sangharsh yodha Box Office Collection : मनोज जरांगे (Manoj Jarange) यांच्यावर आधारित 'संघर्षयोद्धा' सिनेमा 14 जून रोजी प्रेक्षकांच्या भेटीला आला. मराठा आरक्षणासाठी मनोज जरांगे यांनी उभारलेला लढा या सिनेमाच्या माध्यमातून मोठ्या पडद्यावर साकारण्यात आला आहे. रोहन पाटील या सिनेमात मनोज जरांगे यांची भूमिका साकारत आहे. दरम्यान बॉक्स ऑफिसवर मात्र संघर्षयोद्धाचा प्रवास काहीश्या धीम्या गतीने सुरु असल्याचं पाहायला मिळतंय. कारण चार दिवसांत या सिनेमाला 50 लाखांचाही टप्पा पार करता आलेला नाही.
सॅनसिल्कच्या अहवालानुसार, 'संघर्षयोद्धा' या सिनेमाने पहिल्या चार दिवसांत 42 लाखांचा गल्ला जमावला. सॅनसिल्कच्या रिपोर्टनुसार, पहिल्या दिवशी या सिनेमाने 8 लाख रुपये, दुसऱ्या दिवशी 9 लाख रुपये, तिसऱ्या दिवशी 16 लाख रुपये आणि चौथ्या दिवशी 9 लाख रुपये इतकी कमाई केली. त्यामुळे प्रेक्षकांना या सिनेमाच्या गोष्टीचं स्वरुप आवडलं नाही का हा प्रश्न सध्या उपस्थित केला जातोय.
संघर्षयोद्धा सिनेमाची रिलीज डेटही बदलली
मनोज जरांगे आणि मराठा आरक्षणाच्या मुद्द्यावर भाष्य करणारे दोन मराठी सिनेमे तयार झाले. त्यामधील संघर्षयोद्धा - मनोज जरांगे पाटील हा सिनेमा 14 जून रोजी सिनेमागृहात प्रदर्शित करण्यात आला. तसेच आम्ही जरांगे - गरजवंत मराठ्यांचा लढा हा सिनेमा येत्या 21 जून रोजी प्रदर्शित करण्यात येणार आहे. संघर्षयोद्धा हा सिनेमा सुरुवातीला 21 जून रोजी प्रदर्शित होणार होता, पण निर्मात्यांनी या सिनेमाची तारीख बदलली आणि 14 जून रोजी प्रदर्शित करण्याचा निर्णय घेतला. त्याच दिवशी आम्ही जरांगे हा सिनेमा देखील प्रदर्शित होणार होता. पण संघर्षयोद्धामुळे आम्ही जरांगे सिनेमाची तारीख बदलण्यात तरीही. त्यामुळे बॉक्स ऑफिसवर आठवडाभर आधी रिलीज होऊनही कमाई मात्र काही लाखांमध्येच असल्याचं पाहायला मिळतंय.
संघर्षयोद्धाला आम्ही जरांगे सिनेमाचं आव्हान
येत्या शुक्रवारी म्हणजेच 21 जून रोजी आम्ही जरांगे हा सिनेमा देखील प्रदर्शित होणार आहे. त्यामुळे संघर्षयोद्धा सिनेमासाठी थेट स्पर्धक बॉक्स ऑफिसवर येईल. त्यानंतरही संघर्षयोद्धाचा प्रवास खडतर होईल की सिनेमा वरचढ ठरेल हे येत्या काही दिवसांमध्ये स्पष्ट होईलच. दरम्यान संघर्षयोद्धा सिनेमात राष्ट्रवादी शरद पवार गटाचे नेते छगन भुजबळ आणि अॅड. गुणरत्न सदावर्ते यांच्या देखील भूमिका आहेत.