Telly Masala : अनुराधा पौडवाल यांना लता मंगेशकर पुरस्कार जाहीर ते 'शिंदेशाही'तील गायकीचा हिरा हरपला; जाणून घ्या मराठी मनोरंजनसृष्टीसंबंधित बातम्या

Telly Masala : जाणून घ्या मराठी मनोरंजनसृष्टीसंबंधित बातम्या

Telly Masala : मराठी मनोरंजनसृष्टी पुन्हा बहरली आहे. वेगवेगळ्या दर्जाची नाटकं (Drama), मालिका (Serial) आणि चित्रपट (Movies) प्रेक्षकांच्या भेटीला येत आहेत. जगभरातील प्रेक्षकांना मराठी कलाकृती आवडत आहेत. पण कलाकाराचं वैयक्तिक आयुष्य कसं आहे, मालिका आणि सिने विश्वात काय घडामोडी घडत आहेत हे जाणून घेण्याची देखील प्रेक्षकांना उत्सुकता आहे. जाणून घ्या मराठी मनोरंजनसृष्टीसंबंधित बातम्या...

Anuradha Paudwal : अनुराधा पौडवाल यांना लता मंगेशकर पुरस्कार जाहीर, आरती टिकेकर,रोहिणी हट्टंगडी यांचाही होणार गौरव

राज्य शासनाच्या सांस्कृतिक कार्य विभागामार्फत प्रदान करण्यात येणारे विविध पुरस्कार जाहीर झाले आहेत. त्यामध्ये 2024 चा गानसम्राज्ञी लता मंगेशकर पुरस्कार ज्येष्ठ गायिका अनुराधा पौडवाल (Anuradha Paudwal) यांना जाहीर झाला आहे. यासोबतच शास्त्रीय संगीतामधील योगदानासाठी आरती अंकलीकर-टिकेकर, सिनेमाक्षेत्रातील योगदानासाठी रोहिणी हट्टंगडी या कलाकारांचा गौरव होणार आहे. 

Anand Shinde Brother Dinkar Shinde Passed Away : 'शिंदेशाही'तील गायकीचा हिरा हरपला, शिंदे कुटुंबावर कोसळला दु:खाचा डोंगर

अनेक दशकांपासून आंबेडकरी गीतांपासून भक्ति गीतांपर्यंत शिंदे कुटुंबाचा गायनाच्या क्षेत्रात दबदबा आहे. प्रल्हाद शिंदे यांच्यापासून सुरू झालेला हा प्रवास शिंदेशाही घराण्यापर्यंत आला आहे. याच शिंदेशाही घराण्यावर दु:खाचा डोंगर कोसळला आहे. प्रल्हाद शिंदे (Prahlad Shinde) यांच्या गायनाचा वारसा पुढे नेणारे, आनंद शिंदे (Anand Shinde) यांचे धाकटे बंधू गायक दिनकर प्रल्हाद शिंदे (Dinkar Shinde) यांचे निधन झाले आहे. त्यांचा पुतण्या, गायक उत्कर्ष शिंदे (Utkarsh Shinde) याने सोशल मीडियावर पोस्ट लिहित माहिती दिली आहे.  

Bigg Boss Marathi Season 5 Suraj Chavan : शेवटी आलोय, शेवटीच जाणार... ट्रॉफी तर मीच नेणार; गुलिगत सूरजचं ठरलं, एकदम पक्क केलं

  'बिग बॉस मराठी'च्या यंदाच्या सीझनला (Bigg Boss Marathi Season 5) आता रंग चढू लागला आहे. बिग बॉसचा तिसरा आठवडा सुरू झाला असून बहुतांशी सगळेच स्पर्धक आता आपला खेळ खेळू लागले आहेत. बिग बॉस मराठीच्या या सीझनमध्ये सोशल मीडियावर धमाल उडवून देणारे रील स्टार्सही आहेत. यातही गुलिगत धोका म्हणून सोशल मीडियावर धुरळा उडवणाऱ्या सूरज चव्हाणने (Suraj Chavan) सगळ्यांचे लक्ष वेधले आहे. बिग बॉसची ही ट्रॉफी मीच जिंकणार असा पक्का निर्धारच सूरजने केला आहे. 

Bigg Boss Marathi Season 5 Day 17 : बाळाचे कपडे फाडले, हाल केले...भावनांच्या खेळात सगळे झाले भावशून्य; 'बिग बॉस' घेणार सदस्यांविरोधात अॅक्शन

'बिग बॉस मराठी'चा नवा सीझन (Bigg Boss Marathi Season 5) सध्या सुरू आहे. बिग बॉसच्या घरात टास्कच्या दरम्यान वादावादी सुरू असते. यातून अनेकदा घरातील स्पर्धक आक्रमक होतात. मात्र, सोमवारी बिग बॉसने दिलेल्या टास्कमध्ये घरातील सदस्य भावशून्य होऊन खेळले. त्यामुळे आता बिग बॉस नाराज झाले असून घरातील सदस्यांविरोधात अॅक्शन घेणार आहेत. 

Munawar Faruqui Apologises :  'माझं कोकणावर खूप खूप प्रेम...', मुनव्वर फारुकीने मागितली जाहीर माफी

मुंबईतील एका स्टँडअप कॉमेडी कार्यक्रमादरम्यान मुनव्वर फारुकीने (Munawar Faruqui) वापर केलेल्या शब्दप्रयोगामुळे राजकीय वातावरण चांगलच तापलं होतं. कोकणी माणसाविषयी उल्लेख करताना मुनव्वरने शिवीचा वापर केला होता. त्यामुळे त्याच्याविरोधात मनसे आक्रमक झाल्याचंही पाहायला मिळालं. त्याचप्रमाणे नितेश राणे यांनी देखील त्याला इशारा दिला होता. त्यानंतर आता मुनव्वरने सगळ्यांची जाहीर माफी मागितली आहे.