्रपटावरून वाद सुरू आहेत. प्रदर्शनाच्या अवघ्या एक दिवस आधी केरळ हायकोर्टाने चित्रपटाला अंतरिम स्थगिती देत निर्मात्यांना दणका दिला होता. नंतर चित्रपट प्रदर्शित झाला खरा, पण अजूनही या चित्रपटावर अनेक दिग्दर्शक निर्माते तसेच फिल्म क्रिटिक्स प्रतिक्रिया देताना दिसत आहेत. 'द केरला स्टोरी'च्या पहिल्या भागात अभिनेत्री अदा शर्मा प्रमुख भूमिकेत दिसली होती. या चित्रपटाने रिलीजनंतर बॉक्स ऑफिसवर मोठी कमाई केलेली. अभिनेत्री अदा शर्माही प्रचंड लोकप्रिय झाली. पण नुकत्याच प्रदर्शित झालेल्या 'द केरला स्टोरी टू गोज बियॉन्ड' या चित्रपटात जुन्या स्टारकास्ट ऐवजी नवे चेहरे पाहायला मिळत आहेत. अभिनेत्री अदा शर्मा केरला स्टोरीच्या दुसऱ्या पार्टमध्ये नसल्यामुळे तिचे चाहते निराश झाले. मात्र, सिक्वेलमध्ये काम न केल्याबाबत अलीकडेच अभिनेत्री अदा शर्माने प्रतिक्रिया दिली आहे.

काय म्हणाली अदा शर्मा ?

'द केरला स्टोरी' हा चित्रपट 2023 मध्ये प्रदर्शित झाला होता. या चित्रपटाला प्रदर्शित झाल्यानंतर चांगला प्रतिसाद मिळाला होता. बॉक्स ऑफिसवरही या चित्रपटाने चांगली कमाई केलेली. पहिल्या चित्रपटाच्या यशानंतर आता 'केरला स्टोरी टू गोज बीयॉन्ड' हा चित्रपट प्रेक्षकांच्या भेटीला आला आहे. सिक्वेलमध्ये प्रमुख अभिनेत्री म्हणून अदा शर्मा नसल्याने चाहत्यांनी तर्क वितर्क लावायला सुरुवात केली होती. यावर तिने प्रतिक्रिया दिली आहे.  ती म्हणाली," मी ज्या चित्रपटाचा भाग असते त्या चित्रपटाबद्दल बोलायला मला आवडतं. पण ज्या चित्रपटात माझा सहभाग नाही त्या चित्रपटाबद्दल फक्त चर्चेत राहण्यासाठी बोलणं मला योग्य वाटत नाही. 'द केरला स्टोरी'च्या सिक्वेल साठी मला ऑफर आली होती की नाही हा विषय निर्माते आणि कलाकार यांच्यातलाच असतो आणि तो सार्वजनिकरित्या चर्चेत आणणं योग्य नाही' असं अभिनेत्री अदा शर्मा म्हणाली.

ती पुढे म्हणाली ' पहिल्या भागात अफगाणिस्तानमधील आयसीसच्या कॅम्पबद्दल दाखवण्यात आलं होतं. एका निरागस मुलीला टप्प्याटप्प्याने कसं दहशतवादी बनवलं जातं हे त्यात दाखवण्यात आलेलं. पण दुसऱ्या भागाची कथा पूर्णपणे वेगळी आहे असं अदा म्हणाली.

चाहत्यांचे आभार मानले

'द केरला स्टोरी टू ' मध्ये अदा शर्मा दिसत नसल्यामुळे अनेक चाहत्यांनी नाराजी व्यक्त केलेली. पहिल्या आणि दुसऱ्या चित्रपटाच्या बॉक्स ऑफिसच्या कमाईची ही चर्चा होत होती. त्यावर प्रतिक्रिया देताना अदा शर्मा म्हणाली ' माझे प्रेक्षक मला खूप प्रेम देतात. त्यांना मला प्रत्येक चित्रपटात पाहायचं असतं. माझ्या पदार्पणाच्या 1920 पासून द केरला स्टोरी पर्यंत त्यांनी मला वेगवेगळ्या भूमिकांमध्ये स्वीकारलं. 1920 मध्ये मी भीतीदायक भूमिका केली होती. द केरळ स्टोरीमध्ये गोड व्यक्तिमत्व दाखवलं. आणि सनफ्लॉवर मध्ये मी नकारात्मक भूमिकेत दिसले " असही ती म्हणाली.

सध्या अदा शर्मा काही नवीन प्रोजेक्ट्सच्या तयारीत आहे. यात एका बायोपिक सह ॲक्शन आणि हॉरर चित्रपटाचा समावेश आहे. अलीकडेच तिने हॉरर प्रोजेक्टसाठी केलेल्या ट्रान्सफॉर्मेशनची झलक सोशल मीडियावर शेअर केली होती. प्रोस्तेटिक मेकअपमधील तिचा लुक पाहून चहात्यामध्ये उत्सुकता वाढल्याचे दिसलं.