Subhedar Movie World Television Premiere : दिग्पाल लांजेकर (Digpal Lanjekar) दिग्दर्शित 'सुभेदार' (Subhedar) हा सिनेमा काही दिवसांपूर्वी सिनेमागृहात प्रदर्शित झाला असून या सिनेमाने चांगलाच धुमाकूळ घातला. आता या बहुचर्चित सिनेमाचा वर्ल्ड टेलिव्हिजन प्रीमियर होणार आहे. त्यामुळे मैत्री, शौर्य आणि बलिदानाची वीरगाथा प्रेक्षकांना आता घरबसल्या पाहायला मिळणार आहे.
राजमाता जिजाऊ आणि छत्रपती शिवाजी महाराजांनी पाहिलेल्या स्वराज्याच्या स्वप्नपूर्तीमध्ये अनेक शूरवीरांनी मोलाची साथ दिली. महाराष्ट्राच्या शिवकालीन इतिहासातील प्रत्येक पान या शूरवीरांच्या अतुलनीय शौर्याने भरलेलं आहे. सुभेदार तानाजी मालुसरेंचा कोंढाण्यावरील पराक्रम ही अशीच एक अद्वितीय सुवर्णगाथा.
'या' दिवशी पाहा 'सुभेदार'चा वर्ल्ड टेलिव्हिजन प्रीमियर
दिग्दर्शक दिग्पाल लांजेकर यांच्या शिवराज अष्टकातील पाचवा चित्रपट सुभेदार तानाजी मालुसरे यांच्या पराक्रमाची गाथा आपल्यापुढे मांडतो. हा दैदिप्यमान इतिहास पुन्हा एकदा अनुभवण्याची संधी प्रेक्षकांना पुन्हा मिळणार आहे. 17 डिसेंबरला सायंकाळी 7 वाजता स्टार प्रवाह वाहिनीवर 'सुभेदार' सिनेमाचा वर्ल्ड टेलिव्हिजन प्रीमियर होणार आहे.
‘आधी लगीन कोंढाण्याचं मग आमच्या रायबाचं' असं म्हणत तानाजी मालुसरे यांनी कोंढाण्याची मोहीम हाती घेतली. शत्रूंच्या 1500 सैन्यासमोर अवघे 500 मावळे हाताशी घेऊन तानाजी शेवटच्या श्वासापर्यंत लढले. शूरवीर तानाजींचा हा झंझावात 'सुभेदार' सिनेमाच्या माध्यमातून अनुभवता येणार आहे.
तगडी स्टारकास्ट असलेला 'सुभेदार'
दिग्पाल लांजेकर दिग्दर्शित 'सुभेदार' सिनेमात चिन्यम मांडलेकर, अजय पूरकर, मृणाल कुलकर्णी, विराजस कुलकर्णी, शिवानी रांगोळे, मृण्मयी देशपांडे, स्मिता शेवाळे, समीर धर्माधिकारी, आस्ताद काळे, ऋषी सक्सेना, अभिजीत श्वेतचंद्र असे दिग्गज कलाकार आहेत. मराठ्यांचा दैदिप्यमान पराक्रम अनुभवायचा असेल तर 'सुभेदार' सिनेमा नक्की पाहा. 'सुभेदार' सिनेमाचा वर्ल्ड टेलिव्हिजन प्रीमियर 17 डिसेंबरला सायंकाळी 7 वाजता होणार आहे.
'सुभेदार' सिनेमाने बॉक्स ऑफिसचा गड दणक्यात सर केला होता. बॉक्स ऑफिस गाजवल्यानंतर हा सिनेमा प्रेक्षकांना आता घरबसल्या पाहता येणार आहे. या सिनेमातील गाण्यांना प्रेक्षकांचा चांगला प्रतिसाद मिळाला आहे. 'आले मराठे' या गाण्यावर सिनेमागृहांमध्येच रसिक बेधुंद होऊन भगवे झेंडे घेऊन नाचताना दिसून आले.
संबंधित बातम्या