Aai Kuthe Kay Karte : 'आई कुठे काय करते' (Aai Kuthe Kay Karte) ही छोट्या पडद्यावरील लोकप्रिय मालिका सध्या धक्कादायक ट्विस्टमुळे चांगलीच चर्चेत आहे. स्टार प्रवाहवरील (Star Pravah) या मालिकेत अभिनेत्री मधुराणी प्रभुलकर (Madhurani Prabhulkar) अरुंधती हे पात्र साकारत आहे. 'आई कुठे काय करते' या मालिकेच्या माध्यमातून अरुंधती घराघरांत पोहोचली आहे. मालिकेत आता अरुंधतीचा दुसरा पती आशुतोषचा मृत्यू झालेला दाखवण्यात आलं आहे. या ट्वीस्टमुळे प्रेक्षकांना धक्का बसला आहे. मालिकेत सतत काही ना ट्वीस्ट येत असतात. त्यामुळे अरुंधतीने मालिका आपल्या मुलीला न दाखवण्याचा निर्णय घेतला आहे. तसेच अरुंधतीची खऱ्या आयुष्यातील आईदेखील मालिकेच्या कथानकावर नाराज आहे.
'आई कुठे काय करते' मालिकेच्या ट्वीस्टवर अरुंधतीच्या खऱ्या आयुष्यातील कुटुंबियांची काय प्रतिक्रिया?
अरुंधतीची खऱ्या आयुष्यातील लेक खूपच लहान आहे. त्यामुळेच बालवयात आपल्या लेकीनी अशी मालिका पाहू नये, असं अरुंधतीला वाटतं. कलाकृती मीडियाला दिलेल्या मुलाखतीत मधुराणी म्हणाली,"माझी लेक लहान आहे. त्यामुळे आमच्या घरी टीव्ही जास्त पाहिला जात नाही. लेक जो कंटेट पाहते तो तिच्या वयाचाच बघते. त्यामुळे आमच्या घरी प्रत्यक्ष मालिका लावली जात नाही. पण अधून-मधून माझी आई बघत असते. मालिकेतील प्रत्येक ट्विस्टवर तिचं एक मत असतं. आता हे काय नवीन, असं काय दाखवत आहेत, मग आता तुला किती संकटाचा सामना करावा लागणार, एवढं कशाला दाखवताय, अजून किती रडत बसणारेस, अशा प्रतिक्रिया आई देत असते.
मालिकेमुळे आईबद्दलचा आदर वाढला : मधुराणी प्रभुलकर
मधुराणी प्रभुलकर म्हणाली,"आईला आपण खूप गृहित धरत असतो. आपल्यासाठी तिचा जीव सतत तुटत असतो. पण हे आपल्याला दिसत नाही. आपल्याला वाढवताना आई तिचं अस्तित्व विसरते. पण या मालिकेच्या माध्यमातून या गोष्टीची जाणीव झाली आहे आणि आईबद्दलचा आदरदेखील वाढला आहे".
अरुंधतीची भूमिका वठवणं किती कठीण?
अरुंधतीची भूमिका वठवणं हे मधुराणी प्रभुलकरसाठी खूप कठीण आहे. याबद्दल बोलताना मधुराणी म्हणाली,"आम्ही सर्व कलाकार खूप संवेदशनशील असतो. त्यामुळे ते पात्र प्रेक्षकांपर्यंत पोहोचवता येतं. स्विच ऑन-स्विच ऑफ करणं खूप कठीण असतं. मालिकेत असा काही ट्वीस्ट येणार हे आम्हालाही माहिती नव्हतं. आम्हा सर्व कलाकारांसाठी हा धक्काच होता. अरुंधतीच्या समोर आता एक नवं चॅलेंज उभं राहिलं आहे. आता ती या परस्थितीचा सामना कशी करणार हे पाहावे लागेल".
अरुंधतीला येतेय आशुतोषची आठवण
'आई कुठे काय करते' या मालिकेत आशुतोषचं पात्र ओंकार गोवर्धनने साकारलं होतं. आता मालिकेत त्याचं निधन झाल्याचं दाखवण्यात आलं आहे. आशुतोषबद्दल बोलताना अरुंधती म्हणाली,"ओंकार एक उत्कृष्ट अभिनेता आहे. व्यक्ती म्हणूनदेखील तो खूप चांगला आहे. ओंकार माझा खूपच चांगला मित्र आहे. शूटिंगदरम्यान आम्ही खूप मजा केली आहे. तो आसपास असताना एक वेगळीच सकारात्मकता यायची. आता आम्हा सर्वांना नक्कीच त्याची आठवण येईल".
संबंधित बातम्या