Shreyas Talpade Movie : श्रेयस तळपदे (Shreyas Talpade) आणि गौरी इंगावले (Gauri Ingawale) मुख्य भूमिकेत असलेला 'ही अनोखी गाठ' (Hee Anokhi Gath) हा चित्रपट 1 मार्च रोजी प्रदर्शित होणार आहे. त्याआधी या चित्रपटावर एक भन्नाट ऑफर देण्यात आली आहे. या चित्रपटाच्या एका तिकीटावर 1 तिकीट फ्री देण्यात येणार आहे. महेश मांजरेकर (Mahesh Manjarekar) यांनी या चित्रपटाच्या दिग्दर्शनाची धुरा सांभाळली आहे. यसच्या आजारपणानंतरचा हा पहिलाच चित्रपट आहे. त्यामुळे प्रेक्षकांमध्ये या चित्रपटाची बरीच उत्सुकता लागून राहिली आहे. तसेच या चित्रपटामध्ये गौरी आणि श्रेयसची नवी कोरी जोडी प्रेक्षकांच्या भेटीला येणार आहे.
या चित्रपटाच्या निर्मात्यांनी यासाठी एक भन्नाट ऑफर जाहीर केली आहे. 1 मार्च रोजी हा चित्रपट रिलीज होणार आहे. त्यामुळे एकावर एक तिकीट फ्री अशी ऑफर 1 मार्चपासूनच लागू होणार आहे. बूक माय शोवर तुम्ही HEAGBOGO हा कूपन कोड वापरुन तुम्ही ही ऑफर वापरु शकता. आपल्या माणसांच्या सोबतीने पाहा, 'ही अनोखी गाठ' ची प्रेक्षकांना 1 वर १ फ्री ची स्पेशल ऑफर, मग आजच तिकीट बुक करा, असं कॅप्शन त्यांनी या पोस्टवर दिलं आहे.
महेश मांजरेकर यांची कलाकृती
महेश मांजरेकर (Mahesh Manjrekar) मुव्हिज आणि झी स्टुडिओज निर्मित, महेश मांजरेकर दिग्दर्शित 'ही अनोखी गाठ' (Hi Anokhi Gath) या चित्रपटाची चर्चा मागील गेल्या काही दिवसांपासून सुरु आहे. या चित्रपटात श्रेयस तळपदे आणि गौरी इंगावले हे दोघे मुख्य भूमिकेत आहेत. या चित्रपटात शरद पोंक्षे, रिषी सक्सेना, दीप्ती लेले, सुरभी भावे हे कलाकार देखील पाहायला मिळणार आहेत.
आजारपणानंतर श्रेयसचं दमदार कमबॅक
अभिनेता श्रेयस तळपदेला काही महिन्यांपूर्वी हृदयविकाराचा झटका आला होता. तेव्हापासून त्याने पूर्णपणे आराम केला. पण आता श्रेयस पूर्णपणे बरा झाला असून तो ही अनोखी गाठ या चित्रपटातून दमदार कमबॅक करणार आहे. दरम्यान चाहते देखील त्याच्या या कमबॅकची आतुरतेने वाट पाहत आहे.