BIG BOSS MARATHI 2 | शिवानी, वैशाली, दिगंबर, अभिजीतमध्ये कोणतं कारस्थान शिजतंय?

या आठवड्याच्या नॉमिनेशन प्रक्रियेत पराग, किशोरी, नेहा, दिगंबर, माधव आणि अभिजीत बिचुकले या सदस्यांची नावं निश्चित झाली आहेत.

मुंबई : मराठी बिग बॉसचा दुसरा सीजन पहिल्या दिवसापासूनच चर्चेत आहे. पहिल्याच आठवड्यात घरातल्या सदस्यांनी आपापले रंग दाखवून स्वतःची पात्रता सिद्ध केली आहे. बिग बॉसच्या दुसऱ्या आठवड्यात मैथिली जावकरने घराचा निरोप घेतला आणि आता या आठवड्यासाठीही नॉमिनेशनची प्रक्रिया पूर्ण झाली आहे. 

यावेळची ही नॉमिनेशनची प्रक्रिया जरा हटके झाली. ती इतकी हटके होती की घरातल्या सदस्यांना त्याचे चांगलेच चटके बसले असणार. कारण यावेळी सदस्यांना ज्या स्पर्धकाला नॉमिनेट करायचं होतं त्याचं नाव लिहिलेली कणकेची पट्टी त्यांना उकळत्या तेलात टाकून तळायची होती. त्याचप्रमाणे बिग बॉसच्या आदेशानुसार ज्या दोन सदस्यांनी घरातल्या नियमांचे जास्तीत जास्त उल्लंघन केले होते, नॉमिनेशनसाठी त्यांच्या नावाची चर्चा करुन सर्वानुमते ठरवायची होती. या आठवड्याच्या नॉमिनेशन प्रक्रियेत पराग, किशोरी, नेहा, दिगंबर, माधव आणि अभिजीत बिचुकले या सदस्यांची नावं निश्चित झाली आहेत.

या सगळ्या प्रक्रियेदरम्यान पराग, रुपाली, वीणा आणि किशोरीचा ग्रुप स्ट्राँग असून आपल्या ग्रुपमध्ये एकी नसल्याचं शिवानीच्या लक्षात आलं आहे. त्यात या चौघांनी शिवलाही त्यांच्या बाजूने वळवून घेतलं आहे. त्यामुळे या सगळ्या परिस्थितीत शिवानी, वैशाली, दिगंबर आणि अभिजीत केळकरमध्ये काहीतरी मोठं कारस्थान शिजत असण्याची शक्यता आहे.

या आठवड्याच्या शेवटी कोण सेफ होणार आणि कोणाला बेघर व्हावं लागणार. आखलेली कारस्थानं यशस्वी होणार की ती सदस्यांवरच उलटणार हे या वीकेण्डच्या डावातच कळेल. कळेलच.