Ajunahi Barsaat Aahe : मीरा आणि आदिराज अडकणार लग्नाच्या बेडीत, आजपासून लग्नसोहळ्याला सुरुवात

Marathi Serial : 'अजुनही बरसात आहे' मालिकेत आजपासून लग्नसोहळा सुरू होणार आहे. मीरा आणि आदिराज लग्नाच्या बेडीत अडकणार आहेत.

Ajunahi Barsaat Aahe : तुळशीच्या लग्नापासून लग्नसोहळ्यांना सुरुवात होत असते. आता मालिकांमध्येदेखील लग्नसोहळ्याचे चित्र पाहायला मिळणार आहे. 'अजुनही बरसात आहे' मालिकेत आजपासून लग्नसोहळा सुरू होत आहे. मालिकेतील डॉ.मीरा आणि डॉ. आदिराज लवकरच लग्नाच्या बेडीत अडकणार आहेत. या मालिकेतून मुक्ता बर्वे आणि उमेश कामतची जोडी प्रेक्षकांच्या भेटीला आली आहे. 

अनेक वर्षांनंतर अचानक भेटलेले हे दोघं आणि मग त्यांची पुन्हा सुरू झालेली प्रेमकहाणी आता लग्नाचं रूप घेणार आहे. कॉलेजमध्ये असताना मीरा आणि आदिराज यांची भेट एका प्रसंगात अचानक होते. भेटीचं रूपांतर मैत्रीत आणि कालांतराने प्रेमात होतं. पण काही कारणांनी त्यांचं ब्रेकअप होतं. त्यानंतर 10 वर्षांनंतर ते पुन्हा भेटतात. पुन्हा भेटल्यावर त्यांच्यात सातत्याने वाद होतात. पण आदिराजचा भाचा मल्हार आणि मीराची बहीण मनस्विनी यांच्या प्रेमकहाणीमुळे आदिराज आणि मीरा यांना एकमेकांशी बोलून त्या दोघांना मदत करणं भाग पडतं. या सगळ्यांत त्यांच्या जुन्या आठवणी जाग्या होतात आणि मनातलं प्रेम ओठांवर येतं. आदिराज आणि मीरा त्यांचं प्रेम एकमेकांकडे व्यक्तं करतात आणि आता लवकरच ते कायमचे एकमेकांचे होणार आहेत.

मालिकेचे कथानक प्रेक्षकांना चांगलेच आवडते आहे. त्यामुळे त्यांच्या लग्नाची प्रेक्षक आतुरतेने वाट बघत होते. आता मीरा आणि आदिराजच्या लग्नामुळे प्रेक्षकांची प्रतीक्षा संपणार आहे. प्रेक्षकांना आता मीरा आणि आदिराजच्या लग्नसमारंभातले क्षण अनुभवायला मिळणार आहेत. मेहंदी, संगीत, हळद अशा सर्व समारंभाचे प्रेक्षक साक्षीदार असणार आहेत. 24 ते 30 नोव्हेंबर दरम्यान मीरा आणि आदिराजचा लग्नसोहळा पहायला मिळणार आहे. 

संबंधित बातम्या

LIVE TV | मराठी बातम्या, ब्रेकिंग न्यूज, महाराष्ट्रासह देश-विदेशातील प्रत्येक घडामोडी पाहा लाईव्ह - ABP Majha