दाक्षिणात्य अभिनेत्रीची छेड काढल्याप्रकरणी प्रसिद्ध टीव्ही अभिनेत्याला अटक
अभिनेता प्राचीन चौहानने दाक्षिणात्य अभिनेत्रीला सुरुवातीला पार्टीत डान्स करायला बोलावले. पण तिने डान्स करायला नकार दिला. त्यानंतर संतापलेल्या प्राचीन चौहानने अभिनेत्रींच्या थोबाडीत लगावली.
मुंबई : ‘कसौटी जिंदगी की’ फेम टीव्ही अभिनेता प्राचीन चौहानला मुंबई पोलिसांनी अटक केली आहे. पार्टीत मैत्रिणीची छेड काढणे या अभिनेत्याला महागात पडले आहे. पोलिसांना त्याच्याविरोधात गुन्हा दाखल करुन त्याला अटक केली आहे. अभिनेता प्राचीन चौहान हा एका प्रसिद्ध टीव्ही सिरियलय कसौटी जिंदगी की मालिकेमध्ये मुख्य भुमिकेत होता.
1 जुलैच्या रात्री मालाड पूर्व येथील ओमकार बिल्डिंग येथे प्राचीन चौहान याने आपल्या घरी पार्टी ठेवली होती. या पार्टीला त्याने एका दाक्षिणात्य अभिनेत्रीला देखील बोलावले होते. ही दाक्षिणात्य अभिनेत्री आपल्या एका गायक मित्रासोबत अभिनेता प्राचीन चौहान याच्या घरी पार्टीला पोहोचली. पार्टी रंगात आल्यावर दारुच्या नशेत असलेल्या अभिनेता प्राचीन चौहानने या दाक्षिणात्य अभिनेत्रीला सुरुवातीला पार्टीत डान्स करायला बोलावले. पण अभिनेत्रीने त्याच्या सोबत डान्स करायला नकार दिला. तरी देखील प्राचीन चौहान सतत तिला डान्स करायला बोलवत होता आणि ती विरोध करत होती. बराच वेळ चाललेल्या या तमाशात शेवटी अभिनेता प्राचीन चौहानने त्या दाक्षिणात्य अभिनेत्रींच्या थोबाडीत लगावली.
या घटनेनंतर अभिनेत्री आणि तिच्या गायक मित्राने जवळचे कुरार पोलीस स्टेशन गाठले आणि प्राचीन चौहान विरोधात तक्रार दाखल केली. या तक्रारीवरुन पोलिसांनी गुन्हा दाखल करत प्राचीन चौहानवर कारवाई केली. दाक्षिणात्य अभिनेत्रीच्या जबाबावरुन कलम 354, 342, 323 आणि 506 (2) या कलमांतर्गत गुन्हा दाखल केला असून अभिनेता प्राचीन चौहानला कुरार पोलिसांनी अटक केली. त्याला बोरीवली न्यायालयात हजर केले असता बोरीवली न्यायालयाने प्राचीन चौहान याला दोन दिवसांची पोलिस कोठडी सुनावली आहे.
'कसौटी जिंदगी की' मालिकेतून पदार्पण
प्राचीने स्टार प्लसच्या लोकप्रिय शो 'कसौटी जिंदगी की' मधून सुब्रतो बासू या रोलमध्ये टेलीव्हिजनमध्ये पदार्पण केले. त्यानंतर त्यांने 'कुछ झुकी पलकें', 'सिंदूर तेरे नाम का', 'साथ फेरे' आणि 'मात पिता के चरण में स्वर्ग' अशा अनेक मालिकांमध्ये काम केले.
वेब सीरिजमध्येही काम केलं
यूट्यूब चॅनल शीटी आयडियाच्या 'प्यार का पंच' या वेब सीरिजमध्ये अभिमन्यूची भूमिका साकारून प्रचिन चौहानने बरीच प्रसिद्धी मिळवली आहे.