Bigg Boss 16 : ‘बिग बॉस 16’मध्ये (Bigg Boss 16) रोज नवनवे ट्विस्ट पाहायला मिळत आहेत. सुरुवातीपासूनच या शोने प्रेक्षकांना खिळवून ठेवले आहे. दरम्यान, आता टांझानियन डान्सर आणि इंटरनेट सेन्सेशन किली पॉल (Kili Paul) सलमान खानच्या वादग्रस्त रिअॅलिटी शो ‘बिग बॉस 16’मध्ये एन्ट्री घेणार आहे. बॉलिवूड गाण्यांवर लिप सिंक आणि डान्स व्हिडीओंद्वारे सोशल मीडियावर चर्चेत असणारा किली पॉल आता लवकरच या शोमध्ये एन्ट्री करणार आहे. किली पॉल पहिल्यांदाच टीव्ही शोमध्ये झळकणार आहे.
निर्मात्यांनी आगामी भागाचा प्रोमो देखील सोशल मीडियावर शेअर केला आहे, ज्यामध्ये किली पॉल शोमध्ये ग्रँड एन्ट्री करताना दिसत आहे आणि शोचा एंटरटेन्मेंट किंग अब्दु रोजिक त्याचे स्वागत करताना दिसत आहे. व्हिडीओमध्ये किली पॉल त्याच्या नेहमीच्याच लूकमध्ये नाचत 'बिग बॉस'च्या घरात प्रवेश करताना दिसतो. त्याला पाहून सर्व स्पर्धक टाळ्या वाजवू लागतात. तर, अब्दु रोजिक पुढे येतो आणि तो किली पॉलसोबत डान्स करू लागतो. यानंतर, किली पॉल घराच्या लिव्हिंग एरियामध्ये इतर सर्व स्पर्धकांसोबत डान्स करतो.
पाहा प्रोमो :
टांझानियन स्टार किली पॉलची लोकप्रियता भारतातही प्रचंड आहे. तो त्याच्या डान्स मूव्ह्स आणि हिंदी गाण्यांच्या लिप सिंकसाठी खूप प्रसिद्ध आहे. आता किली पॉल बिग बॉसच्या घरात प्रवेश करणार आहे, पण यातही एक ट्विस्ट असणार आहे. किली पॉल या रिअॅलिटी शोमध्ये स्पर्धक म्हणून नाही, तर पाहुणा कलाकार म्हणून दिसणार आहे.
कोण आहे किली पॉल?
टांझानियाचा इंटरनेट सेन्सेशन किली पॉल (Kili Paul) बॉलिवूड चित्रपट तसेच दक्षिण भारतीय चित्रपटांची गाणी आणि डायलॉगवर नेहमी व्हिडीओ बनवताना पाहायला मिळतो. पारंपारिक मसाई ड्रेसमध्ये दिसणारी किली पॉल त्याच्या व्हिडीओंमुळे कायम चर्चेत असतो. त्याने आतापर्यंत वेगवेगळे बॉलिवूड चित्रपट आणि गाण्यांवर व्हिडीओ बनवले आहेत. तो वेगळ्या शैलीनं भारतीयांची मनं जिंकताना दिसतो.
सध्या पॉलचे सोशल मीडियावर 23 लाख फॉलोअर्स आहे. अभिनेता आयुष्मान खुराना, गुल पनाग आणि ऋचा चड्डा सहित अनेक भारतीय कलाकार पॉलला सोशल मीडियावर फॉलो करत आहे. किलीसोबतच त्याची बहिण निमा पॉल देखील सोशल मीडियावर व्हिडीओ शेअर करत असते. या दोघांच्या हिंदी गाण्यांवरील व्हिडीओला नेटकऱ्यांची विशेष पसंती मिळते. बिजली बिजली, टिप टिप बरसा पानी आणि कूसू कूसू या हिंदी गाण्यांवरील व्हिडीओ किलीने सोशल मीडियावर शेअर केले आहेत.
संबंधित बातम्या